1Ri taung makatuju ammarentana Yehu ri Israel, iami anjo wattua na’jari Karaeng Yoas ri Yehuda. Ammarentai 40 taung sallona ri Yerusalem. Amma’na niarengi Zibya, tau battu ri kota Bersyeba.
2Lanri pangngajara’na Yoyada, Yoas lalang sikontu tallasa’na nagaukangi apa appakasannanga ri pa’mai’Na Batara.
3Iaji bawang sayanna, lanri tenana naputtai tampa’ panynyombanga mae ri rewataya, sa’genna tuli assarena ra’yaka koro’bang siagang attunu dupa anjoreng ri tampaka.
4Ri se’reang allo nakioki Yoas sikamma imanga nampa nasuro ke’nanga amboliki doe’ nagappaya battu ri passare-passare nipassareanga ri Balla’Na Batara, baji’ doe’ pa’bayara’ nigaukanna koro’banga, kammayatompa doe’ battu ri passare rellana taua.
5Tunggala’ imanga musti massing natanggongi doe’ napassareanga sikamma tau nalayania. Anjo doeka lanipakei untu’ ampakabajiki sikamma kapanrakang niaka lalang ri Balla’Na Batara.
6Sa’genna ri taung makaruampulo antallu ri pamarentahanna Yoas, tena ijapa napakabajiki sikamma imanga kapanrakang niaka ri Balla’Na Batara.
7Lanri kammana anjo nakio’mi Yoas Imang Yoyada siagang sikamma imang-imang maraenga, nampa nakana, "Angngapa natena ngasempa nupakabajiki Balla’Na Batara? Appakkaramula anne alloa tena ngasemmo nanipa’biangko amboliki doe’ nutarimaya. Kabusu’na musti nupassareangi untu’ ampakabajiki Balla’Na Batara."
8Situju kabusu’mi imanga angkanaya talanapasse’reami doe’ battua ri ra’yaka, siagang tena tommo natanggongi pappakabajikianna Balla’Na Batara.
9Jari angngallemi Yoyada se’re patti-patti pammantangngang nampa naso’bolo’ irate ri pattongko’na, nampa napadongko’ ri ampi’na tampa’ pakkoro’bangnganga ri sa’ri kananna pakke’bu’ antamaya ri Balla’Na Batara. Sikontu doe’ nipassareanga ri Balla’Na Batara nipantamaki ri anjo pattia ri imang-imang tugasaka ri pakke’bu’ antamaya.
10Punna jaimo doe’ lalang ri anjo pattia, tuli battumi jurutulisi’na karaenga siagang Imang Lompoa anrekengi anjo doeka, nampa naroko’.
11Punna le’ba’mi nicata’ siapa jaina, nipassareammi anjo doeka mae ri sikamma pangawasa’ nisarea tugasa’ untu’ jamang pappakabajikanga ri Balla’Na Batara. Nampa nabayara’ pangawasaka sikamma tukang kayua siagang tukang bangunanga,
12tukang batua, kammayatompa tukang pa’ batua. Ammalli tongi anjo sikamma pangawasaka kayu siagang batu, kammayatompa naatoroki ke’nanga sikontu doe’ nipasuluka untu’ anjo pappakabajikanga.
13Mingka anjo doeka tena nipakei manna sike’de’ untu’ appare’ cangkiri’-cangkiri’ pera’, mangko’, tarompe’, pakkakasa’ kanjoli yareka pakkakasa’ maraengannaya battua ri bulaeng yareka pera’.
14Kabusu’na anjo doeka nipakei a’bayara’ tukang siagang nipaballi ri bahang-bahang bangunang niparalluanga.
15Sikamma anjo a’jaria pangawasa’ sanna’ kabusu’ lambusu’na, jari tenamo naparallu nipappalakki ke’nanga laporang ri passala’na doe’ le’baka napake ke’nanga.
16Doe’ battua ri koro’bang sambe karugiang siagang battu ri koro’bang pammopporo’ dosa tena nanipantamaki ri anjo pattia. Anjo doe’ kammaya nipassareangi mae ri imang-imanga.
17Anjo wattua Hazael iamintu karaeng Siria nabunduki siagang naempoimi kota Gat. Nampa ero’ tommo nabunduki kota Yerusalem.
18Jari akkirimmi Yoas mae ri ia doe’ sollanna tena nabunduki Yerusalem. Anjo doeka naallei battu ri sikontu doe’ le’baka napassareang kalenna Yoas riolo mae ri Batara, siagang nipassareanga ri Yosafat, Yoram kammayatompa Ahazia, iamintu karaeng ammarentaya rioloannaya na ia. Kammayatompa battu ri sikontu bulaeng niaka lalang ri pammolikanga lalang ri Balla’Na Batara siagang balla’ karaenga. Jari tenamo nanjari Hazael ambunduki Yerusalem.
19Nampa assikongkolo’mo pagawe-pagawena kakaraengang Yehuda angngewai Karaeng Yoas. Rua battu ri ke’nanga iamintu Yozakar ana’na Simeat, siagang Yozabad ana’na Somer, ambunoi Yoas ri se’reang balla’ nibangunga irate ri butta pannambungang rayanganna Yerusalem, ri oloang naunga ri Sila. Anjorengi ri pa’jerakkang karaeng-karaenga ri Kota Daud nitarawang Yoas. Nampa ana’na niarenga Amazia ansambeangi a’jari karaeng. Pau-pauanna maraengannaya ri passala’na Karaeng Yoas niaki nicata’ lalang ri kitta’"Riwaya’na Karaeng-karaeng ri Yehuda".
20(12:19)
21(12:19)
<< 2 Raja-raja 12 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel