1Sateya Yusak la ce’ seppona. Dhabuna PANGERAN ka salerana, "Ba’na la towa, Yusak! Tape gi’ bannya’ dhaera se kodu erebbu’:
2sakabbinna dhaerana Filistin ban Gesur,
3ban sakabbinna bagiyanna dhaerana Awi ka lao’. (Dhaera dhari Songay Sikhor e batessa Messer sampe’ ka batessa Ekron e bagiyan dhaja, jareya kabbi kaetong dhaerana bangsa Kana’an; to-rato Filistin ngennengnge Gaza, Asdod, Askelon, Gat ban Ekron.)
4Bariya keya gi’ badha laenna se kodu erebbu’: sakabbinna dhaera Kana’an ban Me’ara (andhi’na bangsa Sidon), sampe’ ka Afek e batessa nagarana bangsa Amori;
5saellana jareya nagarana bangsa Gebal, ban sakabbinna dhaera Libanon ka temor, dhari Ba’al-Gad e bagiyan lao’na Gunong Hermon, terros sampe’ ka jalan se ka Hamat.
6Tamaso’ keya sakabbinna dhaerana oreng Sidon, se ngennengnge dhaera pagunongan e antara nong-gunong Libanon ban Misrefot-Maim." Sa-bangsa jareya bi’ Sengko’ eojuga kabbi e bakto ommat Isra’il maju merrange sa-bangsa jareya, saellana jareya Pangeran adhabu ka Yusak, "Tana jareya bi’ ba’na kodu egi-bagi ka ommat Isra’il padaddi andhi’na, akantha se la eparenta’agi Sengko’ ka ba’na rowa.
7Daddi sateya gi-bagi tana jareya ka sangang suku e dhalem bangsa Isra’il, ban ka saparona suku Manasye, me’ olle tana jareya ekaandhi’ ku-suku jareya."
8Suku Ruben ban Gad sarta saparona suku Manasye la narema bagiyan tana dhari Mosa, abdina PANGERAN rowa; iya areya tana e temorra Songay Yordan.
9Se tamaso’ dhaerana ku-suku jareya iya areya Aroër (e penggirra Corana Songay Arnon), ban kottha se badha e nga’-tengnga’anna cora jareya. Bariya keya sakabbinna tana tenggi dhari. Medeba sampe’ ka Dibon,
10ban sampe’ ka batessa dhaera Amon, tamaso’ sakabbinna kottha se tao ekobasae Sihon, rato Amori se alenggi e Hesybon.
11Tamaso’ keya dhaera Gileyad, dhaera e sabingkerra Gesur ban Ma’akha, sarta sakabbinna bagiyanna Gunong Hermon, ban sakabbinna bagiyanna dhaera Basan sampe’ ka Salkha.
12Se tamaso’ dhaerana ku-suku jareya keya, iya areya dhaerana Rato Og, oreng Refa’im se dhi-budhi marenta e Asytarot ban Edrei. Sa-bangsa jareya bi’ Mosa la epakala ban la eojuk dhari nagarana.
13Tape oreng Gesur ban Ma’akha ta’ eojuk bi’ bangsa Isra’il; reng-oreng jareya paggun neng e Isra’il.
14Suku Lewi ta’ narema bagiyan tana dhari Mosa, sabab PANGERAN la adhabu ka Mosa ja’ bagiyanna suku Lewi iya areya ban-kurban se eobbar e mezba se eatorragi ka GUSTE Allahna Isra’il.
15Sabagiyan dhari tana se ejanjiyagi Pangeran ka ommat Isra’il jareya bi’ Mosa la eparengngagi ka ga-kalowarga e dhalem suku Ruben menangka andhi’na dibi’.
16Se tamaso’ dhaerana suku jareya iya areya Aroër (e penggirra Cora Songay Arnon) ban kottha se badha e nga’-tengnga’anna cora jareya sampe’ ka saanterona tana tenggi e sabingkerra Medeba;
17bariya keya Hesybon ban sakabbinna kottha e tana tenggi jareya, iya areya: Dibon, Bamot-Ba’al, Bet-Ba’al-Meon,
18Yahas, Kedemot, Mefa’at,
19Kiryata’im, Sibma, Zeret-Hasahar se badha e attassa gumo’ e cora jareya,
20Bet-Peyor, reng-erengnga Gunong Pisga, ban Bet-Yesimot.
21Tamaso’ keya sakabbinna kottha e tana tenggi jareya, ban saanterona baba kakobasa’anna Sihon, ratona bangsa Amori, se lamba’na alenggi e Hesybon. Rato jareya ban sa-pangobasana Midian, iya areya: Ewi, Rekem, Zur, Hur ban Reba, la padha epakala bi’ Mosa. Sakabbinna pangobasa jareya tao marenta nagara jareya kaangguy Rato Sihon.
22E antarana reng-oreng se epate’e bangsa Isra’il tamaso’ keya Bileyam ana’na Beor, tokang ramal rowa.
23Songay Yordan daddi bates bagiyan bara’na dhaerana suku Ruben. Jareya tha-kottha ban sa-disa se ebagi ka ga-kalowarga e dhalem suku Ruben menangka andhi’na dibi’.
24Sabagiyan dhari tana se ejanjiyagi PANGERAN ka ommat Isra’il jareya bi’ Mosa la eparengngagi keya ka ga-kalowarga e dhalem suku Gad menangka andhi’na dibi’.
25Dhaerana suku Gad jareya iya areya Yaezer ban sakabbinna kottha e Gileyad sarta saparona dhaerana bangsa Amon sampe’ gan Aroër e temorra Raba;
26dhaera dhari Hesybon sampe’ ka Ramat-Mizpa ban Betonim, sarta dhaera dhari Mahana’im sampe’ ka batessa Lodebar, jareya kabbi tamaso’ keya dhaerana suku Gad.
27E Cora Yordan, se tamaso’ dhaerana suku Gad jareya iya areya Bet-Haram, Bet-Nimra, Sukot, ban Zafon, iya areya karena dhaerana Rato Sihon e Hesybon. Bates bagiyan bara’na dhaerana suku Gad jareya iya areya Songay Yordan sampe’ gan Talaga Galilea e bagiyan dhaja.
28Jareya tha-kottha ban sa-disa se epadaddi andhi’na ga-kalowarga e dhalem suku Gad menangka andhi’na dibi’.
29Sabagiyan dhari tana se ejanjiyagi PANGERAN ka ommat Isra’il bi’ Mosa la eparengngagi ka ga-kalowarga e dhalem saparona suku Manasye menangka andhi’na dibi’.
30Tes-batessa dhaerana sampe’ gan Mahana’im, tamaso’ saanterona Basan — iya areya sakabbinna dhaerana Og, rato Basan, ban bariya keya pong-kampong Ya’ir e Basan se bannya’na sabidak.
31Tamaso’ keya saparona tana Gileyad, sarta Asytarot ban Edrei, iya areya ibu kotthana dhaerana Rato Og se dhadhuwa’ e Basan. Jareya kabbi eparengngagi ka saparona ga-kalowarga toronanna Makhir, ana’na Manasye.
32Kantha jareya keya Mosa se magi tana e temorra Yerikho, e bara’na Songay Yordan, e bakto salerana badha e tana rendha Mo’ab.
33Tape suku Lewi ta’ olle bagiyan tana maske sakone’a dhari Mosa. Mosa adhabu ka reng-oreng jareya ja’ bagiyan se daddi andhi’na iya areya dhari ban-kurban se eatorragi ka PANGERAN Allahna Isra’il.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel