1Saellana jareya Yusak adikane reng-oreng dhari suku Ruben, Gad ban sabagiyan dhari suku Manasye se e temorra Songay Yordan, pas adhabu kantha reya,
2"Ba’na la ngalakone sabarang se epakonnagi ka ba’na bi’ Mosa, abdina PANGERAN rowa. Ban ba’na la ngestowagi sakabbinna tang parenta keya.
3Sampe’ sateya tan-taretanna ba’na, reng-oreng Isra’il laenna, bi’ ba’na ta’ tao edina epaperrang dibi’. Ba’na padha ngestowagi kon-papakonna GUSTE Allahna kalaban gu-onggu.
4Daddi menorot janjina, tan-taretanna ba’na, reng-oreng Isra’il laenna, bi’ GUSTE Allahna ba’na eparenge kataremtemman. Daddi sateya kassa’ ba’na abali ka tanana dibi’ e temorra Songay Yordan se la eparengngagi Mosa ka ba’na.
5Kaenga’e, ya, toro’ hokom se epakonnagi Mosa ka ba’na, iya areya: Taresnae GUSTE Allahna, toro’ apa se daddi kasokanna, estowagi papakonna, paesto ka Salerana, ban ngabdi ka Salerana sampe’ ka dhalem ate ban sokmana."
6Saellana jareya Yusak mamangkat reng-oreng jareya ka tanana dibi’ sambi apareng berkadda ban apessen kantha reya, "Sateya ba’na la sogi ban abaliya ka bengkona ngeba ebin sabannya’na, bariya keya salaka, emmas, dimbaga, besse ban angguy. Rang-barang rampasanna ba’na gi-bagi keya ka reng-oreng laenna se sasuku ban ba’na." Daddi suku Ruben, Gad ban suku Manasye se e temorra Yordan jareya pas adina’agi oreng Isra’il laenna, laju mangkat dhari Silo e Kana’an ka tanana dibi’ e dhaera Gileyad. Reng-oreng jareya ngennengnge tana jareya menorot dhabuna PANGERAN se epanapa’ kalaban parantara’anna Mosa. (Saparona suku Manasye la narema dhari Mosa tana e temorra Songay Yordan, ban saparona narema dhari Yusak tana e bara’na Songay Yordan abareng ban ku-suku laenna.)
7(22:6)
8(22:6)
9(22:6)
10Sanapa’na ka Gelilot, iya areya settong kennengngan se gi’ badha e bara’na Songay Yordan, suku Ruben, Gad ban suku Manasye se e temorra Songay Yordan laju maddek mezba se raja ban ce’ bagussa e seddi’anna songay.
11Reng-oreng Isra’il laenna ngedhing reng-oreng sabangsana ngoca’ bariya, "Reng-oreng suku Ruben, Gad ban suku Manasye e temorra Yordan maddek mezba e seddi’anna Songay Yordan e tanana sengko’ ban ba’na!" Reng-oreng jareya laju padha akompol e Silo merrangana ku-suku Isra’il se e bagiyan temorra Songay Yordan jareya.
12(22:11)
13Ommat Isra’il jareya laju ngotos Pinehas, pottrana Imam Eleyazar, ka suku Ruben, Gad, ban suku Manasye se badha e dhaera Gileyad e temorra Yordan.
14Pinehas abareng ban pamimpinna bangsa Isra’il se bannya’na sapolo oreng, settong dhari saneyap suku e bara’na Songay Yordan, se padha daddi kapalana kalowarga e dhalem kaomma bang-sebang.
15Reng-oreng jareya pas napa’ ka kennengnganna suku Ruben, Gad ban suku Manasye e dhaera Gileyad.
16Saellana jareya, kalaban nyamana sakabbinna ommadda PANGERAN, reng-oreng jareya ngoca’ ka reng-oreng suku Ruben, Gad, ban suku Manasye, "Sampeyan me’ atengka juba’ sapaneka ka Allahna Isra’il? Sampeyan agabay mezba paneka kaangguy sampeyan dibi’; ganeka artena sampeyan ta’ atoro’ ka PANGERAN! Sampeyan ta’ ngestowagi papakonna pole!
17Ponapa sampeyan ta’ enga’ ka dusana ommat Isra’il e Peyor? E bakto ganeka ommat Isra’il eokom bi’ PANGERAN epadhatengnge wabah panyaket sanajjan oreng Isra’il ommadda dibi’! Sampe’ samangken sampeyan ban kaula gi’ padha nanggung ollena dusa ganeka. Ponapa ganeka gi’ ta’ cokop?
18Ban samangken ponapa sampeyan mongkorana PANGERAN pole? Mon samangken sampeyan ta’ ngestowagi dhabuna PANGERAN, lagguna PANGERAN tanto duka ka sakabbinna ommat Isra’il.
19Mon dhaerana sampeyan najjis ban ta’ pantes egabay kennengnganna abakte ka PANGERAN, ngalle bai ka ka’dhinto ka dhaerana PANGERAN, se badha Kemah Soccena. Menta sabagiyan dhari tanana oreng ka’iya, tape ja’ agabay mezba laen, mangkana e ka’iya ampon badha mezbana GUSTE Allahna sampeyan ban kaula; ganeka nyamana ta’ atoro’ ka kasokanna PANGERAN.
20Ponapa sampeyan ta’ enga’, Akhan ana’na Zerah se ta’ atoro’ ka kasokanna Pangeran parkara rang-barang se kodu epamosna, ban ponapa daddina? Reng-oreng Isra’il eokom kabbi! Se dusa pera’ Akhan, tape se mate banne pera’ Akhan malolo!"
21Reng-oreng suku Ruben, Gad ban Manasye e bagiyan temor jareya nyaot,
22"Se Mahakobasa PANGERAN! Se Mahakobasa PANGERAN! Salerana ngagali aponapa kaula me’ agabay mezba e ka’iya, ban sampeyan kodu oneng jugan! Mon kaula agabay mezba paneka amaksod alabana ka PANGERAN otabana polana ta’ parcaja ka Salerana, diggal kaula paneka me’ olle padha mate kabbi samangken keya!
23Mon kaula amaksod alabana ka PANGERAN ban agabay mezba kaula dibi’ e ka’iya paneka polana egabaya kennengnganna ngatorragi kurban obbaran otabana kurban gandum otabana kurban parsahabadan, diggal me’ olle PANGERAN dibi’ se ngokom kaula.
24Banne kantha ganeka maksodda kaula, tan-taretan! Kaula agabay mezba paneka polana kobater e budhi are toronanna sampeyan me’ pas ngoca’ cara paneka ka toronan kaula, ‘Ba’na ta’ andhi’ hubungan pa-apa bi’ PANGERAN, Allahna Isra’il!
25Songay Yordan reya bi’ PANGERAN epadaddi bates se malaen sengko’ dhari ba’na, reng-oreng Ruben ban Gad. Ongguwan, ba’na ta’ andhi’ hubungan pa-apa bi’ PANGERAN.’ Daddi toronan kaula tanto pas ambu se abakte ka PANGERAN polana toronanna sampeyan.
26Daddi kaula paneka agabay mezba paneka banne egabaya kennengnganna kurban obbaran otabana kaangguy panyaba’anna tor-ator,
27tape menangka tandha ka ra’yadda sampeyan ban ka ra’yat kaula, sarta ka toronanna sampeyan ban toronan kaula e budhi are, ja’ ra’yat kaula pajat lerres abakte ka PANGERAN e Kemah Soccena kalaban ngeba kurban obbaran, tor-ator ban kurban parsahabadan. Kalaban sapaneka toronanna sampeyan ta’ kera ngoca’ ja’ toronan kaula ta’ andhi’ hubungan sareng PANGERAN.
28Daddi maksod kaula sapaneka: saompamana toronanna sampeyan ngoca’ kantha ganeka, toronan kaula ngenneng ngoca’ sapaneka, ‘Abas, ra, mezba rowa! Tang bangatowa maddek mezba se padha ban mezbana PANGERAN, banne polana egabaya kennengnganna kurban obbaran otabana kennengnganna tor-ator, tape menangka tandha ka golonganna ba’na ban tang golongan.’
29Ampon, sampeyan paparcaja, suku kaula ta’ alabana ka PANGERAN otaba ambu ta’ abakteya pole ka Salerana kalaban maddek mezba laen kaangguy kurban obbaran otaba kurban gandum otaba kaangguy tor-ator, mangkana ampon badha mezbana GUSTE Allah e adha’anna Kemah Socce."
30Sabarang se eterrangngagi bi’ reng-oreng suku Ruben, Gad ban suku Manasye se e bagiyan temor jareya ekaedhing bi’ Imam Pinehas sarta pamimpinna masarakat Isra’il dhari bara’na Songay Yordan se bannya’na sapolo oreng jareya. Reng-oreng jareya senneng narema katerrangan jareya.
31Pinehas, pottrana Imam Eleyazar, laju adhabu ka reng-oreng suku Ruben, Gad ban Manasye Temor, "Samangken kaula oneng ja’ PANGERAN asarengnge sampeyan sareng kaula sadaja, sabab sampeyan ta’ alaban ka Salerana. Sampeyan masalamet ommat Isra’il dhari okomanna PANGERAN."
32Saellana jareya Pinehas ban para pamimpinna Isra’il laju padha mangkat dhari Gileyad adina’agi reng-oreng Ruben ban Gad se badha e jadhiya, terros abali ka Kana’an, pas notorragi parkara jareya ka ommat Isra’il.
33Ommat Isra’il arassa senneng, daddi pas padha asokkor ka Allah. Reng-oreng jareya ta’ acaca pole parkara neyadda se merrangana reng-oreng Ruben ban Gad sarta se mamosna’a nagarana.
34Suku Ruben ban Gad jareya ngoca’, "Mezba reya daddi sakse ka sengko’ ban ba’na kabbi ja’ PANGERAN reya Allah." Daddi mezba jareya pas enyamae "Sakse".
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel