Alkitab Mobile SABDA
[VER] : [MAKASAR]     [PL]  [PB] 
 <<  Kejadian 29 >> 

1Napatulusu’mi jappana Yakub, a’lampa mange ri pa’rasangang bageang rayanganna Kanaan.

2Ti’ring nia’mo nacini’ se’re bungung ri paranga. Na ri ampi’na nia’mo tallung pa’rappungang bembe siagang gimbala’, ia biasaya nisare je’ne’ inung anjoreng. Anjo bungunga nitongkoki siagang batu lompo.

3Punna a’rappungang ngasemmo bembea siagang gimbalaka anjoreng ri tampaka, nigulummi anjo batua mae ri sa’ri ri sikamma pakalawakia. Nampa nisaremo angnginung anjo bembea siagang gimbalaka. Le’baki anjo natongko’mi pakalawakia ammotere’ anjo bungunga.

4Akkuta’nammi Yakub ri sikamma anjo pakalawakia angkana, "E, gang, battu kere ngasengko antu mae?" Appialimi ke’nanga angkana, "Battu ri Haran".

5Akkuta’nammi pole Yakub nakana, "Kiassengi Laban ana’na Nahor?" Appialimi ke’nanga angkana, "Naassengi ikambe".

6Akkuta’nammi pole Yakub angkana, "Antekamma kaadaanna?" Appialimi ke’nanga angkana, "Baji’-baji’ji. Ciniki anjo mae ana’ bainena niarenga Rahel. Battui angngerangi pa’rappungang bembena siagang gimbala’na manggena."

7Nakanamo Yakub, "Tinggi iji alloa siagang tenapa nawattunna nipantama’ ri barana bembea siagang gimbalaka. Angngapa natena nusarei je’ne’ inung anjo olo’-oloka, nampa nulappassang angnganre pole ruku’?"

8Appialimi ke’nanga angkana, "Nampami akkulle nisare je’ne’ inung anjo sikamma gimbalaka punna a’rappungang ngasemmo sikamma gimbalaka anrinni, siagang punna le’ba’mo nigulung batu antongkokiai anjo bungunga."

9Lalang a’bicarana Yakub siagang ke’nanga, nia’mi battu Rahel siagang pa’rappunganna bembena siagang gimbala’na.

10Nacini’na Yakub anjo Rahel siagang bembena na gimbala’na, a’lampami Yakub mange ri anjo bungunga, nampa nagulung anjo batu pannongkoka mae ri sa’ri, na nasare je’ne’ inung anjo pa’rappungang olo’-oloka.

11Nampa nabau anjo Rahel, nangngarru’ napakamma rannu;

12na nakana, "Inakke ana’na Ribka, sari’battanna manggenu." Larimi Rahel ammotere’ mange ri balla’na untu’ ancaritai anjo passalaka mae ri manggena.

13Nalangngere’na Laban anjo kabara’na Yakub kamanakanna, larimi ero’ mange ambuntuli. Naraka’mi Laban anjo Yakub siagang nabaumi nampa naerang antama’ ri balla’. Le’ba’na nacarita ngaseng Yakub sikamma passalaka ri batangkalenna mae ri Laban,

14nakanamo Laban, "Kammatojengi, ikau bija ma’reppesekko ri nakke." Ammantammi Yakub ri anjo ballaka sibulang sallona.

15Ri se’reang allo nakanamo Laban ri Yakub, "Tena nusiratang anjama bawang-bawang ri nakke lanri ikau bijangkuko. Paumi maka siapa gaji nukaeroki?"

16Anjo Laban nia’ rua ana’na baine; toaya niarengi Lea, na andi’na niarengi Rahel.

17Anjo Lea ga’gai matanna, na Rahel bajiki kalenna siagang ga’gai tanja’na.

18Yakub tu’guru’mi pangngainna mae ri Rahel. Jari appialimi ri Laban angkana, "Erokka’ anjama ri katte tuju taung sallona purina, punna kikellaia’ a’bunting siagang Rahel."

19Nakanamo Laban, "Bajikangngangi punna kupassareangi mae ri kau kala kupassareanga mae ri tau maraenga. Jari ammantang mako anrinni."

20Jari anjamami Yakub tuju taung sallona untu’ anggappai Rahel. Nallallomo anjo taung-taunga sanrapang pirangalloji bawang ri pakkasia’na Yakub lanri sanna’ mangngaina ri anjo tuloloa.

21Le’baki anjo nakanamo Yakub ri Laban, "Allalomi tuju taung, jari kellaima’ a’bunting siagang anatta purina."

22Appare’mi passua’-suarrang pa’buntingang Laban siagang naundang ngaseng tommi sikamma taua ri anjo kotaya.

23Mingka anjo bangngia, teai Rahel passangalinna Lea naantara’ Laban mange ri Yakub. Na sikatinroammo Yakub siagang ia.

24(Napassareammi Laban surona niarenga Zilpa mae riLea, untu’ a’jari surona.)

25Nampami ammukona bari’basa’ nanaasseng Yakub angkanaya Lea anjo nabuntingia. Mangemi Yakub ri Laban na nakana, "Angngapa nakipakamma’ anjo purina? Sai anjama’ untu’ ikatte sollanna kugappa Rahel? Angngapa kiballe-balleia?"

26Appialimi Laban angkana, "Turu’ atoranga anrinni, takkulleai andika rioloangngang a’bunting na daenna.

27Tayammi sa’genna le’ba’ tuju allo passua’-suarrang pa’buntinganga, nampa kupassareang todong Rahel mae ri kau, assala’ ero’ jako anjama pole tuju taung sallona."

28Situjumi Yakub. Na allalonamo anjo passua’-suarranga, napassareammi Laban anjo Rahel mae ri Yakub untu’ a’jari bainenna.

29(Napassareammi Laban surona bainea niarenga Bilhamae ri Rahel untu’ a’jari surona.)

30Assikatinroang tommi Yakub siagang Rahel. Nala’bi nangaiangngang Rahel na Lea. Nampa anjamamo pole tuju taung sallona.

31Nacini’na Batara angkana tena ningai dudui Lea sangkamma Rahel, nisaremi pangngellai sa’genna ammana’ Lea, mingka Rahel tuli tenana ana’na.

32Attianammi Lea nampa allassukang sitau ana’ bura’ne. Nakanamo Lea, "Nacini’mi Batara kasusaangku, nakamma-kamma anne lanangaima’ bura’nengku." Nampa naaremmo anjo anaka Ruben.

33Nampa attianammo pole Lea siagang allassukammi sitau ana’ bura’ne. Nakanamo Lea, "Nasareamma’ pole Batara anne anaka lanri nalangngere’na angkana tena ningaia’." Nampa naaremmo anjo anaka Simeon.

34Attianammi pole Lea nampa allassukang sitau ana’ bura’ne. Nakanamo, "Kamma-kamma anne pila’ latassikko’mi bura’nengku ri nakke, lanri tallumi ana’ bura’ne kulassukang." Nampa naaremmo anjo anaka Lewi.

35Nampa attianammo pole Lea siagang allassukammi sitau ana’ bura’ne. Nakanamo, "Kamma-kamma anne lamammujia’ ri Batara." Nampa naaremmo anjo anaka Yehuda. Le’baki anjo tenamo nammana’ pole Lea.



 <<  Kejadian 29 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel