1Nakana Batara ri nakke,
2angkana, "A’lampako mange ri balla’na papare’ uringa; anjoreng laKupabattuangko pasangKu."
3Jari a’lampama’ mange ri balla’na papare’ uringa na kuciniki sitabang anjama.
4Punna kurang baji’ pare’na uringa, najama poleangi ammotere’ a’jari uring maraeng situru’ pare’na apa nakaerokia.
5Nampa Nasuroa’ Batara ampabattui ri umma’ Israel, angkana,
6"He ummakKu, maka latena nakkulle Kugaukang sangkamma anjo apa nagaukanga papare’ uringa battu ri butta pi’na? Rapang butta pi’ lalang ri limanna papare’ uringa, kamma tommako anjo lalang limangKu.
7Punna ri se’reang wattu Kupattantui Kupasinta’, Kuruntung siagang Kuancuru’ se’rea bansa yareka kakaraengang,
8nampa toba’ anjo bansaya battu ri dosana, laKupaonoki anjo pattujungKu.
9Kabalekanna, punna Kutappuki untu’ ampaentengi yareka ampakajarreki se’rea bansa yareka kakaraengang,
10mingka ribokoanganna tena naero’ mannuruki anjo bansaya ri Nakke nampa nagaukang ja’dalaka, laKupaonoki anjo pattujungko."
11Nakana Batara ri nakke, "Kamma-kamma anne, pabattui mae ri sikamma tu Yehuda siagang pandudu’na Yerusalem angkanaya kamma-kamma anne apparekKa’ rancana untu’ ambaliangi ke’nanga, siagang Kupasadiangi ke’nanga hukkungang. Suroi ke’nanga ampamari cara tallasa’na ke’nanga dorakaya kammayatompa napakabajiki panggaukanna ke’nanga.
12Mingka lappiali ke’nanga angkana, ‘Apa matu-matunna? Tuli lamannuruki ikambe ri ero’ kalenna ikambe! Ikambe massing nagaukangi apa nakaerokia pa’mai’na ikambe ja’dalaka!’"
13Nakana Batara, "Pakkuta’nangngangi mae ri tunggala’ bansaya, angkanaya apaka le’baki kajariang passala’ kammaya anne? Le’ba’mi nagaukang umma’ Israel apa appakaringi’-ringika!
14Tena le’bakai lanynya’ bosi a’batua battu ri moncong batuna Libanon. Tena le’bakai je’ne’ dinging a’lo’loroka ri pa’monconganga a’jari kalotoro’.
15Mingka ummakKu takkaluppami ri Nakke, nampa attunu dupa untu’ barhalaya. Tatto’roi ke’nanga ri oloang mustia naolo ke’nanga riolo dudu, nampa ammengka ri oloang tenayapa nanilappari.
16Anne pa’rasanganga napa’jarimi ke’nanga tampa’ appakaringi’-ringi’, siagang tuli a’jari pa’rasangang nicau-cau. Sikontu tau allaloa ammenggong ngaseng ulunna lanri ringi’-ringi’na.
17Rapang limbu’bu’ nairika anging, kammaminjo batena ummakKu laKupasiara’ ri dallekanna musua. Punna battu cilakaya, laKubokoi ke’nanga siagang taeroKa’ antulungi ke’nanga!"
18Nakana taua, "Umba kissikongkolo’ angngewai Yeremia. Tena naiaja bawang akkulle a’bicara untu’ Allata’ala. Tuli lania’na imang akkulle assare pangngajarang, nia’ tucara’de’ akkulle assare pappakainga’; siagang nia’ na’bi akkulle ampabattui mae ri katte sikamma pasang battua ri Allata’ala. Umba nanituntuki ri pangadelanga nampa tenamo nanilangngereki kana-kananna."
19Jari appala’ doamma’ angkana, "O Batara, Kipilangngeri pappalakku; Kiparhatikangi anjo apa napaua musungku ri passala’na kalengku!
20Maka siratangi kabajikanga nibalasa’ siagang kaja’dallang? Mingka le’ba’mi ke’nanga angngeke kali’bong sollanna kutu’guru’ antama. Kiu’rangi angkanaya le’ba’mi ke’nanga kualle-alleang ri dallekanTa, sollanna tena Kilarro mae ri ke’nanga.
21Mingka kamma-kamma anne, Batara, lappassammi mate cipuru’ ana’-ana’na ke’nanga yareka mate lalang pa’bundukang. Lappassammi tubai’-bainena ke’nanga tappela’ bura’nenna siagang ana’na; lappassammi tubura’-bura’nea mate naalle garring siagang turungkana mate lalang pa’bundukang.
22Suroi paellaka ti’ring battu ri balla’na ke’nanga, sa’genna ammurici’ ke’nanga napakamma malla’. Le’ba’mi ke’nanga angngeke kali’bong sollanna kutu’guru’ antama, siagang le’ba’mi ke’nanga attannang sikko’ untu’ anjakkalakka’.
23Mingka iKatte, o Batara, Kiassengi sikontu apa narancanakanga ke’nanga untu’ angngallei nyawaku. Lanri kammana anjo, teaKi’ pammopporangngi ke’nanga; teaKi’ lu’luki kasalanna ke’nanga. Kitunrungi ke’nanga sa’genna tu’guru’. Angngalle maKi’ tindakang mae ri ke’nanga lanri larroTa."
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel