Mosé Weru
1Ai wekin hi Kristus poli ta’ong susan, itu tara méu kolé paka jerék wekis te ta’ong susa. Céing ata wekin poli ta’ong susa, toé pandé ndékok koléy.
2Landing hitu, mosé de méu nggere-olon oné lino ho’o paka lorong ngoéng de Mori Keraéng.
3Ai naisn ga ba weki de méu cama ného ba weki de wa’u siot toé pecing Mori Keraéng. Méu poli mosé lorong belek da’at, humer, langu, héba-hak, agu io pina-naéng ata poli ré’ingd.
4Te ho’on ga, lengets isét toé imbi Mori Keraéng, ai méu toég lorong ba weki da’at disé, ngong langu le minakn sanggéd belek daat. Itu tara pocus méu lisé.
5Maik, tai isé paka papong oné Mori Keraéng hitut poli géréng te beté-bicar data mosé agu data mata.
6Itup tara Keréba Di’a hitu poli wéron kolé oné sanggéd ata mata, kudut nai-nawa disé ngancéng mosé lorong ngoéng de Mori Keraéng, koném po poli bicard lorong wekid cama ného sanggéd manusia.
Mosé Data Serani
7Sanggéd cao-ca ruis te cemols ga. Landing hitu madis agu jerék koé ba wekis, kudut ngancéng ngajim.
8Maik ata mésén: Paka momang tu’ung haé ata, ai momang hitu ngancéng tadu do ndékok.
9Téing dumpek cama tau, néka agu rengus.
10Keturu di’a-di’a koé cama taus, lorong agu tabing hitut poli tiba oné néténg méu. Ali hitu, méu ngancéng ciri ata nggalas te wintuk widang de Mori Keraéng.
11Céing ata ba keréba, paka ba keréba de Mori Keraéng; céing ata keturu laing, paka keturu lorong mberes hitut widang de Mori Keraéng, kudut oné sanggén cao-ca bongy Mori Keraéng landing hi Yésus Kristus. Latang te Hia dé bong agu kuasa tédéng lén! Amén.
Ta’ong Susa Ného Hi Kristus
12Asé ka’én ata momang laku! Te ho’on ga leng kéta mésén ta’ong susa de méu, ai rémé hena le damangs. Maik néka lenget laing, néhot toé kéta cung damang hitu.
13Ngot cembes kali nais, ai méu lut ta’ong susa ného hi Kristus, wiga méu tai ngancéng naka agu nisang nais du si’angn mengit Diha.
14Mosé di’a méu, émé méu lengga latam landing ngasang di Kristus, ai mengit de Nai Nggeluk manga oné méuy.
15Néka manga cengata oné-mai méu ata ta’ong susa landing le mbelé ata, le tako, le pandé da’at, ko le laléng oné wintuk data.
16Maik émé méu ta’ong susa landing le ata serani, néka ritak laing, maik poro bong kali Mori Keraéng ai méu ba ngasang di Kristus.
17Ho’og leson te pu’ungn beté-bicar, wangka oné-mai itét ro’éng run Mori Keraéng. Éme beté-bicar hitu wangka oné-mai itén, céwén kolé isét toé imbi oné Keréba Di’a de Mori Keraéng.
18Ai manga poli tulis oné Surak Nggeluk: “Émé isét molor kaut toé émongn te haéng selamak, Apan kolé isét toé imbi agu isét ndékok!”
19Landing hitu, émé manga ata ta’ong susa landing le ngoéng de Mori Keraéng, hia paka pandé di’a mtaung agu condo wekin oné Mori baté Jari agu Dédék hitut junggu kéta.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel