Alkitab Mobile SABDA
[VER] : [MAKASAR]     [PL]  [PB] 
 <<  1 Tawarikh 13 >> 

1A’bicarami Daud siagang sikontu perwira ammimpinga 1.000 tau jaina siagang perwira-perwira ammimpinga 100 tau jaina.

2Nakanamo mae ri yangasenna ke’nanga, "Punna situju ngasengko, siagang Nakellai Batara, Allata’alata, baji’mi nanissuro tau mange ri sikamma imanga siagang sikamma tu Lewia ri desa-desana ke’nanga, kammayatompa sikontu bansata maraenganga, nanikio’ ngaseng ke’nanga a’rappungang siagang ikatte anrinni.

3Nampa a’lampaki’ mange angngallei Patti ParjanjianNa Allata’ala, ia nibalang parekanga lalang ammarentana Karaeng Saul."

4Sikontu tu Israel niaka a’rappungang sannang ngasengi siagang situju ngasengi mae ri anjo pitunju’na Daud.

5Jari napa’rappungammi Daud sikontu ra’ya’ niaka ri sikontu pa’rasangang, appakkaramula ri pa’baeng-baenna Mesir bageang timboro’ sa’genna ri Agang Hamat ri bageang wara’, untu’ mange angngallei anjo Patti Parjanjianga battu ri Kiryat-Yearim nampa naerang mange ri Yerusalem.

6A’lampami Daud siagang ke’nanga mange ri kota Baala, iamintu Kiryat-Yearim, ri daera suku Yehuda, untu’ angngallei Patti ParjanjianNa Allata’ala. Anjo pattia niarengi "Batara makoasaya irateanna malaeka’ akka’nyika".

7Battuna ke’nanga mange ri Baala, naallemi ke’nanga anjo Patti Parjanjianga battu ri balla’na Abinadab, nampa napanai’ ri se’reang kareta beru. Uza siagang Ahyo anrurungangi anjo pattia,

8na Daud siagang sikontu bansa Israel a’joge’-joge’mi siagang akkelong-kelommi siagang lompo sumanga’, untu’ ampakala’biriki Allata’ala, narurungang kacapi, rebana simbala’, siagang tarompe’.

9Ri wattunna anrapi’ ke’nanga ri tampa’ panggilingang gandunna tu Kidon, tatto’romi anjo sapi-sapi angngerangai anjo pattia. Jari nata’gala’mi Uza anjo Patti Parjanjianga sollanna tena natu’guru’.

10Anjo wattua larromi Batara ri Uza, lanri anjo panggaukang kammaya nahinai Batara. Jari Nabunomi Uza anjoreng. Jari appakkaramula anjo wattua anjo tampaka niaremmi "Peres-Uza". Larromi Daud lanri Nabunoi Batara anjo Uza.

11(13:10)

12Mingka malla’ tongi Daud ri Allata’ala na nakana, "Kamma-kammanne antekammami lakkulle kuerang anjo Patti Parjanjianga?"

13Lanri kammana tanjariami naerang Daud anjo Pattia mange ri Yerusalem. Mingka naboli’mi ri balla’na Obed-Edom, tu Gat.

14Ammantammi anjoreng anjo pattia tallum bulang sallona. Na nibarakkakimo ri Batara kaluargana Obed-Edom siagang sikontu apa nakammaia.



 <<  1 Tawarikh 13 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel