Tabé
1Oné-mai hi Pétrus, rasul di Yésus Kristus, latang te sanggéd isét long ata manga oné tana Pontus, Galatia, Kapadokia, Asia Koé agu Bitinia.
2Méu poli pilé lorong nanéng de Mori Keraéng Ema dité agu poli pandé nggeluks le Nai Nggeluk, kudut junggu oné hi Yésus Kristus agu poli pandé nggélok le dara Diha. Nahé tabing agu hambor libur penong kéta latang te méu.
Bengkes, Imbi Agu Momang
3Naring ga Mori Keraéng, ngong Ema de Mori dité hi Yésus Kristus. Ali nabit mésé, Hia poli widang ité mosé weru lut to’o kolé di Yésus Kristus oné-mai ata mata. Mosé dité penong le bengkes,
4kudut tiba mbaté hitut toé ngancéng ampusy, toé ngancéng rowak agu toé ngancéng moray, hitut pedeng éta Surga latang te méu.
5Ai méu imbi oné Mori Keraéng, itu tara tinus méu Liha le mberes kuasaN dengkir agu si’angn selamak hitu du leso cemol tai.
6Nakam ga latang te sanggéd situ, koném po te ho’on méu paka wéongm ali do tarad damang.
7Sanggéd taung situ betuad kudut kapang, tu’ung ko toé imbi de méu. Imbi de méu céwé belar oné-mai emas. Emas kaut paka kapang oné api, céwén kolé imbi de méu paka kapang kudut mberesn. Ali hitu, méu tiba naring, mengit agu hiang du leso mai kolé di Yésus Kristus tai.
8Koném po toé dé’it ita le méu hi Yésus Kristus, maik méu momang Hiam. Méu imbi oné Hiam, koném po te ho’on toé ita taraN. Méu nakam ali nisang-nai ata mengit agu mésé kéta.
9Ai polig cai wan imbi de méu, ngong selamak de wakars.
10Selamak hitu ata mbajik kéta cécan le sanggéd nabi, ata poli keréban latang te méu.
11Isé kolé mbajik kéta cécan, te du niay agu co’oy jarin lorong nuk de Nai di Kristus hitut manga oné isé. Nai hitu dé ata poli keréba latang te sanggéd susa ata kudut hena hi Kristus agu latang te sanggéd mengit situt tua musi-maid.
12Latang te nabi situ poli si’ang le Mori Keraéng, te isé toé gori keturu latang te weki rud, maik gori keturu latang te méu; ngong sanggéd cao-ca ata poli si’ang dengéd le méu oné-mai ata ba Keréba Di’a. Sanggéd ata situt ba Keréba Di’a, téing kuasa le Nai Nggeluk hitut wuat éta-mai Surga. Ngot sanggéd malékat kolé nanang te pecing Keréba Di’a hitut wéro disé.
Nggeluk Agu Momang Asé-Ka’é
13Landing hitu, mengkek di’a-di’a nai-nawa de méu. Jerék agu bengkes koé tu’ung-tu’ungm oné tabing hitut kudut téing oné méu du mai di Yésus Kristus tai.
14Mosé koém ného anak ata sundur agu néka lut belek da’at hitut kuasa weki de méu du toé di tiba Keréba Di’a.
15Maik poro mosé de méu kali ciri nggeluk, ai ngggelukN Mori Keraéng hitut poli bénta méun.
16Ného manga ata poli tulis oné Surak Nggeluk: Nggeluk koé méu, ai Aku nggelukG.
17Koném po caro Ema Hia le méu du ngaji, méu paka noing kin, te Hia toé manga lélo taran ata du leso beté-bicar. Landing hitu, hiang koé Mori Keraéng oné mosé dokong lino ho’o.
18Ai pecing le méu, mosé de méu hitut toé manga belar ata tiba oné-mai empos, poli sambén le Mori Keraéng, toé ali ceca dokong, toé kolé ali pérak ko emas.
19Mori Keraéng sambé méu ali dara ata wegit kétay, ngong dara di Kristus ata cama ného dara de anak jimbal hitut toé manga maja agu celan.
20Hi Kristus hitu, poli pilén le Mori Keraéng du toéd dédék lino. Du tiong leso cemol de lino, Hia mai koley kudut méu tiba selamak.
21Lut hi Kristus hitu, méu tara imbis oné Mori Keraéng hitut poli pandé to’o kolé Hia oné-mai ata mata agu poli bong Hia. Ali hitu, méu paka imbi agu bengkes hanang oné Mori Keraéng.
22Méu poli pandé nggeluk wekis ali lorong wintuk de Mori Keraéng, wiga méu ngancéng momang tau asé-ka’é ca imbi le nai bakok. Poro méu tu’ung-tu’ung momang tau mai wa-mai nain.
23Ai lut reweng de Mori Keraéng hitut mosé tédéng lén, méu ciri manusia werum ata toé loas le manusia hitut mosé dokongy, maik le Hia hitut mosé tédéng lén.
24Ai manga tulis oné Surak Nggeluk: “Sanggéd manusia cama ného remangs, sanggéd mbasakn cama ného wéla remangs. Mélos remang, lodas wélan.
25Maik reweng de Mori Keraéng mosé kin dengkir te tédéng lén.” Hituy dé Keréba Di’a ata wéro oné méu.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel