Alkitab Mobile SABDA
[VER] : [MAKASAR]     [PL]  [PB] 
 <<  Yeremia 9 >> 

1Tamaka baji’na ka’de’ ulungku rapangi bungung rassia je’ne’, na matangku rapangi salu’ je’ne’ tulusu’ assolonga je’ne’na! Nakuakkulle angngarru’ allo bangngi, angkarruki julu bansaku nibuno ri musu.

2Ka’de’ kukkulle anggappa ri parang luara’ pa’bangngiang untu’ tau lalang pa’jappang! Lakubokoi bansaku, kulari mange anjoreng untu’ ampakabellai kalengku battu ri ke’nanga. Tau pabali’ ballang ngasengi ke’nanga, passe’reang tau tenaya namajarre’ pa’mai’na,

3siagang tau tuli sadia a’balle-balle. Ri sikontu pa’rasangang, tena koasana katojenganga, ba’lalo kajekkonganga teai sipato’ jaina. Nakana Batara, "Tena ammari-marina ummakKu anggaukangi kaja’dallanga, tena naaniA’ salaku Allata’alana ke’nanga."

4Musti tutui taua, manna pole ri aganga tonji siagang manna sari’battang polong parruka takkulle ngaseng nipatappa’. Nasaba’, sangkamma Yakub kamma tomminjo ke’nanga, massing natipui sari’battanna. Tunggala’ taua a’jappai mange-mange untu’ appasiara’ pitina siagang balle-balle.

5Yangasenna massing sitipu-tipui, tenamo a’bicara lambusu’. Biasami bawana a’balle-balle, tanakulleai ambokoi dosana. Tuli kapallakkang, tuli pannipuang nagaukanga tojeng ke’nanga, nasorongboko tojemmi ke’nanga Batara.

6(9:5)

7Lanri kammana anjo Nakanamo Batara Kaminang Koasaya, "Rapang bulaeng, laKuso’ri ummakKu sollanna a’jari ti’no’ ke’nanga. Apapi pole akkulle Kugaukang mae ri ummakKu le’baka a’gau’ ja’dala’?

8Sanna’ bahayana kana-kananna ke’nanga, akkullei ammuno rapang pana niaka racunna. Poro balle-balle bawang pau-pauna ke’nanga. Te’nei angngalle pa’mai’ kana-kananna ke’nanga, mingka sikontutojenna attannanji sikko’ ke’nanga.

9Antekamma anjo bansa kammaya taKupitujui hukkungang siratanga? LaKubalasaki panggaukanna ke’nanga; iNakke, Batara, anne akkana!"

10Inakke, Yeremia, kukana, "Erokka’ angngarru’ siagang susai pa’maikku lanri sikamma rukuka ri paranga siagang ri moncong-monconga kalotoro’ sikalimi siagang tanioloami ri tau. Tenamo nilangngere’ sa’ra olo’-olo’, jangang-jangang siagang olo’-olo’ maraenga lari ngasemmi siagang lanynya’ ngasemmi."

11Nakana Batara, "LaKupa’jari rumbangngang Yerusalem tampa’ paccokkoanna kongkong romanga. Kota-kota Yehuda la’jari sinoi, tampa’ tenayamo nanipammantangngi."

12Akkuta’nanga’ angkana, "Batara, angngapa nanibalang parekang anne pa’rasanganga a’jari roso’ siagang kalotoro’, sangkamma parang luara’ tenaya ampanumaloi? Maka nia’ akkulle cara’de’ untu’ ampahangi apa battuanna yangasenna anne? Inai tau le’ba’ Kipisingariang sollanna akkulle napatulusu’ anjo kasingaranga mae ri tau maraenga?"

13Appialimi Batara angkana, "Nakajariang anjo kammaya lanri tenanamo naparhatikangi ummakKu ajarang-ajarang le’baka Kupassareang mae ri ke’nanga. Taerokai ke’nanga mannuruki mae ri Nakke, siagang taerokai amminawang ri parenta-parentaKu.

14Kapala batui ke’nanga siagang anynyombai ri barhala-barhala Baal sangkamma napangngajarranga boe-boena mae ri ke’nanga.

15Lanri kammana anjo, pilangngeri apa laKugaukanga, Batara Kaminang Koasaya, Allata’alana Israel: laKusarei ummakKu lamungang pai’ untu’ nakanre siagang racung untu’ nainung.

16LaKupasiaraki ke’nanga mange ri alla’na bansa-bansa tenaya naassengi ke’nanga yareka ri boe-boena ke’nanga. Latulusu’ appabattuA’ tantara untu’ ambunduki ke’nanga sa’genna Kuancuru’ taba sikali ke’nanga."

17Nakana Batara Kaminang Koasaya mae ri umma’Na, "Parhatikangi apa kajarianga kamma-kamma anne anrinni ri pa’rasanganga, siagang kio’mi linta’ sikamma tau appiraunga. Suroi ke’nanga battu, na nakelongang kelong-kelong susaya."

18Nakana tu Yehuda, "Suroi ke’nanga akkelong linta’ kelong-kelong susaya untu’ ikatte ngaseng, sollanna assolong-solong je’ne’ matanta ambasai pilisitta."

19Ri Sion nia’ kalangngerang sa’ra karru’, angkana, "Panrakki’ siagang sanna’ nipakasiritta. Pa’rasanganta musti nibokoi, sikamma ballatta musti ancuru’ tassimbung-simbung."

20Kukana, "Pilangngeri kana-kananNa Batara he ikau ngaseng tubainea! Pangngajarrangi mae sikamma tulolonnu kelong-kelong karruka, mange ri agang-agannu kelong-kelong kasusaanga.

21Antama’mi kamateanga ri tontonganga, annarrusu’ antama’ ri balla’ karaenga; nabakkai ana’-anaka ri aganga kammayatompa turungkaya ri paranga.

22Tassiara’mi mayaka ri kere-keremae sanrapang loro irate ri buttaya; rapang gandung le’baka nikatto nampa nibokoi nampa tenamo nanipasse’rei. Iaminjo pasanNa Batara mustia kukabarrang."

23Nakana Batara, "Tau cara’deka takkulleai lompo pa’mai’ lanri kacara’dekanna, tau gassinga lanri kagassinganna, siagang tau kalumanynyanga lanri kakalumanynyangnganna.

24Inai ero’ lompo pa’mai’ ri passabakkang apa-apaya, musti lompo pa’maiki passabakkang naassengKu siagang napahangKu; angkanaya naassengi angkana mangngamaseangA’ sa’genna satunggu-tungguna na Kupaenteng hukkunga siagang kaadelanga ri lino. Yangasenna anjo napakasannangi atingKu. INakke, Batara, akkana kamma anjo."

25Nakana Batara, "Lanarapiki sallang wattunna naKuhukkung tu Mesir, Yehuda, Edom, Amon, Moab, siagang pandudu’na parang lompoa ancukkuru’ bodoai uu’na. Nisunna’ ngasengi ke’nanga sangkamma tu Israel, mingka baji’ nake’nanga kammayatompa bansa Israel nipasangkammai siagang sikamma tau tenaya nisunnaki, lanri tenana namannuruki ke’nanga ri parjanjiang nipangngebaranga lalang sunnaka anjo."

26(9:25)



 <<  Yeremia 9 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel