1Ri se’reang bangngi, ruan taung ammarentana Karaeng Nebukadnezar, asso’nami. Anjo so’nana sanna’ napakalussa’na nyawana, sa’genna takkullea tinro napakamma.
2Lanri kammana anjo nakio’mi sikamma pacinika, sanro cara’deka, sanro-sanro maraenganga siagang sikamma tau niaka pangngassenganna, untu’ ampakasingaraki battuanna anjo so’naya.
3Ri wattunna ammenteng ke’nanga ri dallekanna karaenga, nakanamo karaenga, "Le’bakka’ asso’na, na sanna’ lussa’na nyawaku lanri erokka’ angngassengi battuanna!"
4Appialimi ke’nanga lalang bicara Aram angkana, "La’bui umurutta satunggu-tungguna karaeng! Kicaritami anjo so’nata mae ri kambe, nampa napakasingara’ ikambe battuanna."
5Appialimi karaenga angkana, "Le’baki kutappuki kamma anne: Musti nupauanga’ angkanaya apa anjo so’naku kammayatompa musti nupauang tonga’ angkana apa battuanna. Punna tanukullea, lanikere’-kere’ kabusukko kammayatompa balla’nu lanirumbang tongi.
6Mingka punna nukulleji, lakusareko hadia ga’ga-ga’ga siagang kalompoang. Jari kamma-kamma anne pauamma’ anjo so’naku siagang apa battuanna!"
7Appialimi pole ke’nanga angkana, "Kipauammi rolo ikambe anjo so’nata karaeng, le’bappi anjo nampa napakasingara’ ikambe battuanna."
8Nalangngere’na anjo appialimi karaenga angkana, "Coco’ sikali pakkapangku. Poro nupakala’bu-la’bunaji bawang caritaya, lanri nuassenna angkanaya
9lakuhukkung kabusu’ kamma tongko punna tena nukkulle ampauanga’ anjo so’naku. Assikongkolo’ kabusukko untu’ tulusu’ amballe-balleia’ siagang ampakarek-karenanga’ lanri nurannuanna angkanaya lakupinrai kaputusangku. Jari, pauamma’ anjo so’naku, nampa kuassemmo angkanaya akkulle tongko ampakasingaraki battuanna."
10Nakana ngasemmo anjo tucara’deka, "Ri sikontu linoa tena manna sitau akkulle ampauangki’ anjo apa kikaerokia karaeng. Siagang tale’bakai nia’ se’re karaeng, manna pole antekamma lompona siagang la’biri’na, antuntuki anjo apa kammaya mae ri pacinika, sanro cara’deka, kammayatompa sikamma tau tinggia pangngassenganna ri balla’ karaenga.
11Sukkara’ dudui apa kikaerokia karaeng. Tena manna sitau akkulle anggaukangi pantaranganna sikamma rewataya, mingka tenai ke’nanga ammantang ri alla’na rupataua."
12Nalangngere’na anjo kammaya teaimi sipato’ larrona karaenga; naparentakammi sollanna nibuno kabusu’ sikontu tau cara’de’ niaka ri Babel.
13Nampa nipa’la’bammo nipabattu anjo parentaya; niboya kabusu’mi sikontu tau cara’deka, kammayatompa Daniel siagang agang-aganna untu’ nibuno.
14Jari mangemi Daniel ri Ariokh, iamintu komandang pangawala’na karaenga, ia tajaiamo ero’ anggaukangi anjo hukkungang matea.
15Tutu dudumi Daniel akkuta’nang ri ia angkana angngapa nappasulu’ karaenga parenta kammaya anjo terasa’na. Napaumi Ariokh mae ri Daniel apa le’baka kajariang.
16Mangemi linta’ Daniel andallekang ri karaenga siagang appala’ wattu untu’ ampakasingaraki battuanna anjo so’naya.
17Niturukiammi pappala’na; nampa ammotere’mo Daniel ri balla’ siagang napau ngasemmi anjo passalaka mae ri Hananya, Misael siagang pole Azarya.
18Nasuromi ke’nanga appala’ doang mae ri Allata’ala ri suruga sollanna mangngamaseang mae ri ke’nanga na Nasungke rahasiana anjo so’naya. Lanri kammana anjo tenamo nanihukkung matei ke’nanga siagang kabusu’ sikamma tau cara’de’ maraenganga.
19Anjo memang bangngia Napaumi Allata’ala rahasiana anjo so’naya mae ri Daniel lalang se’re paccini’. Jari mammujimi Daniel mae ri Allata’ala niaka ri suruga,
20nakana, "Anjo Allata’ala cara’deki na pore, nipujimi arenNa satunggu-tungguna!
21Iami ampattantui wattua siagang jammanga, Ia antu’gurangi siagang allantiki pamarentaya. Ia todong assarei kacara’dekang, siagang assarei pammahang.
22Ia assungkei rahasia kaminang lantanga. Naassengi sikontu apa kajarianga lalang ri sassanga. Nikalimbuki ri caya singaraka.
23O, Allata’ala napakalompoa boe-boeku, iKattemi kupuji siagang kupakala’biri’. Nasaba’ Kisarea’ kacara’dekang siagang kagassingang. Kiturukianga’ pappalakku. Siagang Kipicinikiamma’ pappialia mae ri karaenga."
24Le’baki anjo a’lampami Daniel mange ri Ariokh nisarea tugasa’ untu’ ambunoi sikamma tau cara’deka ri Babel. Nakana Daniel ri ia, "Teaki’ bunoi anjo sikamma tau cara’deka. Eranga’ mange andallekang ri karaenga, nasaba’ erokka’ ampauangi karaenga angkanaya apa battuanna anjo so’nana."
25A’lampami linta’ Ariokh angngerangi Daniel mange andallekang ri Karaeng Nebukadnezar nampa nakana, "Nia’mo nagappa atanta ri alla’na tu Yahudi nipelaka sitau akkullea ampauangki’ battuanna anjo so’nata karaeng."
26Jari nakanamo karaenga ri Daniel iamintu niarenga todong Beltsazar, "Akkulleko ampauanga’ angkana apa anjo so’naku siagang apa battuanna?"
27Appialimi Daniel angkana, "O Karaeng, tena tau niaka pangngassenganna, sanro cara’de’, pacini’ yareka tucara’deka accini’ bintoeng akkulle ampauangki’ anjo passalaka, karaeng.
28Mingka ri suruga, nia’ Allata’ala akkulle ansungkei sikontu rahasiaya, siagang Iami le’ba’ ampauangki’ karaeng apa lakajarianga ri allo ri boko. Kamma-kamma anne, boli’mi kamma nanapakasingara’ atanta angkana apa so’nata siagang kicini’ ilalang tinrota karaeng.
29Ri wattunta attinro karaeng, asso’naki’ ri passala’na jammang labattua sallang. Nasungkei Allata’ala mae ri katte karaeng, iamintu sikontu rahasiana apa lakajarianga.
30Anne rahasiaya le’ba’mi nipakasingara’ mae ri atanta mingka teai lanri anne atanta la’bi cara’dekangngangi natau maraenga, passangalinna akkulle kiasseng battuanna anjo so’nata karaeng, siagang niasseng todong bone atinta karaeng.
31Iaminne anjo apa kicinika karaeng: Ri dallekanna karaengku nia’ se’re patung! Anjo patunga teai sipato’ lompona, siagang accilla’-cillaki mingka sanna’ appakamalla’na tanja’na.
32Ulunna iamintu bulaeng ti’no’ nipare’, barambanna siagang paling-palinna battu ri pera’, aya’na siagang pungku’na battu ri tambaga,
33bongganna battu ri bassi nampa bangkenna bassi sipa’gang na sipa’gang pole battu ri butta pi’.
34Ri wattunna kiciniki anjo patunga karaeng, nia’mo se’re batu lompo ta’lappasa’ battu ri ta’binga, natena tau anseroi, nampa natuju bangkenna anjo patunga ia bassia siagang butta pika, sa’genna ancuru’.
35Rumbang silalonnami anjo patunga nampa a’jari tambungang bassi, butta pi’, tambaga, pera’, siagang bulaeng; ancuru’ taba sikalimi anjo patunga sangkamma limbu’bu’ niaka ri tampa’ pa’lessorang gandunga punna wattu timoro’. Anri’ba’-ri’ba’mi anjo timbunganga niiri’ ri anging, sa’genna tena sikalimo bate-batena manna sike’de’. Mingka anjo batu anrumbangai anjo patunga a’jari pila’ lompomi sangkamma moncong lompona na napirassi sikontu buttaya.
36Iaminjo so’nana karaengku; na kamma-kamma anne lanapakasingaraki’ atanta angkana apa battuanna anjo so’nata.
37Karaengku mala’birika, iami karaenna sikamma karaenga; ikattemi karaeng kaminang makoasaya. Allata’ala ri suruga le’ba’ assareki anne kakaraenganga, kakoasanga, kagassinganga siagang kalompoanga.
38Nipa’jariki’ karaeng tukoasa mae ri lino niaka pandudu’na kammayatompa jangang-janganga siagang olo’-olo’ maraengannaya. Kalentami karaeng natabaya pangngebarranna anjo ulu bulaenna anjo patunga.
39Mingka punna le’ba’mo kakaraenganta, nia’mo lammumba kakaraengang maraeng, tenaya nasallompo kakaraenganta. Nampa ammumba pole kakaraengang makatallua, nipangngebarranga lalang ri anjo tambagaya ri patunga, lakoasaya mae ri sikontu linoa.
40Nampa lammumba pole kakaraengang makaappa’, kammaya bassi kassa’na. Na antekamma batena bassia allica’ siagang angngancuru’ apa-apa mamo, kammatommi anjo rapanna anne kakaraengang makaappaka lanalicaki siagang lanaancuruki anjo kakaraengang-kakaraengang maraenga.
41Anjo bangkenga siagang karemeng bangkeng a’bengkoroka bassi siagang butta pi’ ri anjo patunga, iaminjo pangngebarranna angkanaya anjo kakaraenganga lata’bage-bagei ri allo ri boko. Anjo kakaraenganga nia’ todong kagassinganna lanri anjo butta pika nibengkoroki bassi.
42Karemeng bangkenna bassi sipa’gang nampa butta pi’ sipa’gang, battuanna nia’ sipa’gang kakaraengang kassa’ mingka nia’ todong sipa’gang lammai.
43Anjo campurang bassia siagang butta pika a’jari pammatei angkanaya anjo kakaraenganga nausahai lanakassakki kalenna; iaminjo saba’na nasicampuru’mo sibuntingi. Mingka tena matu-matunna anjo usahana, nasaba’ anjo bassia tena nakkulle sialle siagang butta pika.
44Ri wattu ammarentana anjo sikamma karaenga, Allata’ala ri suruga lappaentengi se’re kakaraengang lattahanga satunggu-tungguna siagang tenaya nakkulle lanibeta ri manna bansa battu kemae. Anjo kakaraenganga lanaancuru’ tabasikali anjo sikamma kakaraengang maraenga.
45Sai kiciniki karaeng, angkanaya tena sikali tau amberoi, nania’ se’re batu ta’lappasa’ battu ri ta’binga nampa natuju siagang naancuru’ anjo patung nipareka battu ri bassi, tambaga, butta pi’, pera’ siagang bulaeng? Allata’ala malompoa ampa’nyatai mae ri karaengku apa lakajarianga sallang. Anjo so’naya akkullei nipatappa’ siagang anne napakasingaraka atanta sanna’ sikali kamma tojenna."
46Nampa su’ju’mo Karaeng Nebukadnezar ri dallekanna Daniel siagang naparentakang sollanna nipakalompo Daniel siagang nisare koro’bang nitunu kammayatompa passare maraengannaya.
47Nakana karaenga ri ia, "Tojeng, Daniel, anjo Allata’alanu kaminang malompo ri alla’na sikontu rewataya. Iami makoasa mae ri sikontu karaenga, siagang assungkeai sikontu rahasiaya. Kuassengi anjo passalaka nasaba’ ikau akkulleko ampakasingaraki anne rahasiaya."
48Nampa nasaremo Daniel empoang tinggi, nasarei jai hadia-hadia ga’ga, siagang naangkaki a’jari guburnur ri Babel, kammayatompa napa’jari pamimping kaminang tinggi mae ri sikontu tumailalanga ri balla’ karaenga.
49Mingka lanri pappala’na Daniel, napassareammi karaenga anjo pamarentahang propinsi Babel mae ri Sadrakh, Mesakh siagang Abednego, nampa kalenna Daniel ammantangi ri balla’ karaenga.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel