1Imang Pasyhur ana’na Imer kapala pangawasa’ ri Balla’Na Batara. Ri wattu nalangngere’na kupa’la’bang kupau yangasenna anjo passalaka,
2naparentakammi sollangku nitunrung siagang niepong ri Pakke’bu’ Lompo Benyamin, pakke’bu’ lompo bageang ratena Balla’Na Batara.
3Bari’basa’na pole ammuko, ri le’bakku nilappassang nisikko’ ri Pasyhur, kukanamo ri ia, "Areng Napassareanga Batara mae ri kau teai Pasyhur, mingka ‘Pammunoang ri kere-keremae.’
4KalenNa Batara angkana, ‘Lanipa’jariko pabuno-buno ri kalennu tonji siagang mae ri agang-agannu tonji. Lanuciniki ke’nanga nibuno ri musunna ke’nanga. Sikontu tu Yehuda laKubalang parekangi nikoasai ri karaeng Babel; sipa’gang battu ri ke’nanga lanaengkaki salaku tunitahang mange ri Babel, nampa la’binna nibunoi.
5LaKulappassangi musunna ke’nanga anrampasaki siagang angngengkaki mange ri Babel sikontu kakalumanynyangnganna siagang barang-baranna anne kotaya, ba’lalo barang-barang pisakana sikamma karaenna Yehuda.
6Siagang ikau, Pasyhur, siagang sikontu kaluarganu lanijakkala’ tongko nampa niengkakko mange ri Babel. Anjorengko lamate siagang nitarawang; kammayatompa sikontu agannu le’baka allangngereki sikamma balle-ballenu.’"
7Batara, iKatte anynyonyokka’ siagang inakke le’ba’ma’ ninyonyo’. IKatte la’bi gassingKi’ nainakke siagang le’ba’ma Kipadundu. Nicau-caua’ ri tunggala’ taua, nihina battu ri bari’basa’ sa’genna karueng.
8Punna kua’bicara, musti ammarranga’ sigassing-gassingku, angkana, "Kapallakkang! Bala!" O Batara, Nicau-caua’ ri kere-kere wattu, lanri kupabattuna pasanTa.
9Mingka punna lalang atingku kukana, "Boli’mi kamma kukaluppai Batara, teama’ a’bicara lalang arenNa," rapammi pepe’ pasanNa a’bara ilalang ri ati mailalangku. Le’baki kucoba amparrangngi, mingka ma’nassa tena nakukullei.
10A’bici’-biciki nilangngere’ taua ri kere-keremae, angkana, "Battui mallaka a’la’bang! Umba nilaporoki mae ri pamarentaya!" Ba’lalo sikontu agang bajikku naminasai katu’gurangku. Nakana ke’nanga, "Gassingka lanri panynyonyoppa, nakkulle nibeta, sollanna nikkulle ambalasaki larro niboli’-bolitta ri ia."
11Mingka iKatte, o Batara, niakKi’ angngentenganga’; iKatte tamaka gassinTa na Kikassa’. Anjo ke’nanga angngondangia’ siagang anjallakkangia’ latu’guruki natena pakkullena. Lasiri’-siriki ke’nanga satunggu-tungguna, salasai sikontu rancanana ke’nanga. Anjo tunana ke’nanga latuli niu’rangi.
12Mingka, o Batara Kaminang Koasaya, Kiso’ri rupataua siagang adele’; Kiassengi atinna siagang pikkiranna ke’nanga. Lanri kammana Kisare laloa’ pangngellai ancinikKi’ ambalasaki kaja’dallanna musua nasaba’ kubuammi mae ri Katte parkaraku.
13Makkelongko mae ri Batara siagang pujimi nasaba’ Ia allappassangi tau nijallakkanga battu ri koasana tau dorakaya.
14Nitunrai allo kalassukangku! Boli’mi kamma na’jari tuna wattu nilassukangku ri ammakku.
15Nitunrai tongi tau angngeranga kabara’ ampa’jari sannang duduai manggeku, ri wattunna nipau ri ia, angkana, "Anggappako sitau ana’ bura’ne!"
16Boli’mi kamma anjo angngeranga kabara’ a’jari sangkamma anjo kota-kota niancuruka tanikamaseang ri Batara. Boli’mi kamma allangngere’ tau ammarrang napakamma pa’risi’ ri wattu bari’basa’, siagang sa’ra ammarrang ri pa’bundukang ri tangngana alloa.
17Nasaba’ tena nanabunoa’ ri wattungku nitianangngang ija, sollangku tuli nitianangngang ri ammakku siagang pammanakkanna a’jari jerakku.
18Angngapa kumusti nilassukang? Poro untu’ pa’risi’ siagang kasukkarang? Siagang sollanna allalo tallasakku lalang siri’-siri’ bawang?
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel