Alkitab Mobile SABDA
[VER] : [MAKASAR]     [PL]  [PB] 
 <<  Daniel 8 >> 

1Ri taung makatallu pamarentahanna Karaeng Belsyazar, anggappa’ paccini’ makarua.

2Lalang anjo paccinikku, kuciniki kalengku nia’ ri propinsi Elam, ri Susan, ibukotana Persia. Ammentenga’ ri ampi’na Binanga Ulai;

3nampa ri birinna anjo binangaya nia’ kucini’ sikayu gimbala’ laki, la’bu tanru’na, naia se’rea la’buangngangi natanru’ se’rea siagang la’bi berui.

4Kuciniki anjo gimbala’ lakia angngula’ kalau’, wara’ siagang timboro’. Tena manna sikayu olo’-olo’ akkulle attahang andallekangi yareka ta’lappasa’ battu ri kakoasanna. Appaero’-eroki appanggaukang siagang sanna’ tampona.

5Lalang kuparhatikanna, nia’mo kucini’ sikayu bembe laki lari-lari battu lau’ ammolongang ri buttaya. Antekamma gassinna larina, sa’genna tallantea bangkenna ri buttaya. Ri alla’na ruaya matanna nia’ se’re tanru’ assulu’.

6Anjo bembe lakia nareppesi anjo gimbala’ laki kucinika ri birinna anjo binangaya, nampa larro sikali ambakkai naula’.

7Kuparhatikangi nabakkai anjo gimbala’ lakia. Antekamma sekke’na sa’genna nalappo anjo gimbala’ lakia siagang natepo’ rua-rua tanru’na. Tena sikali kagassinganna anjo gimbala’ lakia untu’ angngewa. Tassambilai naung ri buttaya nampa nionjo’-onjokang, na manna sitau tania’ akkulle antulungi.

8Anjo bembe lakia pila’ a’bakkaki lompona. Mingka ri wattunna narapi’ coppo’ kakoasanna, tepo’mi tanru’na anjo lompoa; nampa ri anjo tampa’ tanru’na nia’mo ammumba appa’ tanru’ assulu’, massing-massing a’dalle’ maraeng.

9Battu ri kalase’renna anjo tanruka nia’mo attimbo tanru’ ca’di, a’jari sannaka lompona siagang a’la’baka kakoasanna a’lampa timboro’, anrai’, siagang mae ri butta ga’gaya.

10Anjo tanruka a’jari pila’ lompoi sa’genna gassimmo angngewai tantara suruga iamintu sikamma bintoenga, ba’lalo nia’ siapa are napasambila naung ri buttaya nampa naonjo’-onjokang.

11Ba’lalo napa’ngarai panglimana tantara suruga, napammari koro’bang passare allo-alloa mae ri anjo panglimaya, siagang narumbangi balla’ ibadaya mae ri ia.

12Nampa sikamma tau niaka anjoreng appakkaramulami doraka siagang tenamo nassare koro’bang-koro’bang anjo nipattantua. Jari ibada tojenga nipatappasa’mi naung ri buttaya. Anjo tanruka a’jarimi pattujunna lalang sikontu panggaukanna.

13Nampa kulangngere’ sa’ra malaekaka akkana mae ri malaeka’ maraengannaya, "Sa’ge kemae sallona anjo sikontu apa nicinika lalang paccinika lakajariang? Sa’ge siapa sallona anjo dosa lompoa ansambeangi koro’bang allo-alloa? Sa’ge siapa sallona tantara suruga siagang balla’ ibadaya lanionjo’-onjokang?"

14Kulangngereki malaeka’ se’rea pole appiali angkana, "Sa’genna 1.150 allo. Lalang sikammaya anjo sallona tena nipassareangi koro’bang karuenga siagang bari’basaka. Le’bappi anjo nampa lanibajiki balla’ ibadaya."

15Ri wattunna kuboya battuanna anjo apa kucinika, ti’ring nia’mo battu ri dallekangku ammenteng sangkamma tau.

16Nia’ kulangngere’ sa’ra akkio’ battu ri ba’leanna Binanga Ulai, angkana, "Gabriel, pakasingaraki ri ia battuanna anjo apa nacinika."

17Jari Gabriel, anjo ammentenga ri dallekangku a’reppese’mi mae ri nakke. Sanna’mi malla’na kusa’ring, sa’gengku anra’ba. Nakanamo Gabriel ri nakke, "He tau, musti nuassengi battuanna anjo apa nucinika, angkanaya anjo passala’na kala’busang jammanga."

18Lalang a’bicarana, a’jari tenamo kungngu’rangi. Mingka nata’galakka’ nampa nabalia’ ammenteng ammotere’. Nampa nakana,

19"Lakupauangko apa lakajarianga sallang lanri pangngalarroiNa Allata’ala. Nasaba’ anjo paccini’nu napa’nyatami antekamma sallang kala’busang jammanga.

20Anjo gimbala’ laki nucinika, ruaya tanru’na, iami pangngebaranna kakaraengang Media siagang Persia.

21Anjo bembe lakia, iami pangngebarranna kakaraengang Yunani, siagang anjo tanru’ assuluka ri alla’na ruaya matanna, iamintu karaenna makase’rea.

22Anjo appaka tanru’ ammumbaya ri wattunna tepo’mo tanru’ rioloa, battuanna kakaraengang Yunani lata’bage-bagei a’jari appa’ kakaraengang, mingka manna se’re tania’ lasangkamma kassa’na siagang anjo kakaraengang rioloa.

23Punna lanarapi’ kala’busanna anjo sikamma kakaraenganga, iamintu punna narapi’mi coppo’na kaja’dallanga, nia’mo sitau karaeng kapala batu lammumba, siagang cara’deka annipu.

24La’jari kassa’ sikali, mingka teai lanri kakassakang kalenna. Lappabattui kapanrakang appakamalla’-mallaka, siagang manna pole apa nagaukang anjari kabusuki pattujunna. Lanapanraki sikamma tau porea siagang umma’Na Allata’ala.

25Lanri ia sannaki porena akkala’na, tuli lanjari balle-ballena. Lanakatampoangi kalenna, siagang tena napakainga’ rioloi taua na napanraki tau jaia. Ba’lalo barani angngewai Karaeng Kaminang Lompoa. Mingka laniancuru’ tongi nateaiji kagassingang rupatau.

26Anjo paccini’nu ri passala’na koro’bang karuenga siagang bari’basaka, le’bakamo nipakasingara’ battuanna mae ri kau, ma’nassa lakajariang tojeng-tojengi. Mingka yangasenna anjo kammaya lakajariangi ri allo labattua, iamintu jammang bellaya ija; jari teako caritai manna pole ri se’reang tau."

27Nampa a’jari lammamo kusa’ring pakkasiakku, sa’gengku tu’guru’ garring pirangallo are. Le’baki anjo ambangumma’ nampa kugaukang ammotere’ sikamma tugasakku untu’ karaenga. Mingka lussakka’ annawa-nawai anjo sikamma apa kucinika na tena nakkulle kupahang battuanna.



 <<  Daniel 8 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel