Alkitab Mobile SABDA
[VER] : [MAKASAR]     [PL]  [PB] 
 <<  Imamat 22 >> 

1Nasuroi Batara anjo Musa

2ampabattui anne parentaya mae ri Harun siagang sikamma ana’na angkanaya, "Gaukangi siagang siratannaya apa napassareanga bansa Israel untu’ iNakke, sollanna tena nanura’massi areng matangkasakKu. INakke Batara.

3Punna nia’ jari-jarinu ia ra’masaka anreppesi sikamma passare matangkasa’ le’baka nasa’la’ bansa Israel untu’ iNakke, takkulleami a’jari palayang ri tampa’ pakkoro’bangnganga. Anjo paratoranga tappakei sa’genna satunggu-tungguna. INakke Batara.

4Punna nia’ jari-jarina Harun nataba garring bukkuleng iamintu garring sala, yareka garring baine sa’genna assulu’ je’neka battu ri katauanna, tena nipa’biangi angkanrei kanre passare matangkasaka punna tenapa natangkasa’ kalenna. Se’rea imang a’jari ra’masaki punna naseroi barang ra’masaka lanri le’baki nataba maya’. A’jari ra’masa’ tongi punna assulu’ je’ne’ kebo’na battu ri katauanna,

5yareka nasero olo’-olo’ ra’masaka yareka tau ra’masaka.

6Se’rea imang, manna pole apa passabakkanna na’jari ra’masa’, tuli ra’masa’na sa’genna labu alloa. Siagang punna labumo alloa tenapa nakkulle angnganre kanre nipassareang ri Batara punna tenapa nale’ba’ a’je’ne’.

7Punna labumo alloa a’jari tangkasa’mi siagang akkullemi nakanre, lanri iaminjo kanrena.

8Tena nipa’biangi angnganre dageng olo’-olo’ mate kalenna yareka mate nikokko’ ri olo’-olo’ sekke’. Punna nakanrei, a’jari ra’masaki. INakke Batara.

9Sikontu imanga musti naturuki paratorang-paratorang Kupassareanga. Punna tena, salai ke’nanga siagang tena tamatena, lanri nadakkai ke’nanga anjo paratorang-paratorang matangkasaka. INakke Batara, siagang iNakke ansa’laki ke’nanga untu’ KalengKu.

10Anjo passare nisa’laka untu’ iNakke imangaji bawang siagang kaluargana akkulle angkanrei; tau maraenga takkulleai, manna pole nasiballa’ anjo imanga yareka manna pole natungnganre gajina imanga.

11Mingka punna ata-ata naballia anjo imanga siagang doe’ kalenna yareka nilassukangi lalang ri balla’na, akkullei nakanre bageanna anjo imanga.

12Ana’ bainena se’rea imang ia a’buntinga siagang bura’ne tenaya naimang, takkulleai nakanre anjo passarea.

13Mingka ana’ bainena imanga ia a’jari jandayamo yareka le’bakamo nisa’la’ natena ana’na nampa ammotere’ mange ri balla’na manggena kammayatompa a’jari tanggonganna manggena, akkullei nakanre bageanna manggena. Kaluarganaji bawang imanga akkulle angkanrei anjo passarea.

14Punna nia’ tau teai kaluargana imanga tena nakunjungi nanakanre kanre nipassareanga mae ri Batara, musti assarei passambe mae ri imanga na natambai ruampulo parseng.

15Sikamma imanga takkulleai nara’massi passare le’baka nisa’la’ untu’ KalengKu

16lanri nalappassanna nakanre tau tenaya nakkulle angkanrei anjo passarea. Anjo kammaya napa’jari salami anjo taua siagang lanitujui ri hukkungang. INakke Batara, siagang iNakke ampakatangkasaki anjo passarea."

17Nasuroi Batara anjo Musa

18ampassareangi mae ri Harun siagang sikamma ana’na kammayatompa sikontu bansa Israel anne paratorang-paratoranga. Punna nia’ tu Israel yareka bansa maraeng ammantang tuliamo ri alla’na tu Israel assare koro’bang untu’ anrupai tinja’na, yareka koro’bang ero’ kalenna, anjo olo’-olo’ napassareanga musti laki siagang tenaya callanna sollanna akkulle nitarima.

19(22:18)

20Teako assarei olo’-olo’ niaka callanna nasaba’ taerokai Batara antarimai.

21Punna nia’ tau assare koro’bang passiamakkang mae ri Batara untu’ anrupai tinja’na yareka untu’ koro’bang ero’ kalenna, anjo olo’-oloka takkulleai nia’ callanna, sollanna akkulle nitarima.

22Teako assarei koro’bang olo’-olo’ buta mae ri Batara, yareka tepoka bukunna yareka lokoka, yareka niaka lattanna siagang a’nanai, yareka natabaya garring bukkuleng yareka puru-puruanga. Olo’-olo’ kammaya anjo teako passareangngi untu’ koro’bang kanre-kanreang irate ri tampa’ pakkoro’bangnganga.

23Untu’ koro’bang ero’ kalennu, akkulleko assare olo’-olo’ tenaya nabaji’ kalenna; mingka punna untu’ anrupai tinja’, anjo olo’-olo’ kammaya tena nakkulle nitarima.

24Teako assarei mae ri Batara iaminjo olo’-olo’ panraka, yareka tassappika, yareka bokkaka, yareka nipelaka lisere’ butona. Anjo kammaya takkulleai nigaukang ri pa’rasangannu.

25Olo’-olo’ piara nigappaya battu ri bansa maraenga takkulleai nipassareang untu’ koro’bang kanre-kanreang. Olo’-olo’ kammaya anjo nibilang niaki callanna siagang takkulleai nitarima.

26Ana’ sapi, ana’ gimbala’ yareka ana’ bembe beru lassuka musti ammantangi ri anronna lalang tuju allo. Nampami punna le’ba’mo anjo akkullemi nitarima untu’ koro’bang kanre-kanreang.

27(22:26)

28Teako koro’bangkangi anrong sapia yareka anrong bembea siagang ana’na ri allo sangkammaya wattunna.

29Punna assareko koro’bang kasukkurang mae ri Batara, gaukangi anjo kammaya situru’ paratorang, sollanna nanitarima anjo koro’bang nupassareanga.

30Kanre memammi anjo koro’banga anjo alloa, siagang teako boliki ammantang manna pole sike’de’ untu’ ammuko.

31Nakana Batara, "Turuki parenta-parentaKu; iNakke Batara.

32Teako ra’massi areng matangkasakKu. Sikontu bansa Israel musti anynyombai mae ri Nakke Kaminang Matangkasaka. INakke Batara siagang ampa’jariako tangkasa’.

33INakke angngerangko assulu’ battu ri butta Mesir, sollanna iNakke a’jari Allata’alanu. INakke Batara."



 <<  Imamat 22 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel