Rowan Hi Yakobus-Hi Pétrus Pé’ang Oné Mai Buin
1Aik du hitug Raja Hérodés pu’ungn pandé da’at latang pisa taus weki serani.
2Hia jera mbelé hi Yakobus ka’é di Yohanés ali sempilang.
3Du ita liha nisang kéta nai data Yahudi, itu kali ruda olon jera deko hi Pétrus. Du hitu leso ramé Roti Toé Manga Ragin.
4Du poli dekon hi Pétrus jera li Hérodés na’a oné buiy agu lami le pat dantep serdadu, agu néténg-néténg dantep pat serdadu. Betuan diha, kudut poli Paska hia bicar hi Pétrus olo mai ranga data do.
5Nenggituy dé tara na’a oné buin hi Pétrus. Maik weki serani seber te ngaji kamping Mori Keraéng latang te hia.
6Le wié du toé di bicar hi Pétrus olo mai ranga data do, hi Pétrus toko oné bahi-réha sua taus serdadu, ranté taungs limé suan agu olo mai para manga kolé isét lami bui hitu.
7Rodo hesé cengata malékat de Mori Keraéng ruis hi Pétrus agu gérak taung oné lo’ang bui hitu. Malékat hitu entap hi Pétrus kudut kéngkon, mai taén: “To’o gélang é!” Du hitu muing kedok taungs ranté oné mai limé di Pétrus.
8Poli hitu mai taé de malékat hitu agu hia: “Pongo awakm, agu paké sepatum!” Pandé taung situ liha. Poli hitu mai taé de malékat hitu agu hia: “Paké jubam agu lut akuh!”
9Og kali lutn liha malékat hitu nggere-pé’ang, agu toé pecing liha, te pandé de malékat hitu jari tu’ung kéta, bet diha hia urey.
10Du lagén lisé osang lami laring cain, agu osang lami te suan, cais isé oné lewang beci hitut kudut ngo oné béndar. Lewang hitu céngka le run latang te lako disé. Du cai bepé’ang, isé lako haéng comong salang agu rodo legong hia le malékat hitu.
11Du noingn hi Pétrus, mai taén: “Pecing laku ga, tu’ung-tu’ung kéta Mori Keraéng poli jera malékatN agu pandé selamak aku oné mai limé di Hérodés agu oné mai sanggéd cao-ca situt bengkes data Yahudi.”
12Poli kaut noingn, ngo hia oné mbaru di Maria endé di Yohanés ata le caron hi Markus. Nitu do kéta ata lari nempung agu ngajis.
13Du nontongn liha para olo, mai cengata mendi iné-wai ngasangn hi Rodé, kudut pecing céing hitut nontong para.
14Pecing muing liha, reweng di Pétrus, maik ali nisang nain, hia toé olong wuka para hitu, maik gélang-gélang ngo kolé onéy, kudut tombo te hi Pétrus manga olo mai paray.
15Mai taé disé ngong iné-wai hitu: “Nupa hau-a?” Maik hia taé agu isé, tu’ung-tu’ung kéta. Mai kolé taé disé: “Hitu malekatn.”
16Lari nggitun, hi Pétrus ruda kin nontong agu du wukan para, ita hia lisé, lenget kéta taungs.
17Maik hi Pétrus pépas limén te ré’ing isé, kudut isé néka ngaoks. Itu kali tombon co’o Mori Keraéng karong hia pé’ang oné mai bui. Mai taén: “Tombo kolé le méu pé’ang daku ho’o oné hi Yakobus agu sanggéd asé-ka’é dité.” Og kali lako rudan agu ngo oné osang cebanay.
18Ného diang gulan, gagur-wéléks sanggéd serdadu situ. Isé réi cama taud, co'o tara toé mangan hi Pétrus.
19Hi Hérodés jera kawé hi Pétrus, maik toé cumangy. Itu kali hi Hérodés jera kudut céca sanggéd isét lamin agu mbelés. Poli hitu hi Hérodés hésing oné mai Yudéan nggere-oné Kaisaréa agu ka’éng nituy.
Rowan Hi Hérodés
20Hi Hérodés rabo kétay agu ata Tirus agu Sidon. Og kali bantang camad kudut ngo cumang hi Hérodés. Isé olong emi nai di Blastus, hiat wintuk laing oné mbaru de raja, te cupu mai iséy. Itu kali tegi hambor, ai isé weli bokong oné mai tana de raja.
21Oné ca leso ata poli rekén, hi Hérodés sélék ceca rajan, lonto lobo kedéra agu curup kamping isé.
22Sanggéd ro’éng rai-raos kétas, mai taéd: “Ho’o reweng de déwa, toé reweng de manusia!”
23Du hitu kéta muing onggan hi Hérodés le malékat de Mori Keraéng, ai hia toé hiang Mori Keraéng; hang le uli taung wekin wiga matan.
Wuatd hi Barnabas Agu Hi Saulus
24Lari nggitun, tambang kéta bekan reweng de Mori Keraéng agu tambang dod ata dengén.
25Hi Barnabas agu hi Saulus kolé oné mai Yérusalém du polig gori disé. Isé dadé hi Yohanés ata le caron kolé hi Markus
<< Kisah Para Rasul 12 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel