1Nakana Batara mae ri Musa,
2"Kioki Harun siagang sikamma ana’na siagang erangi pakeang imanga, minynya’ upacaraya, sikayu sapi laki rungka untu’ koro’bang pammopporang dosa, ruang kayu gimbala’ laki siagang sibaku’ roti tenaya nammake pa’gambang.
3Nampa suroi sikontu umma’ Israel a’rappungang ri dallekanna pakke’bu’ KemaKu."
4Nagaukammi Musa anjo apa Naparentakanga Batara. Ri wattunna a’rappungang ngasemmo sikontu ummaka ri anjo tampaka,
5nakanamo Musa mae ri ke’nanga, "Anne apa kugaukanga kamma-kamma anne iamintu parentaNa Batara."
6Nampa nasuro Harun siagang ana’-ana’na maju mae ri dallekang na natangkasi massing kalenna.
7Le’baki anjo napatabami pakeang imanga ri Harun, iamintu: kameja, passikko’ aya’ siagang juba. Kammayatompa baju efod nipasikkoka ri aya’na siagang passikko’ battu ri kaeng alusu’.
8Nampa napataba pa’lapa’ barambanga ri barambanna Harun, siagang napantama’mi ri anjo pa’lapa’ barambanga anjo nikanaya Urim siagang Tumim.
9Nampa napataba soro’banga ri ulunna Harun; anjo soro’banga napatabai belo-belo bulaeng, a’jaria pammatei angkanaya anjo Harun a’jarimi Batara pata. Yangasenna anjo nagaukangi Musa situru’ parentaNa Batara mae ri ia.
10Nampa angngalle Musa minynya’ upacara siagang napasapu mae ri KemaNa Batara siagang sikontu pakkakasa’na. Lanri kammana anjo nanisa’la’ ngasemmo anjo apa sikammaya untu’ Batara.
11Anjo minynyaka niparacciki sike’de’ pintuju irateanna anjo tampa’ pakkoro’bangnganga siagang sikontu pakkakasa’na, kammayatompa mae ri rateanna ba’ je’neka siagang dapara’na. Lanri kammana anjo nanisa’la’ ngasemmo anjo apa sikammaya untu’ Batara.
12Le’baki anjo nalanti’mi Musa anjo Harun; natiriki sike’de’ minynya’ upacara irate ri tompo’ ulunna.
13Nampa nasuro sikamma ana’na Harun maju mae ri dallekang. Napipakeimi ke’nanga kameja siagang passikko’ aya’. Nampa napataba soro’banga ri ulunna ke’nanga sangkamma Naparentakanga Batara mae ri ia.
14Le’baki anjo angngallemi Musa sikayu sapi laki rungka untu’ koro’bang pammopporang dosa. Harun siagang sikamma ana’na napadongkoki ke’nanga limanna ri tompo’ ulunna anjo olo’-oloka.
15Nampa nasamballe Musa siagang naalle sipa’gang cera’na anjo olo’-oloka. Anjo ceraka napasapui siagang karemenna mae ri tanru’-tanru’ niaka ri sikamma panyingkulu’na tampa’ pakkoro’bangnganga, sollanna nitangkasi anjo tampa’ pakkoro’bangnganga untu’ Allata’ala. La’binna anjo ceraka napatiriki naung ri dapara’na tampa’ pakkoro’bangnganga. Kammaminjo carana nitangkasi anjo tampa’ pakkoro’bangnganga siagang nisa’la’ untu’ Batara.
16Battu ri anjo sapi beru nipolonga, naallei Musa sikontu jannana ia antongkokai bone parru’na, lempanna siagang jannana kammayatompa atenna kaminang bajika. Yangasenna anjo natunui irate ri tampa’ pakkoro’bangnganga.
17Mingka dagenna sapia anjo, kukkulu’na, bone parru’na kammayami parru’ lolona, jari sikontu anjo sapia pantaranganna anjo bageang-bageang le’bakamo nisa’la’, nitunui ri pantaranna pakkemaanga situru’ Naparentakanga Batara.
18Nampa angngalle Musa gimbala’ laki untu’ koro’bang nitunu; na Harun siagang sikamma ana’na napadongkoki limanna ke’nanga ri tompo’ ulunna anjo gimbalaka.
19Nasamballei Musa anjo gimbalaka nampa napatiri’ cera’na mae ri appaka sa’rinna tampa’ pakkoro’bangnganga.
20Nampa nakere’-kere’ anjo olo’-oloka; bone parru’na siagang bangkenna nabissai siagang je’ne’. Ulunna, jannana, siagang la’binna maraenga anjo dageng gimbala’ lakia natunui untu’ koro’bang nitunu irate ri tampa’ pakkoro’bangnganga situru’ apa Naparentakanga Batara mae ri ia. Rasanna anjo koro’bang kanre-kanreanga napakasannangi nyawaNa Batara.
21(8:20)
22Nampa naalle Musa gimbala’ laki sikayua pole untu’ koro’bang pallantikanna imanga. Harun siagang sikamma ana’na napadongkoki limanna ke’nanga ri tompo’ ulunna anjo gimbalaka,
23nampa nasamballe Musa. Le’baki anjo naallemi sike’de’ cera’na anjo olo’-oloka, nampa napasapu ri leko’ tolinna Harun ri kananga, ri anrong lima kananna, kammayatompa ri anrong bangkeng kananna.
24Nampa nasuro sikamma ana’na Harun a’reppese’, na napasapu todong sike’de’ anjo ceraka ri leko’ toli kananna ke’nanga, ri anrong lima kananna ke’nanga, kammayatompa ri anrong bangkeng kananna ke’nanga. La’binna anjo ceraka napatiriki ri appaka sa’rinna tampa’ pakkoro’bangnganga.
25Naallei Musa jannana anjo gimbalaka, ingkonna niaka jannana, sikontu jannana antongkokai bone parru’na, atenna kaminang bajika, lempanna siagang jannana kammayatompa bangkeng kananna.
26Battu ri baku’ pammantangang roti tenaya nammake pa’gambang ia le’bakamo nipassareang mae ri Batara, angngallei Musa sibatu roti kapala’ nipareka nipasileo’ minynya’ siagang sibatu roti nipisika. Anjo rotia napadongkoki irate ri anjo jannana siagang bongga kananna gimbalaka.
27Yangasenna anjo napamangei ri limanna Harun siagang sikamma ana’na, nampa napassareang ke’nanga a’jari passare nipappicinikang mae ri Batara.
28Le’baki anjo naallemi Musa anjo kanrea battu ri ke’nanga nampa natunu irate ri tampa’ pakkoro’bangnganga, siagang koro’bang nitunu untu’ koro’bang pallantikang. Rasanna anjo koro’bang kanre-kanreanga napakasannangi nyawaNa Batara.
29Nampa naalle Musa barambanna anjo gimbalaka na napassareang a’jari passare nipappicinikang mae ri Batara. Iaminjo bageanna Musa battu ri gimbala’ laki nikoro’bangkanga untu’ upacara pallantikang imanga. Yangasenna anjo kammaya nagaukangi Musa situru’ apa Naparentakanga Batara mae ri ia.
30Le’baki anjo naallemi Musa sipa’gang minynya’ upacaraya siagang sipa’gang cera’ niaka rate ri tampa’ pakkoro’bangnganga, nampa naparacci’ mae ri Harun siagang sikamma ana’na kammayatompa mae ri pakeanna ke’nanga. Kammaminjo carana Musa nanasa’la’mo ke’nanga siagang pakeanna ke’nanga untu’ Batara.
31Nampa nakanamo Musa mae ri Harun siagang sikamma ana’na, "Pallui anjo dageng koro’banga ri dallekang pakke’bu’ KemaNa Batara. Situru’ parentaNa Batara, musti nukanrei anjoreng siagang roti koro’bang pallantikang niaka lalang ri bakuka.
32Dagenga siagang roti alla’bia musti nutunui sa’genna cappu’.
33Lalang tuju allo takkulleako ambokoi KemaNa Batara sa’genna le’ba’ anne upacara pallantikannu.
34Naparentakangi Batara sollanna anne apa nigaukanga anne alloa nigaukangi pole situlusu’na. Lanri iaminne upacaraya na nipammopporang dosa-dosanu.
35Lalang tuju allo, allo bangngi, musti ammantang ngasengko ri dallekang pakke’bu’na Kemaya untu’ anggaukangi apa Naparentakanga Batara. Punna tena nugaukangi, lamate ngasengko. Iaminjo Naparentakanga Batara mae ri nakke."
36Nampa nagaukammi Harun siagang sikamma ana’na sikontu apa Naparentakanga Batara tete ri Musa.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel