Alkitab Mobile SABDA
[VER] : [MAKASAR]     [PL]  [PB] 
 <<  Mazmur 18 >> 

1Untu’ pamimping pakelong. Kelong Pammujina Daud, atanNa Batara. Nakelongangi ri Batara ri wattunna nilappassang Daud battu ri Saul siagang battu ri musu-musunna. (18-2) Mangngaia’ ri Katte, o, Batara, iKattemi kagassingangku.

2(18-3) Batara sanrapang pa’la’langngang makassakku tampa’ pa’la’langangku. Allata’alaku sanrapang moncong batu tampa’ pa’la’langangku. Sanrapang pa’lapa’ antongkokia’, siagang anjagaia’ kutuli amang.

3(18-4) Makkioka’ ri Batara, siratanga nipuji, Ia allappassanga’ battu ri musu-musungku.

4(18-5) Nitammulilia’ ri bahayana kamateanga kunitambungi ri a’bana kapossokanga.

5(18-6) Nitammulilia’ ri bahayana kamateanga, sikko’na kamateanga niaki ri dallekangku.

6(18-7) Makkioka’ ri Batara lalang ri kasukkarangku, makkioka’ ri Allata’alaku appala’ pannulung. Battu ri Balla’na Nalangngereki sa’rangku na Naparhatikang pakkiokku.

7(18-8) Nampa ta’goccang siagang amme’bere’mo linoa, ta’lenggami siagang annekkere’mi bangkeng monconga napakamma larroNa Allata’ala.

8(18-9) Tassappuru’mi umbua battu ri so’bolo’ ka’murunNa, assulu’mi pepeka siagang bara pepeka battu ri bawaNa.

9(18-10) Napuemi langika nampa naung mae siagang rammang sassang irawangngang bangkenNa.

10(18-11) Anri’baki a’dongko’ malaeka’ akka’nyi’; allayang irate ri ka’nyi’na anginga.

11(18-12) Natongkoki kalenna siagang sassang; nikulilingi ri rammang le’lenga.

12(18-13) Battu ri kila’ niaka ri dallekanna, assuluki rammanga, bosi a’batu siagang pepe’.

13(18-14) Nampa a’gunturu’ Batara battu ri allaka; Kaminang Tinggia Napappilangngerangi sa’ranNa.

14(18-15) Napabuccuki ana’-ana’ panaNa nampa Napasimbung sikamma musua; Napasisambung-sambummi Napakila’ kila’Na, sa’genna lari ngaseng ke’nanga.

15(18-16) Tassungkemi bangkenna tamparanga siagang bangkenna linoa ri wattu Naga’gara’na Batara musunNa lalang larroNa.

16(18-17) Battu rate Napajonjo naung limanNa Batara; Nata’galakka’ nampa Nabesokka’ battu lalang ri je’ne’ lantanga.

17(18-18) Napasalamakka’ battu ri musu porea siagang battu ri tau mangngabirissia ri nakke, lanri kassa’ duduna ke’nanga untu’ inakke.

18(18-19) Nabakkaia’ ke’nanga ri wattu natujuku bala, mingka Batara a’jari pannulungku.

19(18-20) Nalappassanga’ battu ri bahayaya Napasalamaka’ lanri mangngellaiNa mae ri nakke.

20(18-21) Nabalasaki Batara panggaukang tojengku; Nabarakkakia’ lanri tena kusala.

21(18-22) Mannurukia’ ri parentaNa Batara na tena kumassaile ma’boko battu ri Allata’alaku.

22(18-23) Sikontu hukkunNa kuparhatikangi, tena kukaluppai sikamma parentaNa.

23(18-24) Naassengi angkana tena callangku siagang kupakabellai kalengku battu ri kasalanga.

24(18-25) Na Nabalasa’mo Batara panggaukang tojengku saba’ Naassengi angkana tena kusala.

25(18-26) O, Batara, iKatte majarre’ mae ri tau majarreka siagang baji’ mae ri tau bajika.

26(18-27) Ri tau matangkasaka Kipa’nyatai kalenTa matangkasa’, mingka Kimusui tau ja’dalaka.

27(18-28) Kipasalamaki tau tuna pa’maika, mingka Kipadundui tau tampoa.

28(18-29) Kiparinranga’ suloku, Batara Allata’alaku ansingari kasassangangku.

29(18-30) Kipakagassinga’ untu’ antumpasaki musua; lanri pannulunNa Allata’alaku nakutarrusu’ pannahanna ke’nanga.

30(18-31) Sukku’ ganna’na panggaukanNa Allata’ala akkulle nipatappa’ janjinNa Batara. Sanrapangi pa’lapa’ ri batangkale mae ri sikontu tau ma’la’langa mae ri Ia.

31(18-32) Saba’ Batarayaji bawang Allata’ala; Allata’alaji bawang akkulle ampattojengki’.

32(18-33) Iaji Allata’ala akkulle ampakajarreka’ siagang ampa’jari amangi oloangku.

33(18-34) Ia ampa’jari kassaki bangkengku sanrapang bangkeng jonga, siagang anjagai kasalamakkangku ri monconga.

34(18-35) Nalatia’ untu’ a’bundu’, sa’genna akkulle kupabantang anrong pana kaminang kassaka.

35(18-36) O, Batara, Kila’langia’ siagang Kipasalamaka’, Kipakajarreka’ siagang koasaTa; a’jari porema’ lanri gautTa.

36(18-37) Kijagaia’ sollanna tena najakkalakka’ musua, siagang tena kule’ba’ tu’guru’.

37(18-38) Kiondangi musungku nampa Kibeta ke’nanga, siagang tammono’bokoaKi’ sa’genna posso’ ke’nanga.

38(18-39) Kipatappasaki ke’nanga sa’genna takkullea ambangung poleang, anra’ba tenamo pakkullena ke’nanga ri dallekang bangkengku.

39(18-40) Kisarea’ kagassingang untu’ a’bundu’, siagang pammetang mae ri sikamma musungku.

40(18-41) Kipalari musungku battu ri nakke; Kipa’jari possoki sikamma tau mangngabirissia ri nakke.

41(18-42) Ammarrammi ke’nanga, mingka tena antulungi, akkio’mi ke’nanga ri Batara, mingka tena Nappiali.

42(18-43) Kiancuruki ke’nanga sanrapang limbu’bu’ tassimbunga, nampa Kibarrasa’ sanrapang peo’ ri aganga.

43(18-44) Kilappassanga’ battu ri tu dorakaya, nampa Kipa’jaria’ tukoasa ri bansa-bansaya; bansa tenaya kuassengi a’jari atangku.

44(18-45) Bansa-bansa maraenga tunduki mae ri nakke na mannuruki punna nalangngere’ parentaku.

45(18-46) Tenami kabaranianna ke’nanga; annekkere’ siagang assulu’ battu ri pammantanganna.

46(18-47) Batara mattallasaki! Nipujimi mappatojengku! Mala’biriki kalompoanNa Allata’ala mappasalamakku!

47(18-48) Nasarea’ pammetang mae ri musungku; Napadundui bansa-bansaya ri dallekangku,

48(18-49) napasalamakka’ battu ri sikamma balingku. Batara, Kisarea’ pammetang mae ri musungku, Kikatutuia’ battu ri sikamma tu sekkeka.

49(18-50) Jari kupakalompo maKi’ ri alla’na bansa-bansaya, siagang makkelomma’ pammuji-muji mae ri Katte.

50(18-51) Nasarei Allata’ala pammetang karaeng Naangkaka, tuli Nakamaseangi tu nipileNa, iamintu Daud siagang turunganna sa’genna satunggu-tungguna.



 <<  Mazmur 18 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel