1Ri se’reang wattu nakanamo Yonatan mae ri turungka paerang sanjatana, "Umba ki’lampa mange ri balla’ jagana tu Filistin niaka anjoreng ba’leang!" Mingka tena nappala’ kana mae ri manggena.
2Anjo wattua sitabangi Saul nia’ irawanganna poko’ kayu delima ri Migron, tena nabella battu ri Gibea. Ra’ya’ niaka amminawang ri ia kira-kira 600 tau jaina.
3(Imang angngeranga Efod iamintu Ahiya ana’na Ahitub, iamintu sari’battanna Ikabod ana’na Pinehas, siagang Pinehas ana’na Eli, imanNa Batara ri Silo.) Tena todong naassengi ra’yaka angkanaya a’lampami Yonatan battu anjoreng.
4Untu’ anrapi’ mange anjoreng ri balla’ jagaya, musti anjorengi ri alla’ moncong niepeka ri rua batu karang a’gari’gi ammalo Yonatan; anjo ruaya batu karang niarengi Bozes siagang Sene.
5Batu karang warakkanga a’dalle’ mangei ri Mikhmas, na batu karang timboranga a’dalle’ mangei ri Geba.
6Nakanamo Yonatan ri anjo turungkaya, "Umba kimange ri balla’ jagana anjo tu Filistin kapereka. Gassingka ero’ji Batara antulungki’. Nasaba’ akkullei Nasare Batara pammetang taua, baji’ napunna jai tau kammayatompa lalang sike’de’na tau."
7Appialimi anjo turungkaya angkana, "Manna apa ero’ kigaukang, amminawang turuki atanta."
8Nakanamo Yonatan, "Baji’mi. Punna a’limbangki’, lanipappicinikangi kalenta mae ri anjo tu Filistinga.
9Punna nasuroki’ ke’nanga ammantang siagang antayangi sa’genna battu ke’nanga mae ri katte, ammantang maki’ anjoreng bawang, siagang tea’ maki’ a’limbangi.
10Mingka punna nasuroki’ ke’nanga battu mae ri ke’nanga, la’lampaki’ mange anjoreng, nasaba’ iaminjo pammatei angkanaya Napassareangi Batara anjo ke’nanga mae ri katte."
11Ri wattunna napappicinikang kalenna ke’nanga mae ri tu Filistin ri anjo balla’ jagaya, nakanamo anjo tu Filistinga, "Ciniki, nia’ tu Ibrani assulu’ battu ri kali’bong paccokkoanna!"
12Nampa akkio’ ke’nanga mae ri Yonatan siagang atanna angkana, "Naikko mae sollanna napaccinikangko ikambe se’reang apa-apa!" Nakanamo Yonatan ri anjo turungkaya, "Pinawanga’, nasaba’ Napassareammi Batara anjo ke’nanga mae ri tu Israel."
13Akkadangkammi Yonatan nai’ nipinawang ri anjo turungkaya. Ri wattu ammumbana Yonatan, tu’guru’ tasse’re-se’remi anjo tu Filistinga nitunrung ri Yonatan, nampa amminawang ri bokona anjo turungkaya ambunoi ke’nanga.
14Lalang anjo a’bakka uru-uruna, kira-kira nia’ ruampulo tau nabuno Yonatan siagang anjo turungkaya, ri se’reang tampa’ kira-kira 2.500 metere’ pasagi luara’na.
15Passabakkang ia anjo kajarianga, gegere’mi tu Filistin ri kemana siagang ri sikamma paranga. Sikontu ra’ya’ Filistin kammaya niaka ri balla’-balla’ jagaya, siagang pa’rappungang paellaka a’jari malla’ ngasemmi; ba’lalo kamma ta’ge’goso’mi buttaya, siagang sanna’mi siricu-ricuinna ke’nanga.
16Lalanna anjo wattua, tantarana Saul niaka a’jaga ri Gibea ri daera Benyamin, nacini’mi tu Filistin piti lari-lari nipakamma ri kalinguang sanna’.
17Nakanamo Saul mae ri ana’ buana, "Rekengi sikontu tantaraya nampa nuparessa angkana inai tena." Nagaukammi ke’nanga anjo apa naparentakanga, nakaassengammo angkanaya Yonatan siagang turungka paerang sanjatana tena.
18Nakanamo Saul ri Imang Ahia, "Erangi anjo efodka mae anrinni." (Anjo alloa Ahia angngerangi anjo efodka ri dallekanna tu Israel.)
19Lalang a’bicarana Saul mae ri anjo imanga, pila’ katambammi karicuanga lalang ri kemana tu Filistin, sa’genna nakanamo Saul ri anjo imanga, "Tena kisawe appala’ pitunju’ battu ri Batara!"
20Nampa Saul siagang sikamma taunna appada-padami maju mange ri tampa’ pa’bundukanga. Anjoreng nacini’mi ke’nanga karicuanga ri tu Filistin; para iami ke’nanga a’bundu’ siagang sibuno-buno.
21Sikamma tu Ibrani niaka ammantang ri daerana tu Filistin, siagang amminawanga ri tantarana ke’nanga, a’gabung maemi ri Saul siagang Yonatan.
22Kammayatompa tu Israel accokkoa ri bulu’-buluka ri Efraim, allangngerekami angkanaya larimi tu Filistin, amminawang tommi a’gabung nampa nabunduki anjo tu Filistin.
23A’bundu’mi ke’nanga ri sikamma aganga sa’genna allalo ri Bet-Awen. Nipasalama’mi ri Batara tu Israel anjo alloa.
24Anjo alloa lamma ngasemmi kalenna tu Israel napakamma cipuru’, lanri le’baki assumpa Saul angkana, "Cilakai tau angnganrea manna apa-apa mamo anne alloa, punna tenapa nakubalasaki boli’-bolikku ri musungku." Lanri kammana anjo, manna sitau tena nia’ angnganre anjo alloa.
25Nampa battumo ke’nanga ri se’reang romang nanggappamo ke’nanga jai sikali bani.
26Mingka manna sitau tania’ angkanrei anjo bania, lanri mallaki nataba cilaka battu ri anjo sumpana Saul.
27Mingka Yonatan tanaassengai angkanaya le’baki manggena assumpa kamma anjo mae ri ra’yaka. Jari napajonjomi takkanna naeranga na napato’do’ antama’ ri anjo ru’mung bania, nampa naalle banina na nakanre. Tasalloai nabaji’mo pakkasia’na siagang gassimmi nasa’ring.
28Nampa nia’mo kalase’renna anjo tantaraya angkana ri ia, "Ikambe anne tena ngasemmo nikullei lanri cipurutta. Mingka le’ba’mi manggeta ansumpaki angkana ‘Cilakai tau angnganrea anne alloa.’"
29Appialimi Yonatan angkana, "Teai sipato’ ta’liwa’-liwa’na anjo panggaukanna manggeku mae ri bansata! Ciniki, kamma-kamma anne bella baji’na pakkasiakku ri le’bakkumo angnganre sike’de’ bani.
30Ebara’ angkana nipa’biangi angnganre ra’yaka anne alloa battu ri kanre le’baka narampasa’ battu ri musua, mattantu jaiangangi tu Filistin akkulle nibuno!"
31Anjo alloa nabetai tu Israel a’bundu’ tu Filistin le’ba’namo a’bundu’ ri sikamma aganga battu ri Mikhmas sa’genna ri Ayalon. Mingka le’baki anjo sanna’mi mangnganna ke’nanga,
32sa’genna a’rampasa’mi ke’nanga angngallei apa-apa nirampasaka battu ri musua. Angngallei ke’nanga gimbala’ siagang sapi nampa napolong anjoreng memang ri tampaka, nampa nakanre memang dagenna niaka ija cera’na.
33Na nipauammo Saul anjo kammaya, angkana, "Karaeng, dorakami ra’yaka mae ri Batara, lanri angnganrei dageng siagang cera’na." Ammarrammi Saul angkana, "Tau tena ngaseng pallangngere’nu! Anggulungko se’re batu lompo mae anrinni."
34Nampa nakana pole, "Bagemi kalennu ri alla’na ra’yaka siagang suroi ke’nanga angngerangi sapina siagang gimbala’na mae anrinni, sollanna nipolong irate ri anne batua na nikanre anrinni. Jari tenamo nangnganre dageng siagang cera’ ke’nanga, siagang tenamo nadoraka ke’nanga mae ri Batara." Anjo memang bangngia, sikontu ra’yaka massing angngerammi olo’-olo’ le’baka narampasa’ ke’nanga lalang bundu’ nampa napolong anjoreng.
35Nampa appaenteng Saul tampa’ pakkoro’bangngang untu’ Batara; iaminjo uru-uru tampa’ pakkoro’bangngang napaentenga.
36Nampa nakanamo Saul mae ri ana’ buana, "Umba nakimange ambunduki tu Filistin anne bangngia, nampa niella’ ke’nanga sa’genna bari’basa’ na nibuno ngaseng ke’nanga." Appialimi ke’nanga angkana, "Baji’mi nakigaukang apa kikanaya baji’ karaeng." Mingka nakana imanga, "Umba nakiappala’ rolong pitunju’ battu ri Allata’ala."
37Nampa akkuta’nammo Saul ri Allata’ala angkana, "Akkulleja’ mange ambunduki tu Filistin? Maka laKipassareanji ke’nanga ri limanna tu Israel?" Mingka anjo alloa tena Nappiali Allata’ala.
38Lanri kammana nakanamo Saul mae ri sikamma pamimping ra’yaka, "Mae ngasengko anrinni, nampa nuparessa ngaseng dosa apa le’ba’ nigaukang anne alloa.
39A’janjia’, lanri Batara attallasaka, ia le’baka assarei Israel pammetang, angkanaya tau salaya lanihukkung matei, manna pole ebara’ angkana Yonatan ana’ bura’neku." Mingka tena manna sitau barani appiali.
40Nampa nakanamo Saul mae ri sikontu Israel, "Ammenteng ngasengko ba’leang anrinni." Appialimi ke’nanga angkana, "Kigaukammi apa kikanaya baji’ karaeng."
41Appala’ doammi Saul angkana, "O Batara, Allata’alana Israel, angngapai naKitaeroka ampialia’ anne alloa? Appiali maKi’ Batara, battu lalang ri anne batu-batu matangkasaka. Punna anjo kasalanga niaki ri nakke yareka ri Yonatan, appiali maki’ siagang batu Urim, mingka punna anjo kasalanga niaki ri ummatTa Israel, appiali maki’ siagang batu Tumim." Appialimi Karaeng Allata’ala, na Yonatan siagang Saul najo’jo’. Lalang kammana anjo ma’nassami angkanaya tena nara’yaka sala.
42Nakanamo Saul, "O Batara, pattantumi, inakkeka yareka Yonatan." Nampa Yonatan nipattantu sala.
43Nampa nakanamo Saul mae ri Yonatan, "Apa le’ba’ nugaukang?" Appialimi Yonatan angkana, "Le’baka’ angnganre sike’de’ bani kuallea siagang cappa’ takkangku. Sadiama’ untu’ mate."
44Nakanamo Saul ri ia, "Tapporo Nahukkunga’ Allata’ala punna tena nihukkung mateko Yonatan!"
45Mingka nakanamo ra’yaka mae ri Saul, "Maka musti nihukkung matei Yonatan? Nampa ia angngerangi anne pammetang lompoa? Tena! A’janji ikambe lanri Batara attallasaka, angkanaya takkulleai tappela’ uu’na Yonatan manna silawara’. Nasaba’ lanri pannulunNa Batara, nanggappa pammetang anne alloa." Kammaminjo nanipasalama’mo Yonatan battu ri hukkungang matea lanri ra’yaka.
46Le’baki anjo ammotere’mi tu Filistin mange ri daera kalenna ke’nanga, lanri tenamo naniondangi pole ri Saul.
47A’jari karaennamo Saul ri Israel, a’bundu’mi ri kere-kere mae angngewai sikontu musunna Israel, iamintu tu Moab, tu Amon, siagang tu Edom, karaeng-karaeng pa’rasangang Zoba, kammayatompa tu Filistin. Manna kemae a’bundu’, tuli anggappai pammetang.
48A’bunduki siagang barani nampa nabeta tu Amalek, kammayatompa nalappassangi tu Israel battu ri kakoasanna paellaka.
49Ia ana’-ana’ bura’nena Saul iamintu: Yonatan, Yiswi, siagang Malkisua. Ana’ baine toana niarengi Merab, na makaruaya niarengi Mikhal.
50Bainenna niarengi Ahinoam, ana’na Ahimaas. Panglima tantarana iamintu Abner ana’na Ner, iamintu purinanna Saul.
51Kish manggena Saul, siagang Ner manggena Abner, iami ana’-ana’na Abiel.
52Lalang attallasa’na tuli a’bundu’ hebaki Saul angngewai tu Filistin. Lanri kammana, punna accini’ Saul tu kassa’ yareka tubarani, linta’mi naalle napa’jari anggota tantarana.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel