1E bulan se kapeng ballu’ e taon se kapeng dhuwa’ pamarenta’anna Rato Darius e Persiya, PANGERAN adhabuwagi pessen reya ka sengko’, Nabbi Zakhariya ana’na Berekhya kompoyya Ido.
2PANGERAN ngotos sengko’ ngoca’ kantha reya ka ommadda, "E jaman lamba’ Sengko’, PANGERAN Se Mahakobasa, ce’ peggella ka bangatowana ba’na.
3Tape sateya Sengko’ ngoca’ ka ba’na: Mara abali ka Sengko’, dhaggi’ Sengko’ abaliya ka ba’na.
4Ja’ pakantha bangatowana. Lamba’ para nabbi manapa’ Tang sen-pessen ka bangatowana ba’na jareya sopaja padha’a ambu se alako jahat ban agabay dusa. Tape kabbi padha ta’ parduli ban ta’ endha’ atoro’ ka Sengko’.
5Badha e dhimma para bangatowana ba’na ban para nabbi jareya sateya? Kabbi la padha tadha’.
6Kalaban parantara’anna bi-nabbi, Tang abdi jareya, Sengko’ aberri’ ta-parenta ban parengeddan-parengeddan ka bangatowana ba’na. Tape tadha’ se ngedhingngagiya, daddi kabbi padha kodu nanggung okomanna. Saellana jareya reng-oreng jareya pas atobat ban ngakone ja’ Sengko’, PANGERAN Se Mahakobasa, la ngokom reng-oreng satembang ban kasala’anna, sarta menorot katantowan dhari Sengko’."
7E tanggal pa’ lekor bulan Syebat, iya reya e bulan sabellas, e taon se kapeng dhuwa’ pamarenta’anna Rato Darius, PANGERAN manapa’ pessenna ka sengko’. E dhalem settong pangaton e baja malem,
8sengko’ nangale’e malaekadda PANGERAN netene jaran mera. Malaekat jareya ambu e settong cora e antarana ka-bungkana murad. E budhiyanna manjeng ran-jaran laenna, badha se mera, se mera jambu ban se pote.
9Sengko’ atanya ka salerana, "Guste, ponapa arteepon sadajana jaran paneka?" Saodda, "Bi’ sengko’ eduduwagiya ka ba’na apa artena.
10Ran-jaran jareya ekerem PANGERAN epamareksa’a bume."
11Ran-jaran jareya areppot ka malaekat, "Abdidalem ampon mareksa epabalattra saantero bume, nyatana dunnya ka’dhinto aman sareng taremtem."
12Malaekat jareya adhabu, "PANGERAN Se Mahakobasa, pettong polo taon abittepon Junandalem duka ka Yerusalim sareng ka tha-kottha e Yehuda. Kantos bilaepon Junandalem teptebba duka sareng ta’ kasokan apareng sapora ka tha-kottha gapaneka?"
13PANGERAN nyaodi malaekat jareya bi’ dhadhabun se malepor ate,
14ban malaekat jareya ngotos sengko’ manapa’ apa se edhabuwagi PANGERAN Se Mahakobasa, "Sengko’ ce’ neserra ban talebat mekkere kottha Yerusalim, Tang kottha se socce.
15Tape Sengko’ ce’ peggella ka sa-bangsa se arassa aman ban taremtem. Sabab e bakto Sengko’ ngampet peggella Tang ate ka Tang ommat, sa-bangsa jareya nambai kasangsara’anna Tang ommat.
16Sateya Sengko’ abali ka Yerusalim aberri’a sapora ka kottha jareya. Tang Padalemman epaddegga pole ban kottha Yerusalim epabaliya akantha asalla."
17Malaekat jareya ngotos sengko’ manapa’agi pessen reya keya, "PANGERAN Se Mahakobasa ajanji ja’ tha-kotthana bakal ma’mora pole, ban ja’ PANGERAN sakaleyan aggi’ nolonga Yerusalim sarta bakal ngakone Yerusalim jareya menangka kaagunganna."
18E dhalem pangaton laen sengko’ nangale’e tandhu’na sape pa’-empa’.
19Sengko’ atanya ka malaekat se abu-dhabu ka sengko’ gella’, "Ponapa arteepon dhu’-tandhu’ ka’dhinto?" Saodda, "Dhu’-tandhu’ reya parsemmonna karaja’an-karaja’an se kowat se masalebbudan pandhudhu’ Yehuda, Isra’il ban Yerusalim."
20PANGERAN laju noduwagi ka sengko’ pandhi kaempa se ngeba tokol.
21Sengko’ atanya, "Aponapa’a reng-oreng ka’dhinto?" Dhabuna, "Matako’a ban magulu’a sa-bangsa se la maancor Yehuda ban masalebbudan pandhudhu’na."
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel