1Adoni-Zedek, rato Yerusalim, meyarsa ja’ kottha Ai la erebbu’ bi’ Yusak, sarta epaancor epatadha’ karena, ratona epate’e, epakantha Yerikho ban kotthana. Rato Yerusalim jareya meyarsa keya ja’ oreng Gibeyon la mabadha parjanjiyan ban oreng Isra’il, sarta odhi’ apolong ban reng-oreng Isra’il.
2Pandhudhu’ Yerusalim ce’ tako’na sabab Gibeyon reya kottha raja, padha ban tha-kottha laen se badha ratona, la’-mala’ araja’an dhari Ai, reng-orengnga tamaso’ reng-oreng se penter aperrang.
3Daddi Adoni-Zedek ngerem otosan ka Rato Hoham e Hebron, Rato Pireyam e Yarmut, Rato Yafiya e Lakhis, ban Rato Debir e Eglon, epakon manapa’ pessen kantha reya,
4"Tore kaula tolonge nyerrangnga Gibeyon, sabab oreng Gibeyon ampon mabadha parjanjiyan akanca sareng Yusak, sareng reng-oreng Isra’il."
5Daddi rato Amori se kalema jareya, iya areya rato Yerusalim, Hebron, Yarmut, Lakhis ban Eglon, laju asakongkel, tantarana epakompol, laju padha ngeppong sarta nyerrang Gibeyon.
6Reng-oreng Gibeyon akerem kabar ka Yusak e parkemahan Gilgal, "Ja’ dinggallagi bangsa abdina, guste. Ngereng duli tolonge. Sadajana tantarana rato Amori e dhaera pagunongan ampon agabung nyerrang nagara abdina!"
7Daddi Yusak ban sakabbinna tantarana, tamaso’ kan-pasukanna se paleng bagus, mangkat dhari Gilgal, aperranga.
8Dhabuna PANGERAN ka Yusak, "Ba’na ta’ osa tako’ ka mosona. Bi’ Sengko’ ba’na la epamennang. Mosona ba’na tadha’ se mennanga ka ba’na."
9Samalem benteng Yusak ban tantarana ajalan dhari Gilgal ka Gibeyon, pas nyerrang reng-oreng Amori dadagan.
10Bi’ PANGERAN reng-oreng Amori epatako’ ban epabingong bakto nangale’e tantara Isra’il. Reng-oreng Isra’il mate’e reng-oreng Amori e Gibeyon, se gi’ odhi’ eserser terros noroni gunong e Bet-Horon sampe’ gan Azeka ban Makeda e bagiyan lao’.
11Parappa’na reng-oreng Amori buru toron gunong polana eserser tantara Isra’il, PANGERAN matoron ojan es se ja-raja dhari langnge’ epangenneng ka reng-oreng Amori jareya, e salanjangnga jalan sampe’ ka Azeka. Se mate egaggari ojan es abannya’an dhari se mate epate’e oreng Isra’il.
12E are jareya, bakto bangsa Isra’il bi’ PANGERAN epamennang ka bangsa Amori, Yusak tor-mator ka PANGERAN. E adha’anna reng-oreng Isra’il, Yusak adhabu, "He, are! Mara ambu e attasanna Gibeyon. Ban ba’na bulan! Papaggun neng e attassa Cora Ayalon."
13Are ta’ ajalan ban bulan paggun neng e kennengnganna sampe’ mosona la epakala kabbi bi’ bangsa Isra’il. Kadaddiyan jareya etoles e Ketab Yasar. Saare benteng are paggun badha e nga’-tengnga’anna langnge’.
14Sabellunna jareya ta’ tao badha kadaddiyan kantha e are jareya, ban ta’ kera badha pole e laen are, iya areya, PANGERAN norodi parentana manossa. PANGERAN nolonge bangsa Isra’il!
15Samarena jareya Yusak ban tantarana abali ka parkemahanna e Gilgal.
16Tape rato Amori se kalema rowa lolos, pas ngetek e settong guwa e Makeda.
17Badha oreng se nangale’e to-rato jareya; oreng jareya pas notorragi ka Yusak kennengnganna pangetegganna to-rato buru.
18"Gulu’agi to-bato se raja ka lobangnga guwa jareya, pas soro jaga ka pangawal," dhabuna Yusak,
19"tape ba’na ta’ olle ambu e jadhiya. Serser terros, serrang reng-oreng jareya dhari budhi; ja’ sampe’ reng-oreng jareya maso’ ka tha-kotthana! Bi’ GUSTE Allah ba’na la epamennang ka so-mosona jareya."
20Yusak ban reng-oreng Isra’il mate’e reng-oreng Amori jareya, tape badha keya reng-oreng jareya se ngenneng buru ka kotthana, nyare parlindhungan e jadhiya, daddi ta’ ekenneng pate’e.
21Saellana jareya tantarana Yusak kabbi abali kalaban salamet ka kennengngan se ekalenggi’i Yusak e parkemahan Makeda. Tadha’ oreng settonga e nagara jareya se bangala ngoca’ pa-apa alaban ka reng-oreng Isra’il.
22Saellana jareya Yusak adhabu, "Sateya bukka’ lobangnga guwa jareya, pas giba dha’ enna’ rato se kalema jareya."
23Guwa jareya ebukka’, saellana jareya to-rato Yerusalim, Hebron, Yarmut, Lakhis ban Eglon egiring kalowar,
24egiba ka Yusak. Yusak laju makompol sakabbinna oreng Isra’il, pas makon para parwira se aperrang abareng ban salerana nedda’ le’erra to-rato jareya. Para parwira jareya padha nyander, laju padha nedda’ le’erra to-rato jareya.
25Saellana jareya Yusak adhabu ka para parwirana, "Ta’ osa kene’ ate ban ta’ osa tako’. Ba’na kodu yakin ban bangal, sabab sakabbinna mosona ba’na bi’ PANGERAN bakal epakantha’a reya kabbi."
26Bi’ Yusak to-rato jareya laju epate’e, pas egantong e cangga lalema’. Mayyidda edina e jadhiya sampe’ malem.
27E bakto compet are, menorot dhabuna Yusak, yit-mayyit jareya epatoron pas eontallagi ka dhalem guwa se sabellunna jareya egabay kennengnganna pangeteggan bi’ to-rato gella’. Saellana jareya lobangnga guwa gella’ etotobi bato ja-raja. Sampe’ sateya to-bato jareya gi’ badha.
28E are jareya Yusak nyerrang Makeda, pas makala kottha jareya ban ratona. Reng-oreng kottha jareya epate’e kabbi; tadha’ oreng settonga se edina gi’ odhi’. Bi’ Yusak rato Makeda jareya eokom epakantha rato Yerikho.
29Saellana jareya Yusak ban tantarana nerrossagi parjalanan perrangnga dhari Makeda ka Libna sarta pas nyerrang Libna.
30Bi’ PANGERAN oreng Isra’il epamennang keya ka kottha jareya ban ratona. Tadha’ settonga se gi’ epaodhi’; kabbi oreng e kottha jareya epate’e. Bi’ oreng Isra’il rato Libna jareya eokom epakantha rato Yerikho.
31Saellana jareya Yusak ban tantarana nerrossagi serranganna dhari Libna ka Lakhis. Kottha jareya ekeppong, pas eserrang.
32Bi’ PANGERAN oreng Isra’il epamennang ka Lakhis e are se kapeng dhuwa’. Apa se elakowagi reng-oreng Isra’il jareya e Libna, elakowagi keya e Lakhis; tadha’ settonga oreng se gi’ epaodhi’, kabbi epate’e.
33Horam, rato Gezer entar abanto Lakhis, tape bi’ Yusak rato jareya ban tantarana padha epakala; tadha’ karena settonga, padha mate kabbi.
34Samarena jareya Yusak ban tantarana nerrossagi maju dhari Lakhis ka Eglon sarta pas ngeppong ban nyerrang kottha jareya.
35E are jareya keya Eglon ekenneng rebbu’, reng-oreng e jadhiya epate’e kabbi akantha reng-oreng e Lakhis.
36Dhari Eglon, Yusak ban tantarana ongga ka pagunongan pas entar nyerrang kottha Hebron,
37ban arebbu’ kottha jareya. Ratona ban saneyap oreng e kottha jareya ban e tha-kottha laenna e ma’-semma’na, epate’e kabbi. Bi’ Yusak kottha jareya epaancor epatadha’ karena, epakantha kottha Eglon. Tadha’ oreng settonga se ta’ epate’e.
38Saellana jareya Yusak ban tantarana abali entar nyerrang Debir.
39Kottha jareya ban ratona sarta tha-kottha laenna e ma’-semma’na padha ekobasae kabbi bi’ Yusak. Reng-oreng e jadhiya epate’e kabbi. Apa se elampa’agi Yusak ka Hebron ban Libna elampa’agi keya ka Debir ban ratona.
40Nagara jareya epatellok kabbi bi’ Yusak. To-rato e pagunongan, e reng-erengnga gumo’ e bagiyan temor, e ba-babana gunong e bagiyan bara’, ban e lon-talon e bagiyan lao’, padha epakala kabbi. Tadha’ oreng settonga se gi’ odhi’; kabbi padha epate’e. Jareya menorot dhabuna PANGERAN, Allahna Isra’il.
41Yusak makala dhaera dhari Kades-Barnea e bagiyan lao’ sampe’ ka Gaza e seddi’anna paseser, tamaso’ sakabbinna dhaera Gosyen, terros sampe’ ka Gibeyon e bagiyan dhaja.
42Yusak pera’ aperrang sakaleyan, tape to-rato jareya ban baba kakobasa’anna padha epakala kabbi, sabab PANGERAN, Allahna Isra’il, aperrang abanto Isra’il.
43Saellana jareya, Yusak abali ban tantarana ka parkemahan e Gilgal.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel