Alkitab Mobile SABDA
[VER] : [MAKASAR]     [PL]  [PB] 
 <<  Ulangan 26 >> 

1"Punna antama’ mako ri pa’rasangang Napassareanga Karaeng Allata’alanu mae ri kau, siagang punna ammantang mako anjoreng,

2musti massing nupantamaki bageang uru-uru panggappannu battu ri pakkattoanga ri se’reang baku’, nampa nuerang mange ri tampa’ ibada le’baka nitantukang.

3A’lampamako mange ri imang tugasaka anjo wattua, siagang paui mae ri ia angkana, ‘Kupaumi mae ri Karaeng Allata’alanu angkanaya antamama’ ri pa’rasangang Napa’janjianga Batara mae ri boe-boena ikambe untu’ laNapassareang mae ri katte.’

4Lanatarimai imanga anjo bakuka battu ri limannu siagang napadongko’ ri dallekang tampa’ pakkoro’bangnganNa Karaeng Allata’alanu.

5Nampa, ri dallekanNa Batara, musti nupaui anne kana-kana kammaya: ‘O, Batara, anjo boe-boeku tau a’lampa battu ri Aram. Naerangi kaluargana mange ri Mesir untu’ ammantang anjoreng, a’jari tau battu-battu. Ri wattunna a’lampa ke’nanga mange anjoreng, sike’de’ji bilanna ke’nanga, mingka ri boko a’jari bansa lompomi siagang bansa kassa’mi ke’nanga.

6Sekke’ sikalimi panggaukanna tu Mesir mae ri kambe, siagang napassami ikambe anjama sangkamma ata.

7Nampa akkio’mo ikambe appala’ tulung mae ri Katte, Batara, Allata’alana boe-boena ikambe. Kipilangngeri pakkio’na ikambe siagang Kiparhatikammi kasessanna ikambe.

8Lanri KoasaTa siagang kagassingang malompoTa naKilappassang ikambe battu ri Mesir. Kigaukangi gau’-gau’ malompoa siagang appakalannasaka, kammayatompa Kipabattui kajariang-kajariang appakagegereka mae ri musua.

9Nampa Kierang ikambe mae anrinni siagang Kipassareang anne butta akkalumanynyanga siagang copponga mae ri kambe.

10Lanri kammana, o, Batara, kupassareangi anrinni bageang uru-uruna wassele’ kattoang kugappaya, mae ri Katte.’ Kammaminjo caranu ampassareangi anjo bakuka mae ri Karaeng Allata’alanu. Le’baki anjo, anynyomba mako mae ri Ia siagang

11appala’ sukkuru’ mako untu’ sikontu dalle’ le’baka Napassareang Karaeng Allata’alanu mae ri kau siagang kaluarganu. Kioki tu Lewi siagang bansa maraeng ammantanga ri alla’nu untu’ amminawang lalang ri anjo passua’-suarranga.

12Tunggala’ taung makatallu, musti assareko passare bage sampulona panggappannu, iamintu bage sampulona wassele’ kattoannu mae ri Imang Lewi, tubattu-battua, ana’-ana’ kukanga siagang jandaya, sa’genna ri tunggala’ kotaya anggappai ke’nanga kanre naparalluanga ke’nanga. Punna le’baki,

13angkana mako ri Karaeng Allata’alanu, ‘Battu ri bage sampulona wassele’ kattoang mustia nipassareang mae ri Katte, Batara, tena manna sike’de’ ammantang ri ballakku; yangasenna le’ba’mi kupassareang mae ri tu Lewi, tubattu-battua, ana’-ana’ kukanga siagang jandaya, sangkamma Naparentakanga Karaeng Allata’ala mae ri nakke. Battu ri parenta-parentaNa Batara ri passala’na passare bage sampuloa battu ri panggappanga, tena manna sirupa kudakkai.

14Battu ri anjo passare bage sampuloa battu ri panggappanga, manna sike’de’ tania’ kukanre ri wattungku susa kamateang; yareka tena kuerang assulukang balla’ ri wattungku ra’masa’, yareka kupassareangi salaku pappatala untu’ tau matea. Mannurukima’ mae ri Katte, o, Batara; sikontu apa Kiparentakanga ri passala’na anjo passare bage sampuloa battu ri panggappanga, le’ba’mi kugaukang ngaseng.

15Battu ri tampa’ katangkasanTa ri suruga poro ero’ lalo maKi’ amparhatikangi siagang ambarakkaki ummatTa Israel; barakkaki tongi anjo pa’rasangang kalumanynyanga siagang copponga buttana, anjo Kipassareanga mae ri kambe, situru’ janjinTa mae ri boe-boena ikambe.’"

16"Anne alloa Naparentakangi Karaeng Allata’alanu mae ri kau sollanna nuturuki sikontu paratoranNa; turuki yangasenna anjo lalang sikontu pa’mai’nu siagang batangkalennu.

17Anne alloa nuakui Batara salaku Allata’alanu. A’janjiko untu’ mannuruki mae ri Ia, siagang anggaukangi sikontu hukkunNa kammayatompa parentaNa.

18Anne alloa Natarimako Batara salaku umma’ KalenNa, sangkamma Napa’janjianga mae ri kau, siagang Naparentakangi mae ri kau sollanna nuturuki sikamma hukkunNa.

19LaNapa’jari malompoangangko Batara na sikontu bansa maraeng le’baka Napa’jari, kammayatompa lanipujiko siagang lanipakalompoko. La’jariko umma’Na Karaeng Allata’ala, sangkamma le’baka Napa’janjiang."



Studi lengkap, silahkan lihat: Alkitab SABDA.
Dengar dan baca Alkitab Karaoke, silahkan kunjungi: Alkitab Karaoke.
Rencana Multimedia Baca Alkitab: BaDeNo.
Studi Alkitab dengan AI: Alkitab GPT.

 <<  Ulangan 26 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Alkitab GPT
Bantuan
Single Panel Single Panel