Alkitab Mobile SABDA
[VER] : [MANGGARAI]     [PL]  [PB] 
 <<  Kisah Para Rasul 20 >> 

Mai Oné Mai Tana Makédonia Nggere-oné Béndar Troas

1Du likn ngai-ngaok hitu, hi Paulus béntas ata nungkun te pandé metek naid. Du poli pele-kanan, hia ngo oné Makédonia.

2Hia lako-léok tana hitu agu ali do kéta toingn pandé ndeng nai de asé-ka’é situt ca imbis. Itug kali cain oné tana Yunani.

3Du telu wulang ata polin ka’éng nitun, hia kudut lajar nggere-oné tana Siria. Maik du hitu ata Yahudi nanang te mbelé hia. Landing hitu wérét liha kudut kolé palé Makédonia.

4Hia cama laing agu hi Sopatér anak di Pirus, oné mai Beréa agu hi Aristarkhus agu hi Sekundus, isét sua oné mai Tésalonika agu hi Gayus oné mai Dérbé, agu hi Timotéus agu sua taus oné mai tana Asia, hi Tikhikus agu hi Trofimus.

5Isé pado olos agu géréng ami oné Troas.

6Maik du poli ramé Roti Toé Manga Ragin, ami lajar oné mai Filipi agu lima leso kaut wa, caik ami oné Troas, cumang agu isé. Pitu leso béhéng’g ami ka’éng nitu.

7Du leso laring cain minggu hitu, ami nempung kudut hang cama, hi Paulus tombo agu asé-ka’é situt ca imbi nitu, ai hia kudut ngoy ného diangn. Tombo hitu diha dengkir seréhang tana.

8Lo’ang éta, oné osang nempung dami, do kétas lampu.

9Cengata ata reba ngasangn hi Éutikhus lonto lupi jendélay. Ali béhéng bailn tombo di Paulus, toég ta’ong dendutn ata reba hitu. Cemoln ga toko temo hia, agu pa’u éta mai lo’ang te telun nggere-wa. Du tetin lata, kali polig rowan.

10Maik wa’uy hi Paulus éta main. Hia toko agu nggao ata reba hitu, mai taén: “Néka simpung, mosé kin hia.”

11Du kolén nggere-éta lo’ang, hi Paulus pati-pati roti poli hitu hang camas; du poli hang, hia ruda olo kin tombon dengkir agu parn leso. Poli hitu hia ngon.

12Lari nggitun, isé dadé ata reba hitu ngai mosén, nggere-oné mbarun, agu sanggéd isé cembes taung naid.

Mai Oné Mai Béndar Troas Nggere-oné Béndar Milétus

13Ami pado-olokm nggere-oné kepal, agu lajar nggere-oné béndar Asos kudut curu hi Paulus nitu, lorong bantangn, ai hia nanang lako oné tana masay.

14Du hia cumang agu amin oné Asos, ami dadé hia nggere-oné kepal, itu kali ruda olon lajar dami nggere-oné Métiléné.

15Mai nitu maigm ami ruda olo lajar agu ného diangn ami cai dungka oné nuca Khios. Ného diangn kolé ami cai oné Samos agu ca leso kaut poli hitu, caikm ami oné Milétus.

16Hi Paulus poli wérét kudut toé cénggo oné Éfésus, kudut néka mora leson oné tana Asia kanang. Ai hia lari hidi-hadan, kudut émé ngancéng, hia poli mangan oné Yérusalém du leso ramé Péntékostén.

Becang Di Paulus Agu Sanggéd Ata Tu’a Laingn Oné Béndar Éfésus

17Landing hitu hi Paulus jera cengata oné mai Milétus, nggere-oné Éfésus agu pedén, kudut sanggéd ata tu’a laingn dé weki serani mai oné Milétus.

18Du poli caid isé, mai taé diha ngong isé: “Pecing le méu co’o mosé daku oné bahi-réha méu, pu’ung leso laring cain aku cai oné tana Asia ho’o.

19Ali jinggo aku wintuk latang te Mori Keraéng. Oné wintuk hitu aku dongkalig loda lu’u matag, ai dongkalig damang lata Yahudi situt nanang mbelé akus.

20Koném po nenggitu, aku toé dé’it manga ngondég te pandé ata betua laing latang te méu. Sanggéd kéta taung, keréba agu toings laku oné méu wa ranga data do ko du nempung oné néténg-néténg mbaru.

21Aku kolé téi saka-si oné ata Yahudi agu ata Yunani kudut isé teser oné Mori Keraéng, agu imbi oné Mori Yésus.

22Maik te ho’on, ai deko le Nai Nggeluk, aku ngo oné Yérusalém. Toé baé laku apa ata jari laing oné weki daku du cai nitu.

23Pecing daku kali, Nai Nggeluk poli tombo si’angn agu aku oné néténg béndar te aku oné buik agu paka ta’ong susak.

24Maik aku toé nuk te mo’éng moség, tamat aku ngancéng cai oné ranti agu pandé poli sanggéd gori situt jera de Mori Yésus oné aku, kudut téi saka-si latang te Keréba Di’a, widang de Mori Keraéng.

25Te ho’on baé laku ga, te méu toé ngancéng ita ranga dakus kolé, sanggés taung méut ata poli la’at laku kudut ba keréba perénta de Mori Keraéng.

26Landing hitu leso ho’o aku téi saka-si oné méu, te aku nggélok oné mai dara diong kaut.

27Ai aku toé manga ngondég te ba keréba sanggéd-taung ngoéng de Mori Keraéng latang te méu.

28Lami di’a-di’a weki rus, agu lami kolé sanggén taung weki, ai méu ata poli wérét le Nai Nggeluk ciri ata lami kudut titong ro’éng de Mori Keraéng ata dumpu Liha ali dara Run Hia.

29Pecing laku du poli ngog aku, te cais acu rani, mai oné bahi-réha méu agu toé manga momang ata situt lami de méu.

30Ngot oné mai weki rus méu, te cai pisa taus ata agu toing adong’d, gejur kéta te pandé péndot ata nungku oné mai salang molor kudut lorong isé.

31Landing hitu jerék-jerék koém agu nuk di’a-di’a, tédéng telu ntaung wié-leso, aku toé kéta beténg toing méu gici ca ali lanar kid lu’u matag.

32Te ho’on aku téi méu oné Mori Keraéng agu oné reweng widang Diha ata manga kuasan latang te pandé metek méu, agu widang oné méu mbaté ata poli letin latang te sanggén ata poli pandé nggelukd Liha.

33Pérak ko emas ko ceca bana, toé kéta manga lélakd laku oné mai céi-céing kaut.

34Pecing le rus méu, ali limé de rug aku, poli gorig latang te sékék de rug agu sékék de haé-rebag, haé lako daku.

35Oné sanggén cao-ca poli taung toming laku agu méu, te ali gori nenggitu ité paka campé sanggéd ata les agu paka nuk curup de Mori Yésus, ai weki Run Hia poli taé: Céwé di’a téing itu po tiba.”

36Du poli tombo hitun hi Paulus, tikul agu ngajiy, cama-cama agu iséy.

37Itu kali rétangd taung isé cang agu nggao hi Paulus, nukung kétas omo hiad.

38Isé wéong kéta naid, céwén kéta ai taé diha, isé toé kéta ita kolé ranga diha. Poli hitu isé ngo podo hia oné kepal.



 <<  Kisah Para Rasul 20 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel