1Nampa nakio’ Yosua tau battua ri suku Ruben, suku Gad siagang suku Manasye bageang rayaya,
2na nakana mae ri ke’nanga, "Le’ba’mi nugaukang sikontu apa naparentakanga Musa, anjo atanNa Batara, mae ri kau. Nampa nuturuki ngaseng tommi parentaku.
3Anne siapa sallona tale’bakai nubalang parekang sikamma sari’battannu, iamintu tu Israel maraenganga, a’bundu’ kalenna. Le’ba’mi nuturuki parenta-parentaNa Karaeng Allata’alanu siagang pa’mai’ attojeng-tojeng.
4Jari situru’ janjinNa, le’ba’mi Nasare Karaeng Allata’alanu kasalewangngang anjo sikamma sari’battannu maraenga, parannu tu Israel. Jari, kamma-kamma anne ammotere’ mako mange ri daera kalennu ri daera rayanganna Binanga Yordan, le’baka napassareang Musa mae ri kau pirangalloang.
5Siagang tutuko sollanna nukatutui hukkung naparentakanga Musa mae ri kau, iamintu: Mangngamaseangko mae ri Karaeng Allata’alanu, pinawangi ero’Na, turuki parenta-parentaNa, majarre’ pa’maikko mae ri Ia, siagang pare’ atai kalennu mae ri Ia lalang sikontu atinnu siagang sikontu nyawanu."
6Nampa napassareang barakka’na Yosua siagang nalappassang ke’nanga ammotere’ mange ri daerana ke’nanga. Napasangi ke’nanga angkana, "Kamma-kamma anne kalumanynyang mako; angngerang mako ammotere’ jai olo’-olo’, pera’, bulaeng, tambaga, bassi siagang pakeang. Bage-bage tongi anjo barang-barang nurampasaka lalang bundu’ mange ri sikamma julu sukunu maraenga." Jari nabokoimi suku Ruben, Gad siagang suku Manasye bageang irayaya anjo paranna tu Israel maraenga, nampa a’lampa battu ri Silo ri Kanaan mange ri butta kalenna ke’nanga ri daera Gilead. Napammantangngimi ke’nanga anjo buttaya situru’ parentaNa Batara tete ri Musa. (Anjo bageruanna suku Manasye le’ba’mi natarima battu ri Musa butta niaka irayanganna Binanga Yordan, siagang bageruanna suku Manasye maraenga natarimai battu ri Yosua butta niaka ilaukanna Binanga Yordan sangkamma suku-suku maraenga.)
7(22:6)
8(22:6)
9(22:6)
10Ri wattunna battu suku Ruben, suku Gad siagang suku Manasye bageang irayaya mange ri Gelilot — bageang lau’na iji Binanga Yordan — ambangummi ke’nanga se’re tampa’ pakkoro’bangngang lompo siagang gammara’ ri ampi’na binangaya.
11Nalangngere’mi tu Israel maraenga akkana julu bansana, "Le’ba’mi suku Ruben, Gad, siagang Manasye bageang irayaya ambangung se’re tampa’ pakkoro’bangngang ri Gelilot ri ampi’na Binanga Yordan lalang daerata." Jari asse’remi ke’nanga ri Silo, ero’ ambunduki suku-suku Israel ammantanga ri bageang rayanganna anjo Binanga Yordan.
12(22:11)
13Nampa nisuromo Pinehas, ana’na Imang Eleazar, ri umma’ Israel a’lampa mange ri suku Ruben, suku Gad siagang suku Manasye bageang rayaya ri daera Gilead.
14Nia’ pole naagang Pinehas a’lampa, iamintu sampulo tau toa-toana bansa Israel, tasse’re tau battu ri tunggala’ suku niaka ri laukanna Binanga Yordan, iamintu massing kapala kaluarga lalang ri golonganna ke’nanga.
15Nabattumo ke’nanga mange ri tampa’na suku Ruben, suku Gad siagang suku Manasye rayaya ri daera Gilead.
16Nampa lalang arenna sikontu umma’Na Batara, nakanamo ke’nanga mae ri suku Ruben, suku Gad siagang suku Manasye rayaya ri Gilead, "Angngapa nugaukangi anne panggaukang ja’dala’ kammaya mae ri Allata’alana Israel? Lanri nubangunna anne tampa’ pakkoro’bangngang kalennu, nuewami Batara! Tenamo nanuturuki parenta-parentaNa!
17Apa tenamo nanuu’rangi dosata ri Peor? Anjo wattua nihukkungki’ ri Batara siagang garring, manna naikatte anne umma’ kalennaKi’! Sa’genna kamma-kamma anne tuli nitanggonna kale’bakkang kakodianna! Maka tanggannakkapi anjo kammaya?
18Nampa kamma-kamma anne erokko ambokoi poleangi Batara? Punna nuewa anne alloa Batara, ammuko lalarroi mae ri sikontu umma’ Israel.
19Punna ra’masa’ anjo daeranu siagang tena nasiratang nipa’jari tampa’ ibada mae ri Batara, a’lette’ mako mae anrinni, ri daeraNa Batara, ri tampa’ niaka KemaNa Batara. Palaki sipa’gang daerana ikambe, mingka teako angngewai mae ri Batara yareka teako ewai ikambe lanri nutambaina tampa’ pakkoro’bangnganga nampa nia’mo tampa’ pakkoro’bangnganNa Karaeng Allata’alata.
20U’rangi, anjo Akhan ana’na Zerah taerokai anturuki parentaNa Batara ri passala’na barang-barang mustia niancuru’; nampa apa kale’bakkanna? Nihukkungi sikontu umma’ Israel! Akhan bawang doraka, mingka teai kale-kalenna bawang mate!"
21Appialimi suku Ruben, suku Gad siagang suku Manasye rayaya, angkana,
22"Kaminang Makoasaya iamintu Batara! Kaminang Makoasaya iamintu Batara! Naassengi angkanaya apa saba’na nanagaukang ikambe anne passalaka, siagang ero’ tongi ikambe sollanna nuasseng tongi anne passalaka. Ebara’ angkana nagaukangi ikambe anne kammaya lanri ero’na ikambe angngewai Batara, yareka lanri tenanamo natappa’ ikambe mae ri Ia, boli’mi kamma namate memang ikambe kamma-kamma anne!
23KalenNa Batara anghukkungi ikambe, punna lanri ero’na ikambe angngewai Batara yareka nanabangung ikambe anne tampa’ pakkoro’bangngang kalenna ikambe lanri ero’na ikambe assare koro’bang nitunu yareka koro’bang gandung yareka koro’bang passari’battangngang irateanna.
24Teai kammaya anjo pattujunna ikambe, sari’battang! Na nabangung ikambe anjo tampa’ pakkoro’bangnganga, lanri bata-batai ikambe angkana gassingka ri bokoangallo nakana jari-jarinu mae ri jari-jarina ikambe, angkana, ‘Ikau tena passisambungannu siagang Batara, Allata’alana Israel!
25Ciniki, Napa’niaki anne Binanga Yordan ri tangnga-tangngata lanri untu’ ampasisa’laki ikambe siagang ikau tu Ruben siagang tu Gad. Ma’nassa tena tojeng apa-apa passisambungannu siagang Batara.’ Jari apamo lakajariang sallang? Mattantu jari-jarinu sallang lanapammarimi jari-jarina ikambe untu’ anggaukangi ibadaya mae ri Batara.
26Jari, nanabangung ikambe anne tampa’ pakkoro’bangnganga, teai untu’ koro’bang nitunu yareka untu’ passarena ikambe,
27mingka untu’ a’jari pammatei mae ri katte ngaseng, siagang mae ri jari-jarita ri allo ri boko, angkana kammatojengi ikambe anne nigaukangi ibadaya mae ri Batara ri Kema KahaderanNa, koro’bang nitunu, passare-passare siagang koro’bang passari’battangngang. Lanri kammana anjo, tenamo nalanakana jari-jarinu angkanaya anjo jari-jarina ikambe tena passisambunganna siagang Batara.
28Jari, pattujunna ikambe iamintu; ebara’ angkana akkana kammatojengi jari-jarinu sallang, akkullemi angkana jari-jarina ikambe, ‘Ciniki anjo tampa’ pakkoro’bangnganga! Boe-boena ikambe ambangungi se’re tampa’ pakkoro’bangngang sangkammaya rupanna siagang tampa’ pakkoro’bangnganNa Batara, teai untu’ koro’bang nitunu yareka untu’ passare, mingka untu’ a’jari pammatei mae ri katte ngaseng.’
29Patappa’mi, angkanaya tena nalaero’ ikambe angngewai Batara yareka lammari anynyomba mae ri Ia lanri natambaina ikambe tampa’ pakkoro’bangnganga untu’ koro’bang nitunu yareka koro’bang gandung yareka untu’ koro’bang passare, nampa nia’mo tampa’ pakkoro’bangnganNa Karaeng Allata’alata ri dallekanna Kema KahaderanNa Batara."
30Sikontu anjo apa napakasingaraka suku Ruben, suku Gad siagang suku Manasye rayaya, nalangngere’mi Imang Pinehas siagang anjo sampuloa tau toa-toana tu Israel battua ri laukanna Binanga Yordan. Jari baji’mi naassenna ke’nanga anjo passalaka.
31Nampa nakanamo Pinehas, ana’na Imang Eleazar, mae ri anjo tu suku Ruben, suku Gad siagang suku Manasye rayaya, "Kamma-kamma anne naassemmi ikambe angkanaya Narurungangki’ Batara, lanri tenana nuangngewa mae ri Ia. Nupasalama’mi umma’ Israel battu ri hukkunganNa Batara."
32Le’baki anjo a’lampami Pinehas siagang sikamma anjo tau toa-toana tu Israel. Nabokoimi ke’nanga anjo suku Ruben siagang suku Gad ri Gilead, nampa ammotere’ mange ri Kanaan, nampa nalaporo’ anjo passalaka mae ri umma’ Israel.
33Jari sannammi nyawana umma’ Israel mae ri anjo passalaka, sa’genna mammuji-mujimo ke’nanga mae ri Allata’ala. Tenamo nasero kanai pole anjo passala’ ero’na ke’nanga ambunduki tu Ruben siagang tu Gad, siagang untu’ angngancuruki pa’rasanganna ke’nanga.
34Kala’busanna nakanamo suku Ruben siagang suku Gad, "Anne tampa’ pakkoro’bangnganga a’jari sa’bi mae ri katte ngaseng angkanaya Batarami Allata’ala." Jari naaremmi ke’nanga anjo tampa’ pakkoro’bangnganga "Sa’bi".
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel