Hi Paulus Oné Ranga Di Féliks
1Lima leso poli hitu, cai Imam Mésé hi Ananias, cama laing agu pisa taus Tu’a agu cengata tongka curup ngasangn hi Tértulus. Isé ngo cumang Gubernur agu tombo taung baro disé latang te hi Paulus.
2Hi Paulus bénta te cumang agu hi Tértulus pu’ung réi hia taén: “Keraéng Feliks ata hiang lami, ali gori diték ami toé beténg te sabi ata minakd agu libur, agu ali nggalas dité, do kéta pandé di’a ata poli pandéd latang te wa’u ho’o.
3Sanggéd taung situ agu nia kaut wan, tiba taungs lami ali wali di’a.
4Maik boto béhéng bail lonto dité, tegi laku kudut ité séngét koé ami cekoén, ali nai di’am hitut pecing taung lata.
5Ami haéng ata ho’o cama ného ata beti puru, cengata ata pandé karukak oné bahi-réha sanggéd ata Yahudi oné temu tana lino agu hia cengata ata tu’a laing oné mai ata Nasrani.
6Ngot hia damang lagé nggeluk Mbaru de Mori Keraéng. Landing hitu ami deko hia, agu kudut beté-bicar lami lut wintukTaurat dami.
7Maik kepala tentera Lisias mai ré’ing agu wentang hia oné mai limé dami,
8itu kali jera sanggéd isét baro mai cé’é ranga dités. Émé weki rud ité ata agil hia, ngancéng pecing lité sanggéd cao-ca situt tombo dami oné hia.”
9Nenggitu kolé sanggéd ata Yahudi, tukéng baro situ ali curup te bicar hitu nggitu muingy.
10Gubernur kewit hi Paulus te hia ngancéng tomboy. Itu kali mai taé di Paulus: “Pecing laku pisa ntaung ata polin ga, ité ciri adak latang te wa’u ho’o. Landing hitu toé kéta manga radékg aku te kambé bicar'g ho’o oné ranga dité:
11Ité ngancéng tirik te olo toé lebi oné mai campulusua leso, aku ngo oné Yérusalém latang te ngaji.
12Toé manga ata haéng aku lari léwang tau’g, ko pandé ngai-ngaok oné Mbaru de Mori Keraéng ko oné mbaru ngaji, ko osang cebana oné béndar.
13Isé toé ngancéng téi sabi agu ité apa hitut baro disé ho’o ga latang te weki daku.
14Maik tura laku oné ité te aku suju Mori Keraéng empo dami ali lut Salang de Mori Keraéng, ngong Salang ata caro lisé aliran. Aku imbi sanggéd taung situt poli tulis oné wintuk Taurat agu oné Surak de Nabi-nabi.
15Aku bengkes tu’ung oné Mori Keraéng, cama ného isé kolé, te manga to’o koléd ata mata, ata molor ko ata toé molor.
16Landing hitu lari mosé’g aku, wuli-wekig lorong nuk nai ata molorn oné ranga de Mori Keraéng agu cama manusia.
17Du poli pisa ntaung, aku mai kolé oné Yérusalém, kudut téi campé le séng latang te wa’u daku agu kudut ba takung oné ranga de Mori Keraéng.
18Du aku lari pandé taung situ, pisa taus ata Yahudi oné mai Asia, repéng aku lisé oné Mbaru de Mori Keraéng, du aku poli pandé nggeluk weki’g, toé baé lata do agu toé ngaok.
19Isé situ ata paka mai cé’é ranga dités agu baro lisé, émé isé manga cao-ca latang te weki daku.
20Landing kong damang isét manga rangad cé’é ho’o, tombo pandé da’at apa ata ita lisé, du aku ba oné ranga de Adak Agama.
21Ko cala ali curup ho’o ca daku, ata curup laku oné ranga disé, nggo’oy: Leso ho’o agil aku le méu ali imbi laku te sanggéd ata mata mosé kolés.”
22Mai hi Feliks hitut pecing tu’ung Salang de Mori Keraéng, renggé bicar disé, mai taén: “Du cain kepala tentera Lisias cé’é ho’o, aku te beté bicar de méu.”
23Itu kali hia jera tentera hitu kudut kong oné buin hi Paulus, maik ali bui ata géaln, agu néka ré’ing cengatan oné mai haé-reban kudut campé hia.
24Pisa leso poli hitu, mai hi Féliks agu winan hi Drusila, cengata ata Yahudi, jera bénta hi Paulus, itu kali séngét tombo diha latang te imbi oné Yésus Kristus.
25Maik du hi Paulus tombo latang te molor, kuasa weki rud, agu beté-bicar tai, rantang da’at hi Féliks agu mai taén: “Émo ga, agu ngoh ga, manga kaut leson cepisa, aku te bénta kolé hau.”
26Lari nggitun bet diha hi Paulus te téi seng oné hia Ali hitu hia dondé kéta bénta hia kudut tombo-tombo agu hia.
27Maik woko rapak sua ntaung hi Féliks, lesing li Pérkius Féstus, agu kudut emi nai data Yahudi hi Féliks sondang hi Paulus kong kin oné buin.
<< Kisah Para Rasul 24 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel