1A’reppese’mi allo pangadelanNa Batara. Na laniella’mo Yerusalem, siagang lanibage-bagei wassele’na ri dallekang matannu.
2LaNapa’rappung ngasengi Batara sikontu bansaya untu’ ambunduki Yerusalem. Laniallei anjo kotaya, laniellaki sikamma balla’na, siagang lanigau’ bawangi sikamma tubai’-bainena. Tawaruanna pandudu’na laniengkaki mange ri butta pammelakkanga, mingka la’binna lammantangi anjoreng ri kotaya.
3Nampa lamaju Batara untu’ a’bundu’ angngewai anjo bansa-bansaya, sangkamma le’baka Nagaukang ri jammang riolo.
4Ri anjo alloa lammentengi ri Bulu’ Zaitun, irayanganna Yerusalem. Nalanibage rua Bulu’ Zaitun ri se’rea ka’bung lappara’, appakkaramula battu iraya sa’genna kalau’. Tawaruanna anjo buluka la’gioki a’lampa wara’, nabageruanna pole a’lampa timboroki.
5Lalariko allalo ri anjo lappara’ ka’bung ambage ruayai anjo buluka. Lalariko sangkamma boe-boenu ri wattunna ta’ge’goso’ buttaya ri wattu ammarentana Uzia, iamintu karaenna Yehuda. Nampa battu Karaeng Allata’alaku, nirurungang ri sikontu malaekaka.
6Punna battu anjo alloa, talaniakkamo dinging yareka es.
7Ri anjo alloa tenamo sassang. Tuli lasingara’na alloa, manna pole ri wattunna bangngi. Mingka Bataraji bawang angngassengi angkanaya ringngapanna nalabattu anjo alloa.
8Ri anjo alloa, la’lo’loroki je’ne ci’nonga battu ri Yerusalem; tawaruanna anjo je’neka la’lo’loro’ mangei ri Tamparang Matea nampa bageruanna pole la’lo’loro’ mangei ri Tamparang Tangngaya. La’lo’loroki anjo je’neka tunggala’ taung, baji’ nawattu bara’ kammayatompa ri wattu timoro’.
9Na Batara lammarenta salaku Karaeng ri sikontu linoa; tunggala’ taua lanynyombai ri Ia salaku Allata’ala siagang naassengi arenNa lalang areng sangkammaya.
10Sikontu pa’rasanganga appakkaramula battu ri Geba bageang wara’ sa’genna Rimon ri bageang timboro’, la’jari lappara’ ngasengi. Mingka Yerusalem lammenteng tinggi nai’, la’bi tinggiangngang nabutta niaka ri tammulilina; anjo kotaya la’la’baki appakkaramula battu ri Pakke’bu’ Lompo Benyamin sa’genna mange ri Pakke’bu’ Lompo Panyingkulu’, iamintu tampa’na pakke’bu’ lompo Makase’rea siagang battu ri Menara Hananel sa’genna mange ri tampa’ pammaccokang anggoro’na karaenga.
11Laamangi ammantang sikamma tau ammantanga ri anjo kotaya, tena bahaya kapanrakang lantujui.
12LaNapabattui Batara garring appakamalla’-mallaka mae ri sikontu bansa le’baka a’bundu’ angngewai Yerusalem. Matanna siagang lilana ke’nanga, ba’lalo sikontu batangkalenna la’jari bottoki lalang attallasa’na ija ke’nanga.
13Ri anjo alloa laNapa’jari lingui Batara sikamma anjo bansa-bansaya siagang a’jari sanna’ malla’na ke’nanga, sa’genna tunggala’ taua lanajakkalaki aganna niaka ri sa’rinna na nabuccu’.
14Sikamma tu bura’nea ri Yehuda la’bunduki untu’ ampartahangkangi Yerusalem. Lanaallei ke’nanga sikontu barang-baranna bansa-bansa niaka ri tammulilina a’jari barang nirampasa’, kammaya bulaeng, pera’ siagang pakeang a’gompo-gompoa.
15Nia’ todong garring lompo lantabai jaranga, bagalka, untaya, keledaia, siagang sikontu olo’-olo’ niaka ri kemana musua.
16Nampa sikontu tau niaka ija attallasa’ ri alla’na anjo bansa-bansa ambundukai Yerusalem, la’lampai mange ri anjo kotaya untu’ anynyomba ri Karaeng, Batara Kaminang Koasaya, siagang untu’ ampakalompoi Passua’-suarrang Pa’ballakang Leko’-Lekoka.
17Punna nia’ bansa taeroka a’lampa mange ri Yerusalem untu’ anynyomba ri Karaeng, Batara Kaminang Koasaya, talanatujuai bosi pa’rasanganna.
18Siagang punna taeroka tu Mesir ampakalompoi Passua’-suarrang Pa’ballakang Leko’-Lekoka, lanituju tongi ke’nanga garring Napabattua Karaeng Allata’ala mange ri tunggala’ bansa tenaya naero’ anynyomba.
19Iaminjo hukkungang mae ri Mesir siagang mae ri sikontu bansa tenaya naero’ ampakalompoi Passua’-suarranna Pa’ballakang Leko’-Lekoka.
20Ri anjo alloa laniukiriki giring-giring niaka ri pakeanna jaranga iamintu kana-kana kammaya anne, "Nisa’laki nipakatangkasa’ untu’ Batara". Sikamma panci-panci niaka ri Balla’Na Batara lanianggaraki sangkamma mangko’-mangko’ passarea ri dallekanna tampa’ pakkoro’bangnganga.
21Sikontu panci niaka ri Yerusalem siagang ri sikontu Yehuda lanisa’laki nipakatangkasa’ untu’ Napatang Batara Kaminang Koasaya. Pandudu’ angngeranga koro’bang passare lanapakei untu’ ampallui dageng lanapassareanga. Punna battu sallang anjo wattua, tenamo nania’ padanggang ri Balla’Na Batara Kaminang Koasaya.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel