1Ri wattu nalangngere’na Karaeng Hizkia laporanna anjo tau tallua, nakekke’mi pakeanna siagang ammakemi kaeng karung tanra si’nana pa’mai’na, nampa a’lampa mange ri Balla’Na Batara.
2Nampa nasuro Elyakim, kapala ruma tanggana balla’ karaenga, Sebna jurutulisi’na pa’rasanganga, siagang sikamma imang toayamo, untu’ a’lampa mange ri Na’bi Yesaya ana’na Amos. Ammake tommi ke’nanga kaeng karung.
3Iaminne pasanna Hizkia napabattua ke’nanga mae ri Yesaya, "Anne alloa natujua’ susa; nihukkungki’ siagang nitunaiki’. Rapangki’ baine eroka ammana’ mingka tenamo kagassinganta.
4Nia’mo sitau panglima tinggi pangka’na battu nasuro karaeng Asyur untu’ antunai Allata’ala mattallasaka. Inai angngassengi, gassingka Nalangngere’mi Karaeng Allata’alanu anjo kana-kana mappakatunaya mae ri KalenNa, siagang Nahukkung tau le’baka ampasuluki anjo kana kammaya. Lanri kammana anjo appala’ doang laloko mae ri Allata’ala untu’ taunta attallasaka ija."
5Le’ba’na natarima Yesaya anjo pasang battua ri Hizkia,
6nasuromi anjo sikamma tau nisuroa ampabattui pappialinna Yesaya angkana, "Nakana Batara, teaki’ mallakki allangngereki anjo kana-kana napabattua anjo ata-atanna karaeng Asyur angkanaya takkulleai Batara allappassangki’.
7Batara lampakamallaki anjo karaeng Asyur sollanna naparhatikang kabara’ anginga sa’genna ammotere’ mae ri pa’rasanganna, siagang anjorengi lanibuno."
8Anggappai kabara’ anjo panglimana tantara Asyur angkanaya a’lampami karaenna ambokoi Lakhis siagang sitabangi a’bundu’ sipa’baliang tau niaka ri kota Libna, tena nabella battu ri anjo tampaka. Jari a’lampami anjo perwiraya mange anjoreng untu’ assigappa anjo karaenna.
9Le’ba’mi anggappa karaeng Asyur kabara’ angkanaya nia’mi lalang pa’jappang pasukang Mesir nipimpinga ri Tirhaka karaeng Sudan untu’ battu ambunduki ke’nanga. Lanri kammana anjo, akkirimmi karaeng Asyur sura’ mange ri Hizkia karaeng Yehuda.
10Kammami anne bonena anjo suraka, "Teako eroki niballe-ballei ri anjo janjinNa Allata’alanu iamintu nupattoanga angkanaya tena nulatu’guru’ antama ri limangku.
11Le’ba’mi nulangngere’ angkanaya sikontu pa’rasangang le’baka nabunduki karaeng-karaeng Asyur, niancuru’ tabasikali kabusuki. Teako kapangngi angkanaya lakkulleko ta’lappasa!
12Ri wattunna naancuru’ boe-boeku iamintu kota Gozan, Haran, siagang Rezef, kammayatompa nabuno tu Eden niaka ammantang ri Telasar, tena manna se’re battu ri rewata-rewatana ke’nanga akkulle ampasalamaki ke’nanga.
13Kemaeji karaeng-karaenna kota Hamat, Arpad, Sefarwaim, Hena, siagang Iwa?"
14Natarimai Hizkia anjo suraka battu ri sikamma anjo tunisuroa, nampa nabaca. Nampa a’lampa mange ri Balla’Na Batara, siagang napaka’rang anjo suraka ri dallekanNa Batara,
15nampa appala’ doang angkana, "O Batara, Allata’alana tu Israel, niaka ri empoang kala’biranNa irate ri patunna malaeka’ akka’nyika, tena ruanTa Allata’ala makoasaya mae ri sikontu kakaraenganga ri tompo’na buttaya. IKattemi ampa’jari langika siagang buttaya.
16O Batara, Kiparhatikang laloi apa kajarianga mae ri kambe kamma-kamma anne. Kipilangngeri anjo sikontu kana-kana appakatunana Sanherib mae ri Katte, Allata’ala mattallasaka!
17Naasseng ngasengi ikambe, o Batara, angkanaya anjo karaeng-karaeng Asyur jaimi bansa siagang pa’rasangang naancuru’.
18Manna rewata-rewatana ke’nanga natunu tongi siagang naancuruki, lanri anjo rewata-rewata kammaya tena sikali kakoasanna. Anjo ke’nanga poro patung kayuji siagang batuji, iamintu bate pare’na rupataua.
19O Batara, Allata’alana ikambe, Kilappassang laloi ikambe battu ri anjo tu Asyur, sollanna akkulle naasseng sikontu bansaya ri lino angkanaya iKatteji bawang Allata’ala."
20Nampa akkiring pasang Na’bi Yesaya mae ri Karaeng Hizkia angkanaya salaku pappiali mae ri pappala’ doanna karaenga,
21Nakana Batara, "Nakakkaliko siagang nacau-cauko kota Yerusalem, Sanherib.
22Maka nuassenji angkanaya inai anjo nupakkana-kanai siagang nupakatuna? INakke, Allata’alana tu Israel, Allata’ala matangkasaka! Teai sipato’ tampona panggaukannu mae ri Nakke.
23Akkiringko tau untu’ a’bicara tena bua’-bua’na angkanaya lanri jaina kareta bundu’nu nakkulle nubeta moncong-moncong kaminang tinggia ri Libanon. Nupattampo-tampoangi angkanaya nuta’bangi poko’-poko’ camara kaminang tinggina siagang kaminang ga’gana kammayatompa nupantamakki romang-romang kaminang lompona.
24Nupattampo-tampoang tongi angkanaya angngekeko bungung nanuinung je’ne’na ri pa’rasangang-pa’rasangang maraenga, kammayatompa angkanaya naonjo’-onjokangi tantaranu anjo Binanga Nil sa’genna a’jari kalotoro’.
25Tenapaka nale’ba’ nulangngere’ angkanaya yangasenna anjo kajariang kammaya iNakke le’ba’ anrancanakangi battu riolo memang? Nampa kamma-kamma anne iNakke anggaukangi. INakkemi assareko koasa untu’ angngancuruki kota-kota niaka pattahanganna sa’genna a’jari kamma loro.
26Sikamma tau ammantanga anjoreng tena kullena; ta’bangkai siagang mallaki ke’nanga. Rapangi ke’nanga ruku’ niaka ri paranga yareka ruku’ attimboa rate ri pattongko’na ballaka, a’jari kalotoroka punna niiri’ ri anging bambang battu raya.
27Mingka Kuassengi sikontu katallassannu. Kuassengi apa nugaukanga siagang kemae-kemae lampanu.
28Kuassengi angkanaya larro sikaliko mae ri Nakke, siagang Kulangngere’ tommi anjo kana-kana tamponu. Kamma-kamma anne Kusareimi pakkai’ ka’murunnu siagang Kupitabaimi sa’mang bawanu, sollannu akkulle Kurenreng ammotere’ battu ri oloang nuoloa ri wattunnu battu."
29Akkiring tongi Na’bi Yesaya pasang kammaya anne mae ri Hizkia, "Iaminne la’jari pammatei mae ri kau. Anne taunga siagang taung ri dallekanga langnganrei taua gandung attimbo kale-kalea. Mingka punna le’baki anjo akkullei taua a’lamung gandung siagang anggoro’ kammayatompa nakasiaki wassele’na.
30Lacoppongi katallassanna tu Yehuda niaka ija attallasa’ rapang lamung-lamung lantang dudua aka’na na’rappo jai.
31Lania’ tau salama’ ri Yerusalem siagang irate ri Bulu’ Sion, lanri le’ba’namo Napattantu Batara angkanaya lakajariangi anjo kammaya.
32Iaminne Napaua Batara ri passala’na karaeng Asyur: ‘Tena nalanapantamakki Yerusalem yareka tena nalanapabuccu’ panana mange anjoreng ri kotaya. Tena tantara angngeranga sanjata la’reppese’ mae ri anjo kotaya, siagang tena nalanibangung tembo’ pakkurung ri tammulilina.
33Lammotereki karaeng Asyur rioloang naoloa ri wattunna battu, natena napantamakki anjo kotaya. INakke, Batara anne akkana kamma.
34LaKualleangi siagang laKula’langi kota Yerusalem lanri kala’birangKu siagang lanri parjanjiangKu siagang atangKu Daud.’"
35Ia memang anjo bangngia nabattumo Malaeka’Na Batara ri pakkemaanna tu Asyur siagang nabuno tantarana nia’ 185.000 jaina. Ammukona bari’basa’ tassimbungi mange-mange maya’na ke’nanga.
36Jari ammunduru’mi Sanherib karaeng Asyur nampa ammotere’ mange ri Niniwe.
37Ri se’reang allo, sitabanna anynyomba lalang ri balla’ panynyombanga ri Rewata Nisrokh, nibunomi siagang pa’dang ri Adramelekh siagang Sarezer ana’-ana’ bura’nena tonji. Le’baki anjo larimi ke’nanga mange ri pa’rasangang Ararat. Jari ana’ bura’nena maraenga iamintu niarenga Esarhadon ansambeangi a’jari karaeng.
<< 2 Raja-raja 19 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel