Alkitab Mobile SABDA
[VER] : [MAKASAR]     [PL]  [PB] 
 <<  2 Raja-raja 21 >> 

1Wattunna a’jari karaeng Manasye ri Yehuda nampai 12 taung umuru’na, siagang ammarentai ri Yerusalem 55 taung sallona. Amma’na niarengi Hefzibah.

2Dorakai Manasye ri Batara, lanri naturuki kabiasang ja’dala’na bansa-bansa nabongkaya Batara battu ri Kanaan ri wattu napantamakkinna tu Israel anjo pa’rasanganga.

3Tampa’-tampa’ panynyombanga mae ri rewataya iamintu le’baka naputta Hizkia manggena, nabangungi ammotere’. Ambangungi tampa’-tampa’ pakkoro’bangngang untu’ anynyomba mae ri Baal, kammayatompa appareki patung Dewi Asyera, sangkamma todong nagaukang Ahab karaeng Israel. Anynyomba tongi Manasye mae ri bintoeng-bintoenga.

4Le’ba’mi Napau Batara angkanaya anjo Yerusalem tampa’ kahaderanNa siagang tampa’ panynyombang mae ri KalenNa; mingka anjoremmi, iamintu ri Balla’Na Batara le’ba’ Manasye ambangung tampa’-tampa’ pakkoro’bangngang untu’ rewata-rewataya.

5Ri anjo ruaya paranglakkenna Balla’Na Batara nabangungi Manasye tampa’-tampa’ pakkoro’bangngang untu’ anynyomba mae ri bintoeng-bintoenga.

6Ana’ kalenna napassareang a’jari koro’bang nitunu. Nagaukang tongi Manasye gau’-gau’ sanroa, a’jari paciniki, ammakei pangngissengang, siagang appalaki pangngunju’ mae ri roh-roh tanicinika. Sanna’ dorakana mae ri Batara sa’genna napanai’mo larroNa Batara.

7Gambara’na Dewi Asyera naboliki lalang ri Balla’Na Batara, padahala’ ri passala’na anjo tampaka le’ba’mi Napau Batara mae ri Daud siagang ana’na iamintu Salomo angkana, "Anne BallakKu siagang anne kota Yerusalem, le’ba’mi Kupile battu ri alla’na daera sampuloa anrua suku Israel, iamintu tampa’ le’baka Kupattantu a’jari tampa’ panynyombang mae ri KalengKu.

8Na punna naturuki umma’ Israel sikontu parentaKu siagang hukkung-hukkung napassareanga Musa atangKu mae ri ke’nanga, tena nalaKulappassang ke’nanga nibongka battu ri pa’rasangang le’baka Kupassareang mae ri boe-boena ke’nanga."

9Mingka tu Yehuda tena namannuruki ri Batara, na ba’lalo Manasye angngerangi ke’nanga mae ri gau’-gau’ dosa la’bi ja’dalaka na dosa nagaukang bansa-bansa nibongkaya ri Batara battu ri Kanaan ri wattunna napantamakki umma’ Israel anjo pa’rasanganga.

10Lanri kammana anjo, tete ri sikamma na’bia, ata-atanNa Batara, Nakanamo Batara,

11"Karaeng Manasye teai sipato’ ja’dala’na. Bella la’bi ja’dala’na panggaukanna na panggaukanna tu Kanaan. Lanri barhala-barhala napareka nanaerang tu Yehuda mange ri gau’ dosaya.

12Lanri kammana anjo, Karaeng Allata’ala nisombaya ri tu Israel, lappabattui bala sannaka lompona mae ri Yerusalem siagang tu Yehuda sa’genna sikamma tau allangngerekai anjo apa kajarianga lata’bangka kabusuki.

13LaKuhukkungi Yerusalem sangkamma batena Kuhukkung Samaria siagang Ahab karaeng Israel kammayatompa jari-jarina. LaKubarrasaki sa’genna tangkasa’ sanrapang panne le’baka nibissai nampa nipatinompang.

14Pandudu’na nia’ tassesa laKubalang parekangi nibeta ri musunna ia langngalleai siagang langngellakai pa’rasanganna ke’nanga.

15Yangasenna anjo sikammaya laKugaukangi mae ri UmmakKu lanri dorakai ke’nanga mae ri Nakke siagang napanaiki larroKu appakkaramula battu ri assulu’na boe-boena ke’nanga battu ri butta Mesir sa’genna anne alloa."

16Pantaranganna a’gau’ dosana tu Yehuda mae ri Batara lanri anynyombana barhala, Manasye sanna’ todong jaina tau tena salana nabuno sa’genna tassolommo ceraka ri kere-keremae ri Yerusalem.

17Pau-pau maraengannaya ri passala’na karaeng Manasye siagang dosa-dosa nagaukanga, niaki nicata’ lalang ri kitta’"Riwaya’na sikamma karaeng Yehuda."

18Matemi siagang nitarawammi Manasye ri koko balla’ karaenga, iamintu koko Uza. Nampa ana’ bura’nena niarenga Amon ansambeangi a’jari karaeng.

19Umuru’na Amon ri wattunna a’jari karaeng Yehuda iamintu 22 taung siagang ammarentai 2 taung sallona ri Yerusalem. Amma’na niarengi Mesulemet ana’na Harus, tu Yotba.

20Sangkamma todong manggena, doraka tongi mae ri Batara.

21Naturuki sikamma panggaukanna manggena, siagang anynyombai ri barhala-barhala nasombaya manggena.

22Tena nattallasa’ situru’ ero’Na Batara, ba’lalo nabokoi Batara, Allata’ala nisombaya ri boe-boena.

23Assikongkoloki pagawe-pagawena karaeng Amon angngewa ri ia siagang nibunomi ri balla’ karaenga.

24Mingka nibunoi ri ra’ya’ Yehuda anjo sikamma tau ambunoai karaeng Amon, nampa ana’na Amon niarenga Yosia naangka’ ke’nanga a’jari karaeng.

25Pau-pau maraengannaya ri passala’na Amon niaki nicata’ lalang ri kitta’"Riwaya’na sikamma karaeng Yehuda."

26Nitarawangi Amon ri pa’jerakkang niaka ri koko Uza. Nampa Yosia ana’na ansambeangi a’jari karaeng.



 <<  2 Raja-raja 21 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel