1Iaminne carita ri passala’na antekamma batena nibage-bage pa’rasangang Kanaan niaka ri laukanna Binanga Yordan mae ri umma’ Israel. Ambage-bageai anjo buttaya mae ri umma’ Israel iamintu Imang Eleazar, Yosua ana’na Nun, siagang kapala-kapala kaluarga niaka lalang ri suku-suku bansa Israel.
2Kamma le’baka Naparentakang Batara mae ri Musa, anjo daera-daera ilaukanna Binanga Yordan nitantukanga untu’ salapang assititangnga suku bansa Israel, musti nibage-bagei, iamintu niloterei carana.
3Butta niaka irayanganna Binanga Yordan le’ba’mi napassareang Musa mae ri rua assitangnga suku maraenga ri bansa Israel. (Parallui niasseng angkanaya jari-jarina Yusuf ta’bage ruai suku: iamintu suku Manasye siagang suku Efraim.) Ri passala’na suku Lewi, tena butta nisareangi ri Musa. Poro kota-kota pammantangnganji nisareangi ke’nanga siagang parang-parang untu’ olo’-olo’ sapina siagang gimbala’na ke’nanga.
4(14:3)
5Kammaminjo batena umma’ Israel ambage-bagei anjo buttaya situru’ apa le’baka Naparentakang Batara mae ri Musa.
6Ri se’reang allo battui suku Yehuda mange ri Yosua ri Gilgal. Kalase’renna battu ri anjo ke’nanga iamintu Kaleb ana’na Yefune tu Kenas, angkana, "Yosua, nuassengi apa kananNa Batara mae ri Musa, anjo suroNa Allata’ala, ri Kades-Barnea ri passala’na ikau siagang inakke.
7Patampulo taung umurukku ri wattunna nasuroa’ Musa, anjo atanNa Batara, battu ri Barnea salaku mata-mata untu’ ansalidiki anne pa’rasanganga. Nampa ammoterekka’ mae ri ia angngerang laporang silambusu’na.
8Sikamma tau kuaganga a’lampa, napakamalla’-mallaki umma’ Israel. Mingka inakke tuli majarreka’ mannuruki ri Karaeng Allata’alaku.
9Na lanri kammana anjo, a’janjimi Musa mae ri nakke angkanaya anjo butta le’baka kujappai mattantu lanipassareangi mae ri nakke siagang ana’-anakku a’jari butta pisakana ikambe sa’genna satunggu-tungguna.
10Kamma-kamma anne patampulomi allima taung baku’ le’ba’na Napau Batara anjo passalaka mae ri Musa. Anjo kajariangi ri wattu sitabanna a’jappa alla’bang bansa Israel ri parang kassika. Na kamma le’baka nipa’janjiang ri Batara, le’ba’ma’ Nala’langngi Batara sa’gengku attallasa’ ija sa’genna kamma-kamma anne. Ciniki, kamma-kamma anne sagantuju pulomi allima taung umurukku,
11mingka gassingija’ sangkamma ri wattungku nisuro ri Musa. Gassingiji tubuku untu’ a’bundu’ yareka anggaukangi jama-jamang apa mamo.
12Lanri kammana anjo, sareamma’ kamma-kamma anne daera pa’moncongang Napa’janjianga Batara mae ri nakke ri wattungku ammotere’ siagang sikamma tau kuaganga angngerang laporang. Anjo wattua kalennu allangngereki, angkanaya anjoreng nia’ bansa lompo tinggia pakkaleanna, niarenga bansa Enak. Lalangi ke’nanga ri kota-kota lompo nitemboka tammulilina ammantang. LaNatulunga’ kapang Batara, sa’genna akkulle kubongka ke’nanga, sangkamma Napaua Batara."
13Jari nabarakkakimi Yosua anjo Kaleb ana’na Yefune, nampa napassareang mae ri ia kota Hebron a’jari butta pisakana.
14Sa’genna kamma-kamma anne anjo kotaya tuli a’jarina pisakana jari-jarina Kaleb ana’na Yefune, tu Kenas, lanri tuli majarre’na siagang mannurukinna mae ri Batara, Allata’alana Israel.
15Riolo anjo Hebron niarengi Arba. (Arba iamintu tau Kaminang Lompoa pakkaleanna ri sikontu bansa Enak.) Na amang siagang salewangammo anjo pa’rasanganga, tena nanisusai ri pa’bundukang.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel