Alkitab Mobile SABDA
[VER] : [MAKASAR]     [PL]  [PB] 
 <<  Keluaran 19 >> 

1Le’baki anjo a’lampami tu Israel ambokoi Rafidim. Na ri tanggala’ se’re bulang makatallu ri le’ba’na nabokoi Mesir, battumi ke’nanga mae ri parang lompona Sinai. Appare’mi ke’nanga kema ri bangkenna Moncong Sinai,

2(19:1)

3siagang nai’mi Musa ri anjo monconga untu’ assibuntulu’ siagang Allata’ala. A’bicarami Batara mae ri Musa battu ri anjo monconga siagang Nasuromi ampa’la’bangi napau mae ri tu Israel, jari-jarina Yakub, angkana,

4"Le’ba’ ngasemmi nucini’ apa Kugaukanga mae ri tu Mesir, siagang antekamma bateKu angngerangko mae ri KalengKu ri anne tampaka lalang kakoasang lompoKu, rapang jangang-jangang rajawali angngerangi ana’na lalang ri ka’nyi’na.

5Kamma-kamma anne punna mannurukiko mae ri Nakke siagang majarrekko ri parjanjiangKu, laKupa’jariko umma’ KalengKu. Sikontu buttaya ikau ampatangi, mingka ikau la’jariko umma’ nikarimangngingKu,

6poro untu’ KalengKu bawang, nampa ikau lanulayaniA’ salaku imang-imang."

7Jari naummi Musa battu ri anjo buluka nampa nakio’ ngaseng sikamma pamimpinga sollanna a’rappungang. Nampa nacaritamo mae ri ke’nanga sikontu apa Naparentakanga Batara mae ri ia.

8Appada-pada ngasemmi ke’nanga appiali angkana, "Sadiai ikambe untu’ anggaukangi sikontu kananNa Batara." Anjo pappialinna ke’nanga napabattui Musa mae ri Batara. Nampa Nakanamo Batara ri Musa, "LabattuA’ mae ri kau nikalimbuki ri rammang kapalaka; lanalangngereki taua punna a’bicarA’ mae ri kau, nappakkaramula anjo wattua tuli latappa’mi ke’nanga mae ri kau.

9(19:8)

10Kamma-kamma anne buntulimi ke’nanga, siagang suromi ke’nanga anne alloa siagang ammuko ampasadiai kalenna untu’ anggaukangi ibadana. Musti nasassai pakeanna ke’nanga.

11Ammembara’ musti sadia ngasemmi ke’nanga. Ri anjo alloa lanaungA’ ri coppo’na Moncong Sinai, tampa’ akkullea nacini’ ngasengA’ taua.

12Apparekko pammatei ri tammulilina anne monconga a’jari pa’baeng-baeng tenaya nakkulle nalaloi anjo bansaya. Pisangkai anjo bansaya angngambi’ ri monconga, ba’lalo takkulleai ke’nanga a’reppese’. Inai-nai allaloi pa’baeng-baenna, lanihukkung matei;

13anjo taua musti nisambilai batu yareka nipanai’, siagang takkulleai nisero. Anne kammaya tattujui baji’ mae ri rupataua kammayatompa olo’-oloka; sikontu apa allaloiyai anjo pa’baeng-baenga musti nihukkung matei. Ri wattu kalangngeranna sa’ra la’buna tarompeka anjo taua musti angngambiki ri monconga."

14Nampa naummo Musa battu ri monconga, na nasuro ngaseng anjo taua sadia-sadia untu’ anggaukangi ibadaya. Nakana, "Ammembara’ musti sadia ngasengko, siagang kamma-kamma anne takkulleako assikatinroang." Jari appakkaramulami anjo bansaya sadia-sadia siagang massing nasassami pakeanna ke’nanga.

15(19:14)

16Ri makatalluna alloa, ri bari’basa’na, battumi gunturuka siagang kilaka. Nia’mo ammumba rammang kapala’ rate ri monconga siagang nia’mo kalangngerang sa’ra tarompe’ sannaka lompona sa’ranna. Annekkere’ ngasemmi sikontu taua ri kemaya napakamma malla’.

17Nierammi ke’nanga ri Musa assulu’ untu’ assibuntulu’ siagang Allata’ala, nampa ammenteng ke’nanga ri bangkenna anjo monconga.

18Sikontu anjo Moncong Sinai katongkokangi ri umbu, lanri naunna Batara ri tompo’na lalang pepe’. A’rumbumi nai’ anjo umbua rapang umbu battua ri pattunuang, siagang ta’goccang sanna’mi sikontu monconga.

19Pila’ sanna’mi lompona sa’ra tarompeka. A’bicarami Musa, nampa appiali Allata’ala siagang gunturu’.

20Naungi Batara ri coppo’na Moncong Sinai, siagang Nakio’mi Musa sollanna nai’ ri coppo’na anjo monconga. Jari angngambi’mi Musa,

21nampa Nakanamo Batara ri ia, "Naungko nampa nupakainga’ ngaseng anjo taua angkanaya takkulleai ke’nanga allaloi anjo pa’baeng-baenga untu’ battu mae ancinikKa’. Punna nadakkai ke’nanga anne parentaya, jai ri ke’nanga lamate.

22Ba’lalo manna sikamma imang-imang eroka anreppesiA’, musti natangkasi kalenna. Punna tena laKuhukkungi ke’nanga."

23Nakanamo Musa ri Batara, "Takkulleai nai’ anjo taua, saba’ le’baki Kiparentakang mae ri kambe sollanna nicini’ matangkasa’ anne monconga siagang musti niparhatikangi pa’baeng-baeng niaka ri tammulilina."

24Appialimi Batara angkana, "Naung mako, nampa ammoterekko mae anrinni siagang Harun. Mingka sikamma imanga siagang ra’yaka takkulleai nalaloi anjo pa’baeng-baenga untu’ battu mae ri Nakke. Punna nalaloi ke’nanga, laKuhukkungi ke’nanga."

25Nampa naummi Musa mange ri anjo bansaya. Napabattuammi ke’nanga anjo pasanNa Batara.



 <<  Keluaran 19 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel