1Sabagiyan dhari dhaera e bara’na Songay Yordan ebagi ka sabagiyan dhari ga-kalowarga toronanna Manasye, pottra sareyangnga Yusup. Makhir, eppa’na Gileyad, jareya ana’na Manasye se sareyang. Sarrena Gileyad reya pajuwang, daddi eberri’i bagiyan dhaera Gileyad ban Basan se badha e temorra Songay Yordan.
2Dhaera e bara’na Songay Yordan ebagi ka ga-kalowarga laenna toronanna Manasye, iya areya kalowarga: Abiyezer, Helek, Asriyel, Sekhem, Hefer ban Semida; jareya kabbi lalake’an toronanna Manasye, pottrana Yusup, se daddi la-kapalana kalowarga.
3Zelafehad, ana’na Hefer, kompoyya Gileyad (Gileyad reya ana’na Makhir, kompoyya Manasye), ta’ andhi’ ana’ lalake’, pera’ ana’ babine’, iya areya: Makhla, No’a, Hogla, Milka, Tirza.
4Babine’an jareya padha entar ka Imam Eleyazar, Yusak pottrana Nun sarta para pamimpin, laju mator, "PANGERAN adhabu ka Mosa ca’epon kaula sataretan paneka kodu eparenge bagiyan tana akadi la-bala kaula se lalake’an." Daddi, menorot dhabuna PANGERAN, ana’ babine’anna Zelafehad jareya padha eberri’i tana akantha la-bala lalake’anna.
5Daddi, banne pera’ toronanna Manasye se lalake’an se olle bagiyan tana, toronanna se babine’an olle bagiyan keya. Jareya sababba arapa suku Manasye jareya me’ eberri’i sapolo bagiyan, salaenna tana Gileyad ban Basan e temorra Songay Yordan. Tana Gileyad ebagi ka toronanna Manasye se laen.
6(17:5)
7Pel-tapel batessa dhaerana suku Manasye molae dhari Asyer ka Mikmetat e temorra Sikhem. Dhari jadhiya tapel bates buru toron ka lao’ sampe’ ka dhaerana kaom En-Tapuwah.
8Dhaera Tapuwah jareya andhi’na suku Manasye, tape kottha Tapuwah, se badha e batessa tana jareya, andhi’na toronanna Efraim.
9Saterrossa, tapel batessa dhaerana Manasye jareya toron sampe’ ka Songay Kana. Tha-kottha e lao’na songay jareya andhi’na Efraim, maske badha e dhalem baba kakobasa’anna Manasye. Tapel batessa baba kakobasa’anna Manasye jareya pas noro’ jalan e dhaja’anna songay jareya, sampe’ gan Tase’ Tengnga.
10Daddi Efraim badha e bagiyan lao’, ban Manasye e bagiyan dhaja, ban Tase’ Tengnga daddi batessa tanana se kadhuwa jareya e bagiyan bara’. E bara’ lao’, dhaerana suku Manasye jareya batessa acampo ban batessa dhaerana Asyer, ban e bagiyan temor lao’, acampo ban batessa dhaerana Isakhar.
11E dhalem dhaerana Isakhar ban Asyer jareya badha na-tana andhi’na Manasye, iya areya Bet-Seyan ban Yibleyam ban sa-disa e sabingkerra. Bariya keya Dor (kottha se badha e penggirra tase’), En-Dor, Ta’anakh, Megido ban sa-disa e sabingkerra.
12Tape suku Manasye ta’ bisa ngojuk oreng tha-kottha jareya; daddi oreng Kana’an gi’ paggun neng e jadhiya.
13La’-mala’ e budhi are saellana oreng Isra’il atamba kowat, reng-oreng Kana’an jareya kabbi ta’ eojuk; coma reng-oreng Kana’an jareya epaksa alako kaangguy kaparlowanna oreng Isra’il.
14Toronanna Yusup mator ka Yusak, "Aponapa suku abdina me’ namong eparenge tana settong bagiyan, mangkana suku abdina ce’ bannya’na, sabab eberkadi sareng PANGERAN?"
15Dhabuna Yusak, "Sarrena ba’na la talebat bannya’na ban tana pagunongan Efraim cope’ gallu sampe’ ta’ seddheng ekennengnge, ba’na kassa’ entar ka dhaerana oreng Feris ban Refa’im. Babat las-alassa gabay tamba’anna kennengngan."
16Toronanna Yusup jareya mator, "Tana pagunongan ka’issa’ ta’ cokop manabi egabaya kennengnganna suku abdina, mangkana bangsa Kana’an se ngennengnge na-tana maba gadhuwan ta-kareta perrang dhari besse, enggi paneka oreng Kana’an se ngennengnge Bet-Seyan sareng sa-disa e sabingkerra, jugan se ngennengnge Cora Yizre’el."
17Daddi Yusak adhabu ka suku Efraim ban Manasye bara’ jareya, "Bendher, ba’na talebat bannya’na ban kowat, patot eberri’i lebbi dhari settong bagiyan.
18La kala’ tana pagunongan, sabab maske tana jareya gi’ aropa alas, ba’na bisa ababat dhaera, ban jareya kabbi daddi andhi’na ba’na kabbi. Parkara reng-oreng Kana’an jarowa, la ojuk bai, maske bangsa jareya kowat ban andhi’ ta-kareta perrang dhari besse."
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel