1Anjo wattua ana’ bura’nena Yerobeam niarenga Abia, tu’guru’ garringi.
2Nakanamo Yerobeam ri bainenna, "Sadia-sadiako untu’ a’lampa mange ri Silo ri balla’na Na’bi Ahia, angkanaya riolo la’jari karaenga’ ri Israel. Mingka ammakeang palusukko sollanna tena naassengko taua.
3Pangngerangngangi sampulo batunna roti, sike’de’ kanrejawa, siagang sibotolo’ je’ne’ bani. Pakkuta’nangngangi ri ia angkanaya apa lakajariang ri Abia, anatta. Lanapauangko anjo na’bia."
4Jari a’lampami bainenna Yerobeam mange ri balla’na Na’bi Ahia ri Silo. Anjo na’bia takkulleami accini’ lanri sanna’mi toana.
5Mingka nipauammi ri Batara angkanaya niaki bainenna Yerobeam labattu untu’ ampakkuta’nangngangi ana’na garringa. Siagang nipauang tommi ri Batara angkanaya apa musti lanakana sinampe’. Ri wattunna battu bainenna Yerobeam mange anjoreng, a’gio’-gio’ kammami tau maraeng.
6Mingka kamma nalangngere’na Na’bi Ahia sa’ra bangkenna ri pakke’buka, nakanamo, "Antamakko mae, kuassengi angkana bainennako Yerobeam. Tea’ mako assara-sarai. Nia’ kabara’ kodi untu’ ikau.
7Ammotere’ mako nanupauang Yerobeam angkanaya iaminne Napaua Batara, Allata’alana Israel, ‘Le’ba’ mako Kupile battu ri alla’na ra’yaka siagang Kupa’jariko tau koasa ri ummakKu Israel.
8Le’ba’ mako Kusare kakaraengang le’baka Kurampasa’ battu ri turunganna Daud. Mingka tena nusangkamma atangKu Daud. Ia tena tojeng pamminrana ri Nakke siagang mannuruki ri parentaKu. Ia bawang nagaukang apa Kusitujuia.
9Mingka ikau nugaukangi kaja’dallang la’bi lompoanganga naapa nagaukanga sikamma tau le’baka ammarenta rioloangnganna naikau. Ikau nubokoiA’ siagang nupabattui larroKu lanri apparekko patung-patung battu ri bulaeng untu’ nisomba.
10Lanri kammana anjo laKupabattui balaya mae ri kaluarganu. Yangasenna kaluarganu bura’nea, manna pole apa kadudukanna, lanibunoi. LaKupa’lanynyaki kaluarganu, sangkamma tau a’barrasaka loro sa’genna tangkasa’.
11Ia anggota kaluarganu matea ri kotaya lanikanrei ri kongkong, siagang ia matea ri pantarang kotaya lanikanrei ri jangang-jangang. U’rangi, iNakkemi Batara anne a’bicara!’"
12Nampa pole nakana Na’bi Ahia ri bainenna Yerobeam, "Jari ammotere’ mako kamma-kamma anne! Ri wattu antama’nu ri kotaya, lamatemi anjo ana’nu.
13Sikontu ra’ya’ Israel lasusa ngasengi nampa natarawang. Iaji bawang kale-kalenna anggota kaluargana Yerobeam lanitarawang baji’-baji’, nasaba’ iaji bawang nipangngellai ri atinNa Batara, Allata’alana Israel.
14Lanisarei Israel ri Batara sitau karaeng lampaccappukiai kadudukanna turunganna Yerobeam salaku karaeng. Narapi’mi allonna! Appakkaramula kamma-kamma anne
15laNahukkummi Batara tu Israel sa’genna sanrapang apa-apa ta’ronang-ronanga nianyukkang ri je’ne’. Lanipasuluki ra’ya’ Israel ri Batara battu anrinni ri anne pa’rasangang bajika ia le’baka nipassareang ri boe-boena ke’nanga. Lanipatassia’-siaraki ke’nanga anta’leanna Binanga Efrat, lanri napabattuna ke’nanga larroNa Batara, iamintu lanri appare’na ke’nanga patung-patung rewata baine Asyera.
16Lanibokoi Israel ri Batara lanri dorakanamo Yerobeam siagang a’jaria passabakkang nadoraka todong tu Israel."
17Le’baki anjo a’lampami bainenna Yerobeam mange ri Tirza. Ri wattu antama’na ri balla’na, matemi ana’na.
18Susami ra’ya’ Israel nampa natarawang sangkamma le’baka Napau Batara tete ri Na’bi Ahia, atanNa.
19Riwaya’ maraenga ri sesena Karaeng Yerobeam, iamintu pamarentahanna siagang sikamma pa’bundukang napimpinga, le’ba’mi nicata’ lalang ri kitta’ Riwaya’na sikamma karaeng Israel.
20Ruampulo anrua taung sallona ammarenta Yerobeam salaku karaeng, nampa mate na nitarawang. Ana’na niarenga Nadab ansambeangi a’jari karaeng.
21Ri wattunna Rehabeam, ana’na Salomo, a’jari Karaeng Yehuda, umuru’na patampulo asse’re taung. Sampuloi antuju taung sallona ammarenta ri Yerusalem. Battu ri sikontu Israel anjo kotaya Napa’jari tangkasa’mi Batara a’jari tampa’ passambayangang mae ri Ia. Amma’na Rehabeam iamintu Naama, battu bansa Amon.
22Ja’dala’mi apa nagaukanga bansa Yehuda ri dallekanNa Batara. Anjo panggaukanna ke’nanga la’bi-la’bimi napakanassuna Batara nasikontu apa le’baka nagaukang boe-boena ke’nanga.
23Irate ri bulu’-buluka siagang irawanganna poko’-poko’ kayu lompoa, ambangummi ke’nanga tampa’-tampa’ panynyombang mae ri barhalaya, siagang appaentemmi ke’nanga bangunang-bangunang kammayatompa patung-patung rewata baine Asyera untu’ nasomba ke’nanga.
24Anjoreng ri tampa’-tampaka appare’mi ke’nanga passundallang salaku panynyombang ri rewataya. Ba’lalo manna bura’nea a’jari tommi pasundala’. Sikamma panggaukang ra’masaka nagaukang ngasemmi tu Yehuda, sangkamma apa nagaukanga bansa-bansa maraeng le’baka Nabongka Batara ri wattunna napantamakki tu Israel anjo pa’rasanganga.
25Ri wattu taung makalima ri pamarentahanna Rehabeam, battumi Sisak iamintu karaeng Mesir ambunduki Yerusalem.
26Narampasaki sikontu barang-barang tinggia anggaranna ia niaka lalang ri Balla’Na Batara siagang ri balla’ kakaraenganga, kammayatompa pakkakasa’-pakkakasa’ bulaeng nasuro pareka Salomo.
27Untu’ a’jari sambenna appare’mi Karaeng Rehabeam pakkakasa’-pakkakasa’ kammaya anjo nampa napoterang antama’ ri kamara’ jagaya.
28Punna a’lampa karaenga mae ri Balla’Na Batara, tuli nierangi anjo sikamma pakkakasaka ri pangawala’-pangawalaka, nampa napoterang antama’ ri kamara’ jagaya.
29Riwaya’ maraengannaya ri sesena Karaeng Rehabeam, le’ba’mi nicata’ lalang ri kitta’ Riwaya’na sikamma karaeng Yehuda.
30Ri jammang pamarentahanna Rehabeam, tuli nia’ kajariang pa’bundukang iamintu Rehabeam siagang Yerobeam.
31Nampa matemo Rehabeam siagang nitarawang ri jera’na sikamma karaenga ri Kota Daud. Abiam, iamintu ana’ bura’nena, ansambeangi a’jari karaeng.
<< 1 Raja-raja 14 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel