1Nakana Batara ri nakke,
2"Parhatikangi sara’-sara’na parjanjiang Kupareka siagang ummakKu. Pauangi tu Yehuda siagang pandudu’na Yerusalem angkanaya
3iNakke, Karaeng Allata’alana Israel, antunrai inai-nai mamo tenaya namannuruki ri sara’-sara’na anjo parjanjianga.
4Le’ba’mi Kupare’ anjo parjanjianga siagang boe-boena ke’nanga ri wattunna Kuerang ke’nanga assulu’ battu ri Mesir, iamintu pa’rasangang rapanga naraka mae ri ke’nanga. Kusuroi ke’nanga mannuruki mae ri Nakke siagang nagaukang sikontu apa le’baka Kuparentakang. Kamma-kamma anne Kupau tommi mae ri tu Yehuda siagang pandudu’na Yerusalem angkanaya punna mannuruki ke’nanga ri Nakke, la’jarimi ke’nanga ummakKu siagang iNakke Allata’alana ke’nanga.
5Punna nagaukang ngaseng ke’nanga anjo sikammaya, laKurupai janjingKu mae ri boe-boena ke’nanga angkanaya pa’rasangang copponga siagang kalumanynyanga, ia napammantangngia ke’nanga kamma-kamma anne, laKupassareangi mae ri ke’nanga." Appialima’ angkana, "Baji’mi, Batara."
6Nampa Nakana Batara ri nakke, "A’lampako mange ri kota-kotaya ri Yehuda, siagang mange ri sikamma aganga ri Yerusalem. Pabattui anne pasangKu mae ri sikontu tau niaka anjoreng. Suroi ke’nanga amparhatikangi siagang anturuki sara’-sara’na parjanjiangKu.
7Ri wattunna Kuerang boe-boena ke’nanga assulu’ battu ri Mesir, Kuterassi Kupakainga’ ke’nanga sollanna mannuruki ri Nakke. Manna sa’genna ri kamma-kammaya anne tulusu’ Kupakainga’na ummakKu ri anjo passalaka,
8siagang Kusuroi ke’nanga mannuruki ri anjo parjanjiangKu, mingka taerokai ke’nanga mappilangngeri siagang mannuruki. Ba’lalo tuli kapala batuna siagang ja’dala’na ke’nanga sangkamma riolo. Lanri kammana anjo sikontu hukkungang niaka tattulisi’ lalang ri anjo parjanjianga Kupabattumi mae ri ke’nanga."
9Nampa Nakana pole Batara ri nakke, "Tu Yehuda siagang pandudu’na Yerusalem assikongkolo’mi ero’ ambaliangA’.
10Nagaukammi ke’nanga dosa le’baka nagaukang boe-boena riolo tenaya naero’ mannuruki ri Nakke, anynyomba ri rewata-rewata maraeng siagang taerokai anturuki parentaKu. Baji’ na Israel kammayatompa tu Yehuda, nadakkaimi parjanjiang le’baka Kupare’ siagang boe-boena ke’nanga.
11Lanri kammana anjo, iNakke, Batara, Kupappakaingakkangi angkanaya lappaturungA’ bala mae ri ke’nanga, siagang takkulleai ke’nanga alliliangi. Punna akkio’ ke’nanga appala’ tulung ri Nakke, teA’ ampilangngeri.
12Nampa a’lampa tu Yehuda siagang pandudu’na Yerusalem mange appala’ tulung ri rewata-rewata maraeng napakalompoa assare koro’bang. Tena nalanakulle anjo rewata-rewataya ampasalamaki ke’nanga ri wattunna battu balaya.
13Jai sikali rewata-rewatana tu Yehuda, sangkamma jaina kota-kotana ke’nanga. Pandudu’na Yerusalem appaentengi tampa’-tampa’ pakkorobangngang sangkamma jaina agang-agang ri kota Yerusalem untu’ assare koro’bang mae ri Rewata Baal.
14Lanri kammana anjo Yeremia, teako appala’ doangngi untu’ ke’nanga yareka teako appala’ tulungi mae ri Nakke untu’ ke’nanga. Punna lalang kasukkarang ke’nanga nappala’ tulung mae ri Nakke, tena Kuero’ ampilangngeri ke’nanga."
15Nakana Batara, "UmmakKu Kukamaseanga nagaukammi apa-apa ja’dalaka. Tenamo nasiratang ke’nanga antama’ ri BallakKu. Nakapangi ke’nanga angkanaya lanri appare’ janji-janji, siagang lanri assare olo’-olo’, akkullei napalili ke’nanga balaya. Maka lanri kammana anjo nakkulle ke’nanga ammeta?
16Le’baki Kuareng ke’nanga poko’ zaitun coppong leko’na, rassi siagang rappo-rappo baji’. Mingka, kamma-kamma anne lalang sa’ra gamarrung lompo laKutunu ngasengi leko’na siagang laKutepo’ ngasengi tangke-tangkenna.
17INakke ampaentengi Israel siagang Yehuda, iNakke, Batara Kaminang Koasaya. Mingka, kamma-kamma anne le’ba’mi Kurancanakang laKupabattu balaya mae ri ke’nanga. Kalenna tonji ke’nanga a’jari passabakkang mae ri anjo sikammaya bala, lanri nagaukanna kaja’dallanga, iamintu assarena koro’bang mae ri Rewata Baal, sa’gengKu larro."
18Napauanga’ Batara ri passala’na rancana ja’dala’na musu-musua mae ri nakke.
19Rapanga’ gimbala’ tenaya ranggaselana nierang mange ri pamolonganga. Takuassengai angkanaya inakke nataba rancana ja’dala’na ke’nanga. Nakana ke’nanga, "Umba nanita’bangi anne poko’ kayua lalang akkullena ija a’rappo; nipanraki sollanna nikaluppaimo arenna ri taua."
20Nampa appala’ doamma’ angkana, "O Batara Kaminang Koasaya, iKattemi haking adeleka; iKatte angngassengi pikkiranna siagang atinna taua. Anne parkaraku kubuangi mae ri Katte. Poro akkulle laloi kucini’ angkanaya iKatte ambalasaki panggaukanna sikamma anjo taua."
21Nakellai sikalia’ taua ri kota Anatot sollangku mate. Nakana ke’nanga, "Punna tulusu’ nupabattuna pasang-pasanNa Batara mae ri kambe, lanibunoko ri kambe."
22Lanri kammana anjo, Nakanamo Batara Kaminang Koasaya, "LaKuhukkungi ke’nanga! Sikamma tau rungkana ke’nanga lamatei lalang pa’bundukang, lamate cipuruki ana’-ana’na ke’nanga.
23Le’ba’mi Kupattantu wattunna untu’ ampaturungi balaya mae ri tu Anatot, siagang punna battumo wattu hukkunganna ke’nanga, manna sitau tania’ lata’lappasa’."
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel