Alkitab Mobile SABDA
[VER] : [MAKASAR]     [PL]  [PB] 
 <<  Lukas 19 >> 

1Ri wattunna battu Isa mange ri Yerikho, a’jappa tulusu’mi Nalaloi anjo kotaya.

2Anjoreng ri kotaya nia’ sitau kapala pasingara’ sima, sannaka kalumanynyanna, niarenga Zakheus.

3Na anne lapung Zakheus, ero’ dudui naasseng siagang nacini’ angkana inai anjo Isa. Mingka lanri jai duduna tau, siagang bodona pakkaleanna, takkulleami nacini’ Isa.

4Jari larimi a’lampa riolo ampilumbai anjo tau jaia. Nampa angngambi’ nai’ ri se’reang poko’ kayu, sollanna akkulle nacini’ Isa lanumaloa sinampe’ anjoreng.

5Ri wattunna anrapi’ Isa mange anjoreng ri tujunna poko’ kayua, accongami nai’. Nampa Nakana, "O Zakheus, naungko mae linta’! Nasaba’ musti mangeA’ ri balla’nu anne alloa."

6Akkaro-karomi Zakheus naung, namange anruppai Isa, siagang sanna’mi rannuna nyawana.

7Nalarro ngasemmo taua anciniki anjo passalaka. Nakanamo ke’nanga, "Pui’! A’lampai a’manaikang ri balla’na tau kodi sipaka!"

8Ri wattunna battumo ri balla’na Zakheus, ammentemmi nampa nakana ri Isa, "O Batara, lakupassidakkangi tawaruanna pa’barang-barangangku mae ri tu kasi-asia; namanna inai punna le’baki kutipu, lakubayaraki ammotere’ sa’genna a’lappi appaka!"

9Nakanamo Isa, "Anne alloa ikau siagang sikamma bone balla’nu, nipasalama’ mako ri Allata’ala siagang nisare mako katallassang beru, nasaba’ sossoranna tongko Abraham.

10Nasaba’ battui Ana’ Ma’rupataua untu’ amboyai siagang ampasalamaki tau sala oloanga."

11Lalang nipilangngerina ri taua a’bicara, Nacaritami Isa se’re pangngebarang. Nasaba’ ri wattunna a’reppese’mo ri Yerusalem nakapangi taua angkanaya tasalloami nalammarenta Allata’ala salaku Karaeng ri linoa.

12Nakanamo Isa, "Nia’ se’re tu nipakala’biri’ a’lampa ri se’reang pa’rasangang bella, ero’ niangka’ a’jari karaeng anjoreng nampa ammotere’ poleang.

13Ri tenanapa na’lampa, nakio’mi sampuloa palayanna, nampa massing nasare ke’nanga tasse’re-se’renna doe’ bulaeng. Nakana ri ke’nanga, ‘Pakei anne doeka a’danggang lalang lampaku.’

14Mingka sanna’ nikabirisinna ri tuma’buttana anjo pa’rasanganga. Jari ri wattunna a’lampamo anjo tu nipakala’birika, nia’mo nasuro ke’nanga mange ampaui angkanaya teami ke’nanga angkaraengangi anjo karaenga.

15Mingka niangka’mi anjo tu nipakala’birika a’jari karaeng, nampa ammotere’ ri pa’rasanganna. Nasuro kio’mi linta’ andallekang anjo palayang-palayanna, ero’ naasseng angkanaya siapa jaina passawallang massing nagappa ke’nanga.

16Battumi palayang makase’rea andallekang na nakana, ‘O karaeng, anjo se’rea doe’ bulaeng kipassareanga ri nakke, kupa’jari lappi sampulomi.’

17Nakanamo anjo karaenga, ‘Baji’mi! Palayang bajikko! Nasaba’ akkulleko nipatappa’ ri passala’ apa-apa ca’dia, lakupa’jari mako tau koasa ammarenta sampulo kota.’

18Le’baki anjo battu tommi palayang makaruaya na nakana, ‘O, karaeng, anjo se’rea doe’ bulaeng kipassareanga ri nakke, kupa’jari lappi limami.’

19Nakanamo anjo karaenga ri anjo palayanga, ‘Lakupa’jariko tau koasa ammarenta lima kota.’

20Le’baki anjo battu tommi palayang maraenga pole, na nakana, ‘O, karaeng, anne doetta; kuboliki lalang ri passapungku.

21Mallaka’ ri katte lanri sekkekki’. Kiallei apa-apa tenaya naikatte pata, kiallei wassele’na tampa’ tenaya naikatte pata tampa’!’

22Nakanamo anjo karaenga ri anjo taua, ‘Ikau palayang ja’dalakko! Lanri kana-kanannu tonji nalakuhukkungko. Nuassengi angkanaya inakke tau sekkekka’: kuallei apa-apa tenaya nainakke pata, siagang kuallei wassele’na tampa’ tenaya nainakke pata tampa’.

23Punna kamma, apa saba’na natena nupantamaki doekku ri kantoro’ banga sollanna akkulle kualle ammotere’ anjo doekku siagang bungana punna ammoterekka’?’

24Le’baki anjo, nakanamo anjo karaenga ri sikamma tau niaka anjoreng ammenteng, ‘Allei anjo doe’ bulaeng niaka ri ia nampa nupassareang mae ri anjo palayang niaka sampulo doe’ bulaenna.’

25Mingka nakanamo ke’nanga, ‘O, karaeng, anjo palayanga nia’mo ri ia sampulo doe’ bulaeng.’

26Appialimi anjo karaenga nakana, ‘U’rangi angkanaya: inai-nai nia’mo apa-apanna, iami lanisare pole la’bi jai. Mingka inai-nai tena apa-apanna lanialleangi ba’lalo apa-apa niaka ri ia.

27Na kamma-kamma anne erang ngasemmi mae sikamma tau ammusua’, iamintu tau tenaya naero’ akkaraeng ri nakke. Buno ngasengi ke’nanga ri dallekangku!’"

28Le’ba’na Napau Isa sikammaya anjo passalaka, a’jappa riolomi ri dallekanna ke’nanga, ero’ a’lampa mange ri Yerusalem.

29Ri wattunna battu ke’nanga ri rampi’na Betfage siagang Betania, iamintu ri Bonto Zaitun, Nasuromi ana’ gurunNa rua tau a’jappa riolo.

30Nakana Isa ri ke’nanga, "A’lampamako mange ri anjo kampong niaka ri dallekannu. Na punna battuko mange anjoreng, nia’ lanucini’ sikayu keledai rungka tappaukang. Tena le’bakapi nibae anjo keledai rungkaya. La’gasimi passikko’na anjo keledaia, nampa nuerang mae anrinni.

31Punna nia’ tau akkuta’nang ri kau angkanaya, ‘Angngapa nanula’gasi antu keledaia?’ pauangi angkana, ‘Naparalluangi Batara.’"

32A’lampami anjo ruaya ana’ gurunNa Isa. Nagappa tojemmi sangkamma le’baka Napau Isa.

33Lalang nala’gasinna ke’nanga passikko’na anjo keledaia, nakanamo patanna anjo keledaia ri ke’nanga, "Angngapa nanula’gasi passikko’na antu keledaia?"

34Appialimi ke’nanga angkana, "Naparalluangi Batara."

35Nampa naerang ke’nanga anjo keledai rungkaya mange ri Isa. Nalapakkimi ke’nanga juba dongko’na anjo keledaia, nampa nabantu Isa nai’ a’dongko’.

36Lalang numalona Isa andongkoki anjo keledaia, napalapara’mi jubana taua ri agang laNaoloa Isa.

37Ri wattunna a’reppese’mo ri Yerusalem, ri agang anynyoloroka ri Bonto Zaitun, appakkaramula ngasemmi sikamma ana’ gurunNa akkiok-kio’ mammuji-muji ri Allata’ala. Siagang appala’ sukkuru’mi ke’nanga ri Allata’ala, lanri le’ba’na ngasemmo nacini’ ke’nanga sikamma gau’-gau’ appakalannasa’ le’baka Nagaukang Isa.

38Akkiok-kio’mi ke’nanga angkana, "Nibarakkakimi Karaeng battua lalang arenNa Batara! Salewangangi ri suruga, nanipuji Allata’ala!"

39Nia’ todong siapa are tu Farisi ri alla’na anjo tau jaia. Nakanamo anjo tu Farisia ri Isa, "O, Pa’ Guru, Kisuro sai anjo ana’-ana’ gurunTa a’mereki’."

40Appialimi Isa Nakana, "Patappaki angkanaya: punna a’mereki ke’nanga, la’gora-gorai anne batu-batua."

41Ri wattunna pila’ a’reppese’ Isa ri Yerusalem, naNacini’mo anjo kotaya, angngarru’mi.

42Lalang angngarru’Na Nakana, "O kodong, baji’na mamo ka’de’ nuassemmo anne alloa apa lakkullea angngerang passiamakkang! Mingka kamma-kamma anne takkulleai nucini’.

43Nia’ sallang se’re wattu nabattu musunnu ampangngalakkiko ri tammulilinu; lanakurungko ke’nanga, siagang lanabundukiko battu ri sikontu oloang niaka ri tammulilinu.

44Lanaancurukko siagang sikontu bonenu; na tenanniakka manna sibatu batu tela lanakellai ammantang tassusung ri tampa’na, lanri tenana nanujampangi ri wattunna battu Allata’ala untu’ ampasalamakko!"

45Antama’mi Isa ri Balla’Na Batara, siagang Nabongkami sikamma padanggang niaka anjoreng.

46Nakana ri ke’nanga, "Nia’ tattulisi’ lalang ri Kittaka angkanaya: Nakana Allata’ala ‘Lanipareki BallakKu a’jari Balla’ Sambayang.’ Mingka ikau ngaseng, nupa’jari balla’ paella’!"

47Allo-allona angngajara’ Isa lalang ri Balla’Na Batara. Mingka ero’mi nibuno ri imang-imang kapalaya, siagang guru-guru agamaya, kammayatompa ri pamimping-pamimpinna tu Yahudia.

48Mingka lanri tuli jaina tau ampilangngeri kana-kananNa, siagang lanri nangaina ngaseng tau jaia ampilangngeri anjo kana-kana Napabattua Isa, tenamo nakkulle ke’nanga anggappa oloang anggaukangi pattujunna.



Download Audio MP3 (Lukas 19):
Mobile (Low Quality) - CD (High Quality)

 <<  Lukas 19 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel