Alkitab Mobile SABDA
[VER] : [MAKASAR]     [PL]  [PB] 
 <<  Yosua 9 >> 

1Tassiaraki anjo kabara’-kabara’ pammetanna tu Israel sa’genna mae ri sikontu karaeng niaka ilaukanna Binanga Yordan, iamintu niaka ri daera pa’monconganga, ri bangkenna monconga, ri lappara’ a’la’bua ri birinna Tamparang Tangngaya sa’genna mange ri Moncong Libanon bellana ri bageang wara’; kammayatompa karaeng-karaeng tu Het, tu Amori, tu Kanaan, tu Feris, tu Hewi siagang karaenna tu Yebus.

2Sikontu anjo karaenga assikongkolo’mi siagang napasse’remi kalenna untu’ ambunduki Yosua siagang umma’ Israel.

3Mingka anjo tu Gibeon battua ri bansa Hewi le’ba’mi nalangngere’ apa le’baka nagaukang Yosua mae ri kota Yerikho siagang Ai.

4Jari narancanakammi ke’nanga ero’ ampa’dongo’-dongoki Yosua, kamma anne batena: napitekeki keledaina ke’nanga karung-karung toa siagang pammoneang-pammoneang anggoro’ kodia ngasemmo, iamintu kukkuluka nipare’. Na salaku bokonna ke’nanga appasadiami

5iamintu roti kalotoro’ siagang ka’di-ka’diangamo. Ammakeang kekke’-kekke’mi ke’nanga siagang sapatu toa le’bakamo nitampeng-tampeng.

6Kammaminjo kaadaanna ke’nanga na’lampa mange ri Yosua niaka ri pakkemaang ri Gilgal. Nampa nakana ke’nanga mae ri Yosua siagang tu Israel, "Ikambe anne battui ri pa’rasangang bellaya, ero’ appare’ parjanjiang siagang ikatte ngaseng karaeng."

7Mingka nakana ngasemmo tu Israel, "Untu’ apa namusti appare’ parjanjiang ikambe siagang ikau ngaseng? Gassingka ambaniji anrinni pammantangannu!"

8Angkanami ke’nanga, "Manna apa kipassuroang ri kambe, tena tarellana pa’mai’na ikambe anggaukangi." Akkuta’nammi Yosua ri ke’nanga angkana, "Inai ngasengko antu? Battu ri pa’rasangang kemaeko?"

9Appialimi ke’nanga angkana, "Battu ri pa’rasangang bella dudui ikambe karaeng, lanri nalangngere’namo ikambe ri passala’na Karaeng Allata’ala kisombaya. Nalangngere’mi ikambe sikontu apa Nagaukanga ri Mesir,

10siagang apa Nagaukanga mae ri anjo ruaya karaeng Amori irayanganna Yordan, iamintu Karaeng Sihon ri Hesybon siagang Karaeng Og ri Basan ammantanga ri Asytarot.

11Sikontu pamimpinga siagang sikontu panduduka ri pa’rasanganna ikambe, nasuroi ikambe appasadia bokong untu’ barangka’ mae anrinni angngagangki’ assibuntulu’ ngaseng karaeng, siagang ampabattui angkanaya tunduki ikambe mae ri katte ngaseng karaeng. Lanri kammana anjo, napalaki ikambe ri kalammoranna pa’maitta ngaseng, sollanna kiero’ appare’ parjanjiang siagang ikambe.

12Kicinikimi karaeng, anne roti nabokonga ikambe. Ri wattunna a’lampa ikambe, anne rotia bambangiji. Mingka kamma-kamma anne, kicinikimi! Kalotoro’mi siagang ka’di-ka’diammi.

13Nampa anne sikamma pammoneang anggoro’na ikambe beru iji ri wattunna nabonei ikambe; mingka kamma-kamma anne, kicini’mi! Kekke’-kekke’ ngasemmi. Pakeanna siagang sapatuna ikambe panra’ ngasemmi napakamma pa’jappang bella."

14Naallemi tu Israel sike’de’ anjo kanrena tu Gibeon, siagang takkuta’nangngai ri Batara ri sesena anjo passalaka.

15Appare’mi Yosua parjanjiang passari’battangang siagang anjo tu Gibeon, siagang a’janjimi angkanaya tena nalanabuno ke’nanga. Kammayatompa sikamma pamimpinna umma’ Israel, assumpa tommi angkanaya lanarupai anjo parjanjianga.

16Mingka nampami a’nassa, iamintu ri makatalluna allo ri baku’ le’ba’na nipare’ anjo parjanjianga, battumi tu Israel mange ri kota-kota Gibeon, Kefira, Beerot siagang Kiryat-Yearim ri daerana anjo tau naaganga le’ba’ appare’ parjanjiang. Nampami kaassengang angkanaya tenaja nabella pammantanganna ke’nanga battu ri Gilgal.

17(9:16)

18Mingka takkulleai tu Israel ambunoi ke’nanga, lanri le’ba’mi assumpa pamimping-pamimpinna tu Israel mae ri ke’nanga lalang arenNa Karaeng Allata’alana Israel. A’reku’mi giginna sikontu umma’ Israel mae ri sikamma pamimpinna ke’nanga passabakkang anjo passalaka.

19Mingka appialimi anjo pamimping-pamimpinga angkana, "Apami lanigaukang! Kale’ba’mi a’janji ikambe mae ri ke’nanga siagang assumpa lanri arenNa Karaeng Allata’alana Israel. Kamma-kamma anne takkulleaki’ a’gau’ ja’dala’ mae ri ke’nanga.

20Takkulleaki’ ambunoi ke’nanga nasaba’ le’ba’ maki’ a’janji; napunna tena nanirupai anjo janjia, lanihukkungki’ ri Allata’ala.

21Jari lappassammi ke’nanga attallasa’, mingka nipa’jari anjo ke’nanga pabisa’-bisa’ kayunta siagang papisang je’netta." Kammaminjo napassuroanga anjo pamimping-pamimpinga.

22Nampa nikio’mo ri Yosua anjo sikamma tu Gibeon. Nakana Yosua ri ke’nanga, "Angngapa nuballe-ballei ikambe na nukana bella sikali pa’rasangannu, nampa anrinniji padeng?

23Lanri kammana anjo panggaukannu, lanihukkungko ri Allata’ala. Latuli a’jari atai bansanu, a’jari pabisa’ kayu siagang papisang je’ne’ untu’ Balla’Na Allata’alaku."

24Appialimi ke’nanga angkana, "Nappakamma anjo ikambe lanri nalangngere’namo ikambe angkanaya anjo Karaeng Allata’ala kisombaya le’ba’mi Nasuro Musa, anjo atanNa, ampassareangi mae ri katte sikontu anne pa’rasanganga siagang ambunoi sikontu pandudu’na ri wattunna kialle anjo buttaya. Malla’ dudumi ikambe angkana gassingka kibunoi ikambe; iaminjo saba’na nanagaukang ikambe sikammaya anne.

25Kamma-kamma anne nia’mi ikambe lalang kakoasanta. Kigaukammi mae ri kambe apa kikanaya baji’ ri pikkiranta."

26Jari iaminne nagaukanga Yosua: nala’langngimi sikammaya anjo taua siagang tena napa’biangi tu Israel ambunoi ke’nanga.

27Mingka napa’jari atami anjo ke’nanga, iamintu a’jari pabisa’ kayu siagang papisang je’ne’ mae ri tu Israel siagang untu’ tampa’ pakkoro’bangnganNa Batara. Sa’genna kamma-kamma anne tuli nagaukanna ke’nanga anjo jama-jamang kammaya ri tampa’ le’baka Napile Batara a’jari tampa’ ibada mae ri Ia.



 <<  Yosua 9 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel