Alkitab Mobile SABDA
[VER] : [MAKASAR]     [PL]  [PB] 
 <<  2 Samuel 9 >> 

1Ri se’reang allo akkuta’nangi Daud angkana, "Nia’ ija bijanna Saul attallasa’? Punna nia’ erokka’ a’gau’ baji’ mae ri ia lanri Yonatan."

2Kaluargana Saul nia’ atanna niareng Ziba. Nisuroi andallekang ri Karaeng Daud. Akkuta’nammi karaenga angkana, "Ikauka antu Ziba?" Appialimi angkana, "Iye’ karaeng."

3Nampa akkuta’nang karaenga angkana, "Nia’ ijaka attallasa’ battu ri kaluargana Saul? Erokka’ a’gau’ baji’ mae ri ia, sangkamma le’baka kupa’janjiang mae ri Allata’ala." Appialimi Ziba angkana, "Nia’ ija sitau ana’ bura’nena Yonatan. Attempangi."

4Akkuta’nammi karaenga angkana, "Kemaei?" Appialimi Ziba angkana, "Ri Lodebar, ri balla’na Makhir ana’na Amiel."

5Nampa nasuro kio’mo Daud anjo ana’ bura’nena Yonatan.

6Anjo ana’ bura’nena Yonatan niarengi Mefiboset. Ri wattunna battu, su’ju’mi ampakalompoi Daud. Nipattaumi ri Daud angkana, "Mefiboset". Nappialimo angkana, "Iye’ karaeng."

7Angkanami Daud, "Teako mallakki. Lalammoro’ pa’maika’ mae ri kau lanri Yonatan manggenu. Sikontu buttana toanu iamintu Saul, lakupoterangi mae ri kau siagang akkulleko angnganre ri balla’ kakaraenganga satunggu-tungguna."

8Su’ju’mi pole Mefiboset siagang nakana, "Apa todong anggaranna anne atanta! Angngapa kibajikkamma mae ri atanta anne karaeng?"

9Nampa nakio’mo karaenga Ziba iamintu atanna Saul, na nakana, "Sikontu apa nabokoia Saul siagang kaluargana kupassareangi mae ri anne cucunna karaennu.

10Ikau siagang sikamma ana’nu kammayatompa pambantunu musti najamai anjo buttaya untu’ kaluargana karaennu Saul, siagang sareangi anjo wassele’na ke’nanga untu’ ampa’gannaki kaparalluanna ke’nanga. Mingka Mefiboset akkullei angnganre satunggu-tungguna ri balla’ kakaraenganga." (Ziba nia’ ana’na 15 tau bura’ne siagang 20 jaina atanna.)

11Appialimi Ziba ri karaenga angkana, "Sikontu parentata karaeng lanagaukangi atanta." Jari sipangnganreammi Mefiboset siagang karaenga, sangkamma ana’ bura’ne kalenna Karaeng Daud.

12Nia’ ana’ bura’nena Mefiboset niareng Mikha. Sikontu anggota kaluargana Ziba a’jari kabusuki atanna Mefiboset.

13Kammaminjo nammantammo Mefiboset panra’ rua-ruaya bangkenna ri Yerusalem siagang tuli angnganrena ri balla’ kakaraenganga.



 <<  2 Samuel 9 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran