Alkitab Mobile SABDA
[VER] : [MADURA]     [PL]  [PB] 
 <<  Yosua 5 >> 

1Sakabbinna rato Amori e bara’na Songay Yordan ban to-rato Kana’an e paseser Tase’ Tengnga padha meyarsa kabar ja’ Songay Yordan epakerreng bi’ PANGERAN e bakto ommat Isra’il alengka songay jareya. Daddi to-rato jareya padha katako’en ka ommat Isra’il jareya.

2E bakto jareya PANGERAN adhabu ka Yusak, "Kassa’ ba’na agabay ladding dhari bato; reng-oreng Isra’il pas sonnat, ngangguy opacara."

3Yusak alampa’agi dhabuna PANGERAN jareya, reng-oreng Isra’il esonnat e kennengngan se enyamae Gumo’ Panyonnadan.

4E bakto reng-oreng Isra’il kalowar dhari Messer, lalake’anna la padha esonnat kabbi. Tape saabidda reng-oreng jareya ajalan e ra-ara beddhi pa’ polo taon abidda, ana’ lalake’anna padha tadha’ se esonnada. Ban saellana bakto se pa’ polo taon jareya la lebat, lalake’an se e bakto mangkat dhari Messer omorra la patot ja’ maso’a tantara, la padha mate kabbi, polana ta’ atoro’ ka dhabuna PANGERAN. Daddi, noro’ sompana PANGERAN, reng-oreng jareya ta’ eedine nangale’e nagara se ma’mor ban landhu se ejanjiyagi PANGERAN ka bangatowana ommat jareya.

5(5:4)

6(5:4)

7Daddi jareya sababba arapa na’-kana’ lalake’anna gi’ padha ta’ esonnat. Angkadan jareya se esonnat bi’ Yusak.

8Samarena esonnat, reng-oreng padha neng e parkemahanna sampe’ lokana baras.

9Dhabuna PANGERAN ka Yusak, "Are teya kanespa’anna ba’na se odhi’ ekadunor oreng Messer la epatadha’ bi’ Sengko’." Jareya sababba arapa kennengngan jareya me’ enyamae Gilgal sampe’ sateya.

10Sabatara akemah e Gilgal, e tana lapang Yerikho, ommat Isra’il araya’agi Paska e tanggal pa’ bellas lem-malem bulan jareya.

11Kalagguwanna, ommat Isra’il arassa’agi dha’-adha’na ngakan kakanan hasella nagara Kana’an, iya areya: roti se ta’ eragi’i ban gandum panggang.

12E are jareya keya la tadha’ manna se gaggar dhari langnge’ pole. Molae are jareya ommat Isra’il ngakan hasella tana Kana’an.

13E settong bakto Yusak badha e seddi’na kottha Yerikho. O-tao laju ngoladi badha lalake’ kasorang manjeng e adha’anna sambi neggu’ peddhang se eonos. Yusak nyemma’e oreng jareya, laju atanya, "Sampeyan paneka kanca ponapa moso?"

14"Banne kanca ban banne moso," saodda oreng jareya. "Sengko’ reya panglimana tantarana PANGERAN." Meyarsa jareya Yusak pas asojud e ajunanna oreng buru. Atorra Yusak, "Abdidalem ka’dhinto abdiepon Pangeran. Epakona ponapa abdidalem ka’dhinto?"

15Panglimana tantarana PANGERAN jareya nyaot, "Bukka’ sapatuna ba’na jareya; tana kennengnganna ba’na manjeng jareya socce." Daddi Yusak mokka’ sapatuna.



 <<  Yosua 5 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel