1Ri taung makatallu ammarentana Karaeng Hosea, ana’na Ela ri Israel, anjo wattua Hizkia ana’na Ahas a’jari karaeng ri Yehuda.
2Anjo wattua 25 taung umuru’na siagang ammarentai ri Yerusalem 29 taung sallona. Amma’na niarengi Abia ana’na Zakharia.
3Nagaukangi Hizkia apa Nangaia Batara sangkamma nagaukanga Daud boe-boena.
4Naputtai tampa’-tampa’ panynyombanga mae ri rewataya, siagang naruntungi tembo’-tembo’ siagang patung-patung Dewi Asyera. Naancuru’ tongi ulara’ tambagaya bate pare’na Musa niarenga Nehustan. Nasaba’, sa’genna anjo wattua tuli attunu iji dupa tu Israel untu’ ampakalompoi anjo ulara’ tambagaya.
5Ri alla’na sikamma karaeng Yehuda, baji’ rioloangannaya kammayatompa ribokoanganna Hizkia, tenamo sangkammanna. Ia tappaki ri Batara, Allata’alana Israel,
6siagang majarreki mae ri Ia. Tena nale’ba’ angngewa ri Batara. Sikontu parentaNa Batara nipassareanga tete ri Musa, nituruki tojeng-tojengi ri Hizkia.
7Lanri kammanami anjo natuli nitulung ri Batara, sa’genna a’jari ngaseng sikontu usahana. Angngewai ri karaeng Asyur, siagang tena naero’ tundu’ mae ri ia.
8Nabetai tu Filistin, siagang naalleangi tampa’ pammantanganna ke’nanga, battu ri desa kaminang ca’dia sa’genna kota kaminang lompoa, kammayami Gaza siagang daera niaka ri tammulilina.
9Ri taung makaappa’ ammarentana Hizkia, iamintu ri taung makatuju ammarentana Karaeng Hosea ri Israel, battumi Salmaneser karaeng Asyur ambunduki siagang angkurungi Samaria.
10Ri wattunna narapi’mo tallun taung nikurung, tu’guru’mi Samaria. Ri taung makaannang ammarentana Hizkia siagang ri taung makasalapang ammarentana Hosea ri Israel nakajariang anjo passalaka.
11Nampa naengka’ karaeng Asyur tu Israel salaku tunitahang mange ri Asyur; sipa’gang battu ri ke’nanga nipamantangi ri kota Halah, sipa’gang ri ampi’na Binanga Habor ri daera Gozan, na sipa’gang pole ri kota-kota niaka ri pa’rasangang Madai.
12Tu’guruki Samaria lanri tena namannuruki tu Israel ri Batara, Allata’alana ke’nanga. Nasassali ke’nanga parjanjiang le’baka Napare’ Batara siagang ke’nanga, kammayatompa nadakkai sikontu parenta napabattua atanNa, Musa. Taerokai ke’nanga mappilangngeri siagang taerokai mannuruki.
13Lalang taung makasampulo angngappa’ ammarentana Hizkia ri Yehuda, nibundukimi kota-kota Yehuda niaka tembo’ pattahanganna sa’genna nibeta ri Sanherib karaeng Asyur.
14Jari akkirimmi Hizkia mange ri Sanherib niaka ri Lakhis, kabara’ kammaya anne, "Inakke salama’. Lanri kammana anjo, kupalaki ri katte poro kipamari lalomi ambunduki anne ikambe. Sikontu pappalatta lakuturukiangki’." Appialimi Hizkia angkanaya musti akkiringi Hizkia mae ri ia 10.000 kilogarang pera’, siagang 1.000 kilogarang bulaeng.
15Lanri kammana anjo, sikontu pera’ niaka lalang ri Balla’Na Batara siagang niaka lalang ri pammolikanga ri balla’ karaenga nakirimmi Hizkia mae ri Sanherib.
16Manna bulaeng niaka ri pakke’bu’-pakke’bu’ Balla’Na Batara siagang le’baka napataba kalenna Hizkia irateanna sikamma pakke’buka naalle kabusuki nampa nakiring todong mange ri Sanherib.
17Mingka anjo karaeng Asyur akkiringi battu ri Lakhis pasukang lompo untu’ ambunduki Yerusalem. Anjo pasukanga nipimpingi ri tallu perwira tinggia pangka’na, iamintu sitau panglima, sitau paurusu’ inungang, siagang sitau kapala pangawala’na karaenga. Ri wattunna battu ke’nanga mange anjoreng ri kotaya, angngallemi ke’nanga tampa’ ri kokoa, iamintu niarenga Koko Penatu ri ampi’na solongang a’lo’loroka battu ri balang bageang iratea.
18Nampa a’gora ke’nanga angkioki Karaeng Hizkia. Jari nia’mo tallu pagawena Hizkia assulu’ ambuntuli ke’nanga. Anjo tallua pagawe iamintu Elyakim ana’na Hilkia kapala ruma tanggana balla’ karaenga, Sebna jurutulisi’na pa’rasanganga, siagang Yoah ana’na Asaf jurutulisi’na balla’ karaenga.
19Kalase’renna anjo perwira tantarana Asyur angkana ri ke’nanga, "Pabattuangi Karaeng Hizkia anne kananna karaeng Asyur angkanaya, ‘Angngapa nanukana kalennu kassa’?
20Nukana kapang poro bicara bawang akkulle ansambeangi akkalaka siagang kakassakkanna tantaraya? Inai nupattoang sa’gennu barani angngewai Asyur.
21Memang nurannuangi bantuanna Mesir; mingka anjo panggaukang kammaya sanrapangko tau ammake poko’ rea a’jari takkang. Tepoki sallang anjo takkanga nampa nato’do’ limannu. Kammaminjo alarapanna karaeng Mesir mae ri tau manrannuanga mae ri ia.’"
22Nampa nasambungi bicaranna anjo perwirana tantara Asyur angkana, "Yareka nukana lamanrannuangko mae ri Batara, Allata’alanu? Ri wattunna naparentakang Hizkia sollanna tu Yehuda siagang tu Yerusalem poro ri dallekannaji bawang tampa’ pakkoro’bangnganga akkulle anynyomba, sai iatonji anjo tampa’ pakkoro’bangnganga siagang tampa’-tampa’ panynyombanga ri Batara naancuru’?
23Kamma-kamma anne lalang arenna karaeng Asyur barania’ ambotori angkanaya punna nisareko 2.000 kayu jarang, mattantu tenana taunnu sikamma anjo jaina untu’ ambaei anjo jaranga!
24Manna untu’ angngewayai perwira tantarana ikambe kaminang tunaya, tena todong nanukullei. Mingka kammaji manrannuannu angkanaya lakkiringi karaeng Mesir bantuang kareta pa’bundukang siagang pasukang a’jarang!
25Nukapangi angkanaya nabundukiko ikambe siagang nakibeta pa’rasangannu natanibantua ikambe ri Batara? KalenNa Batara ansuroi ikambe ambunduki siagang angngancuruki pa’rasangannu!"
26Nakanamo Elyakim, Sebna siagang Yoah ri anjo perwiraya, "A’bicaraki’ lalang bicara Aram karaeng, kakkulleji napahang ikambe. Teaki’ ammakei bicara Ibrani, gassingka napahangi ra’ya’ niaka irate anjoreng ri tembo’na kotaya."
27Appialimi anjo perwiraya angkana, "Apaka nukana untu’ ikauji bawang siagang karaennu nakunisuro ampabattui yangasenna anne? Tena! Nisuro tonga’ a’bicara mae ri ra’ya’ niaka ammempo irate ri anjo temboka lanuaganga angkanrei tai kalenna siagang angnginungi mea kalenna."
28Nampa ammenteng anjo perwiraya siagang a’gora lalang bicara Ibrani angkana, "Pilangngeri anne apa nakananga karaeng Asyur angkanaya,
29‘Teako eroki niballe-ballei ri Hizkia; tena nakkulle ampasalamakko.
30Teako pilangngeri panynyonyo’na untu’ manrannuang ri Batara. Teako kapangngi angkanaya laNapasalamakko Batara yareka laNarompai tantara Asyur untu’ angngallei kotanu.
31Teako pilangngeri Hizkia. Inakke, karaeng Asyur ansuroko sollannu assulu’ battu ri kotaya siagang nupassareang kalennu. Sinampe’ akkullei nukanre rappo anggoro’ battua ri koko kalennu, siagang nukasia’ rappo ara battua ri poko’ ara kalennu, kammayatompa angnginung je’ne’ battu ri bungung kalennu,
32sa’gennu kupalette’ mange ri se’reang pa’rasangang eroka sangkamma pa’rasangang kalennu. Anjoreng nia’ koko anggoro’ a’rappoa untu’ ikau, siagang koko gandung assarea wassele’ labu’ untu’ kanrenu. Anjoreng ri pa’rasanganga jai poko’ zaitun, minynya’ zaitun siagang je’ne’ bani. Punna nuturuki apa kupassuroanga mae ri kau, lattallasakko la’bu umuru’nu. Teako pilangngeri Hizkia! Poro ero’naji amballe-balleiko angkanaya laNapasalamakko Batara.
33Maka le’baki rewatana bansa maraenga ampasalamaki pa’rasanganna battu ri kakoasangku?
34Kemaeji rewata-rewatana pa’rasangang Hamat siagang Arpad? Kemaeji rewata-rewata Sefarwaim, Hena, siagang Iwa? Niakka battu ampasalamaki Samaria?
35Rewata kereanga le’ba’ allappassangi pa’rasanganna battu ri kakoasangku? Kemae lakkulle Batara ampasalamaki Yerusalem?’"
36Nalangngere’na anjo kana kammaya, tena nappiali pandudu’na Yerusalem, lanri le’ba’mi niparentakang ri Karaeng Hizkia sollanna a’mereki mamo ke’nanga.
37Jari nakekke’mi pakeanna Elyakim, Sebna siagang Yoah a’jari pammatei ri si’nana pa’mai’na, nampa a’lampa mange allaporoki mae ri karaenga anjo apa le’baka napau anjo perwirana tantara Asyur.
<< 2 Raja-raja 18 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel