Alkitab Mobile SABDA
[VER] : [MAKASAR]     [PL]  [PB] 
 <<  Hosea 8 >> 

1Nakana Batara, "Pasa’rai tanra bahayaya! Niaki musua ambunduki pa’rasangangKu rapang balangkoa’ antamberoai apa lanakanrea! UmmakKu nadakkai parjanjiangKu siagang ke’nanga, siagang nabaliangi ajarang-ajarangKu.

2Manna pole nakkio’ Allata’ala ke’nanga mae ri Nakke siagang nakana ke’nanga ummakKu tappaka mae ri Nakke,

3mingka taerokai ke’nanga antarimai apa bajika. Lanri kammana anjo nalaniondammo ke’nanga ri musu-musunna ke’nanga.

4Ammilei ke’nanga karaeng natena nappitangara’ mae ri Nakke. Angngangkaki pamimping natena napalaki passitujuangKu. Naallei bulaenna siagang pera’na ke’nanga nampa appare’ patung barhala angngeranga kaancurang mae ri kalenna ke’nanga.

5BirisikKa’ ri sapi bulaeng nisombaya ri pandudu’na kota Samaria. Larro duduA’ mae ri ke’nanga. Kemaepi sa’genna ke’nanga latulusu’ nara’massi kalenna anynyomba ri barhalaya?

6Anjo sapi bulaeng nisombaya ri Samaria bate pare’na sikamma tau cara’de’na tu Israel! Anjo kammaya teai Allata’ala, siagang musti niancuruki!

7UmmakKu appakioroki anging jari lakkattoi anging lompo! Tena nadidi rappo gandunna ke’nanga, jari talanggappayai labu’ untu’ kanrena ke’nanga. Mingka punna padeng didi anjo gandunga, lala’busuki nikanre ri bansa-bansa maraenga.

8Rapang uring reppeka, kammami anjo tu Israel tenamo anggaranna, siagang a’jarimi bansa biasa sangkamma bansa-bansa maraenga.

9Rapang keledai liara’ tenaya namannuruki, kammami anjo tu Israel sangnging ero’ kalenna naturukiang. A’boyai ke’nanga bantuang battu ri Asyur, siagang ammalli ke’nanga passari’battangang battu ri bansa-bansa maraenga.

10Mingka manna nakamma laKupasse’rei siagang laKuhukkungi ke’nanga. Tasalloami nalakkunrareng ke’nanga napakamma sessa, punna nijallakkang ke’nanga ri karaeng Asyur.

11Pila’ jai tampa’ pakkoro’bangngang nibangung ri tu Israel untu’ antangkasi dosaya, pila’ jai tongi tampa’na ke’nanga untu’ anggaukangi dosaya!

12AnnulisiKa’ jai sikali pangngajarang untu’ ke’nanga, mingka kabusu’na anjo natolla’ ngasengi ke’nanga, lanri nakanana tena passisambunganna ke’nanga siagang anjo pangngajaranga.

13Nangai ke’nanga assare koro’bang mae ri Nakke, siagang angkanrei anjo dageng koro’banga, mingka iNakke Batara, tena Kusannang mae ri anjo koro’bang-koro’banga. Kamma-kamma anne laKuu’rangi dosana ke’nanga siagang laKuhukkungi ke’nanga lanri anjo dosa-dosana; laKukiringi ammotere’ ke’nanga mange ri Mesir!

14Ambangungi tu Israel siapa jaina balla’ karaeng, mingka nakaluppai ke’nanga angkana inai ampa’jari kalenna. Natambai tu Yehuda kota-kota pattahanganna napila’ jai, mingka lappaturungA’ pepe’ untu’ antunui sa’genna cappu’ sikamma balla’ lompona siagang kota-kotana ke’nanga."



 <<  Hosea 8 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel