1Teai ikambe, o, Batara, teai ikambe, mingka iKatteji musti nipuji, saba’ iKatte tamamminraya siagang tuli mangngamaseang.
2Angngapai bansa-bansaya namusti angkana, "Kemae Allata’alana ke’nanga?"
3Allata’alata niaki ri suruga, Nagaukangi apa Nakaerokia.
4Barhalana ke’nanga battu ri bulaeng siagang pera’ nipare’, bate pare’ limanna ke’nanga.
5Nia’ bawana mingka takkulleai a’bicara, nia’ matanna, mingka taccinikai.
6Nia’ tolinna, mingka takkulleai allangngere’, nia’ ka’murunna, mingka takkulleai angngara’.
7Nia’ limanna, mingka takkulleai anna’gala’, nia’ bangkenna, mingka takkulleai a’jappa, tena sa’ra assulu’ battu ri karro’-karro’na.
8Poro kamma tomminjo sarenna sikamma tau amparekai, siagang sikamma tau tappaka mae ri ia.
9He Israel, manrannuangko mae ri Batara, Iami antulungko siagang anjagaiko.
10He sikamma imang, manrannuangko mae ri Batara, Iami antulungko siagang anjagaiko.
11He sikamma tau mappilangngeria, manrannuangko mae ri Batara, Iami antulungko siagang anjagaiko.
12Mangngu’rangi Batara mae ri katte siagang laNabarakkakiki’, laNabarakkaki umma’ Israel siagang sikontu imang turunganna Harun.
13LaNabarakkaki sikamma tau mappilangngeria, baji’ tau ca’di kammayatompa lompoa.
14Poro Napassareangi Batara jai ana’ mae ri kau ngaseng siagang turungannu.
15Poro nibarakkakiko ri Batara, ampa’jariai langika siagang buttaya!
16Langika iamintu Bataraji bawang pata, mingka buttaya Napassareangi mae ri rupataua.
17Tena nipuji Batara ri tau matea, ri tau naungamo ri tampa’ sinoa.
18Mingka ikatte attallasaka appala’ sukkurukki’ mae ri Ia, anne kamma siagang satunggu-tungguna. Pujimi Batara!
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel