Walé Di Stéfanus
1Mai taé de Imam Mésé: “Tu’ung kéta nenggitu ko?”
2Mai walé di Stéfanus: “Oé asé-ka’én, agu sanggés méu Ema, séngét di’a-di’am! Mori Keraéng hitut mengit poli toto wekiN agu emad empo dité hi Abraham du hia ngai oné Mésopotamian, du toé di ka’éng oné Haran,
3agu taé oné hia: Pé’ang oné mai tanam, agu oné mai asé-ka’ém agu ngoh ga oné tana hitut kudut toi Laku agu hau.
4Itug kali pé’angn hia oné mai tana disét Kasdim agu ka’éng oné Haran. Du poli rowa eman, Mori Keraéng jera hia téti-wa’i nitu main, nggere-cé’é tana ho’oy, osang baté ka’éng de méu te ho’on,
5agu nitu Mori Keraéng toé manga téing ceca mbatéN agu hia, co’om tamat cepagatn tana, toé manga, maik Hia reké te téi tana hitu ciri decuk de run agu decuk de waé diha, koném po du hitu hia toé di manga anakn.
6Nenggo’oy reweng de Mori Keraéng te waé diha ciri ata long oné tana data agu isé pandé mendis agu denet latas pat ratus ntaung béhéngn.
7Maik wa’u situt pandé mendi isé te wahéngs Laku, taé de Mori Keraéng, poli hitu isé te pé’ang nitu maid agu ngaji oné Akus cé’é osang ho’o.
8Itu kali Mori Keraéng téi hia reké sunat, agu nenggitu hi Abraham manga anakn hi Ishak, og kali sunatn liha oné leso te alon, agu hi Ishak manga anakn hi Yakub, agu oné mai hi Yakub tuad ata campulusua ema de empo dité.
9Wajo kaut le beti-naid, ema-ema de empo dité pika hi Yusuf nggere-lau tana Mesir landing Mori Keraéng loréng hia,
10agu lego hia oné mai sanggéd pandé denet agu téing hia tabing nai ngalis, du hia cumang agu hi Firaun, raja data Mesir. Hi Firaun téti hia ciri ata cau kuasa latang te tana Mesir agu latang te sanggén oné mbarun.
11Poli hitu cain darem da’at oné temu tana Mesir agu tana Kanaan agu pandé susa mésé, wiga empo dité toé manga hangd.
12Maik du dengé li Yakub oné tana Mesir manga gandum, hia jera empo dité ngo nitu. Hituy ngo disé laring cain,
13du ngo disé te suan, hi Yusuf toi wekin agu asé-ka’én, itug kali pecingn mai nia main hi Yusuf le raja Firaun.
14Poli hitu hi Yusuf jera ngo curu emad hi Yakub agu sanggéd asé-ka’éd, pitumpulu lima ata dod.
15Itu kali ngon hi Yakub oné tana Mesir. Nitu hia rowan agu sanggéd empo dité,
16rapu disé hésing nggere-oné Sikhém agu na’a oné boa ata poli weli di Abraham ali séng pérak oné mai anak-anak di Hémor oné Sikhém.
17Kudut rapak reké hitut téi de Mori Keraéng agu hi Abraham tiong cé’én, tambang kolés bekad uku situ oné Mesir
18dengkir manga raja cebana ata perénta tana Mesir, cengata ata toé pecing hi Yusuf.
19Raja hitu paké nggopét moléy, kamping uku dité agu pandé susa empo dité agu jera kébang anak wara disé, kudut isé néka mosés.
20Du hitu loasn hi Musa agu hia naun kétay oné mata de Mori Keraéng. Telu wulang béhéngn hia tinu oné mbaru de eman.
21Poli hitu hia okéy, landing anak molas de raja Firaun campé hia agu tinu hia cama ného anak de run.
22Hi Musa hitu kolé toing lorong ruku data Mesir agu hia manga kuasan oné curup agu pandén.
23Du hia patmpulu ntaung mosén, teka kaut oné nain te la’at asé-ka’én, ngong ata Israél.
24Du hitu ita liha cengata wahéng da’at le cengata ata Mesir, itug kali campén liha agu kambé ata hitut wahéng da’aty ali mbelé ata Mesir hitu.
25Bet diha, ita le sanggéd asé-ka’én, te Mori Keraéng paké hia latang te selamak isé, maik toé ita lisé.
26Ného diangn, mai kolé hia, du sua taus ata Israél lari pulang taud, itug kali pandé hambord liha, mai taén: Oé asé – ka’én! Cala asé-ka’ép méu ta? Co’o tara pandé da’at cama taus?
27Maik ata hitut pandé sala agu haé reban, toé tiba hi Musa agu mai taén: Céing ata téti ité te ciri tu’a laing agu adak latang te ami?
28Cala kudut mbelé aku cama ného ité mbelé ata Mesir hitu oné meseng?
29Dengé curup hitu losi hi Musa agu mosé ného ata longy oné tana Midian. Nitu hia manga sua taus anak ata ronan.
30Du polig patmpulu ntaung, ita liha cengata malékat oné satar Poco Sinai, oné dila api oné mai pu’u karot.
31Lenget laing li Musa ita apa hitu, agu du ngo nitun hia, kudut lélo ruis liha, tuan reweng de Mori Keraéng latang te hia:
32Aku Mori Keraéng, empo de hau, Mori Keraéng di Abraham, di Ishak agu di Yakub. Jejer hi Musa agu toé cung te lélo.
33Ho’oy reweng de Mori Keraéng oné hia: Na’a pé’ang sendalm ai osang ho’ot hesé de hau tana nggeluk.
34Aku poli pecing taung singsara de ro’éng Daku oné tana Mesir agu Aku poli dengé gesar agu tilir disé, agu Aku poli wa’ug kudut lego isé, ho’o muing, mai ga, hau kudut wuat Laku ngo oné tana Mesir.
35Hi Musa hitut toé tiba lisé, ali taé: Céing ata téti ité te ciri tu’a laing agu adak dami? -- hia hitu kolé ata poli wuat le Mori Keraéng ciri tu’a laing agu pandé ledo le malékat hitut cumang dungka agu hia oné pu’u karot hitu.
36Hia ata dadé isé nggere-pé’ang ali pandé tanda lenget agu gantang oné tana Mesir, oné Tacik Ndéréng agu oné satar mambak tédéng patmpulu ntaung.
37Hi Musa ho’o kolé ata taé agu isét Israél: Cengata nabi ného aku ho’o te pandé mosé koléy le Mori Keraéng latang te méu oné mai asé-ka’és.
38Hi Musa ho’o ciri tongka oné sidang de ro’éng oné satar mambak, oné mai malékat ata tombo agu hia éta poco Sinai agu empo dité, agu hia ata tiba sanggéd reweng mosé kudut caing oné ité.
39Maik empo dité toé gorid te lorong hia, ngot isé toé tiba hia. Oné nai disé, nanang kolé nggere-oné tana Mesir.
40Nggere-oné hi Harun mai taé disé: Pandé latang te ami pisan déwa, ata kudut lako olo mai ami, ai hi Musa ata dadé ami pé’ang oné mai tana Mesir – toég baé lami apa ata poli jarin agu hia.
41Og kali du hitu pandé lisé ca patung anak lembu agu ba takung pina-naéng, agu isé naka laing apa hitut pandé le rud.
42Og kali holésn Mori Keraéng oné mai isén, agu sondang isé ngaji kamping serdadu éta awangs, cama ného ata poli tulisn oné kitab nabi-nabi. Nenggo’oy: Oé ata Israél! Toé latang te Aku, méu mbelé agu téi takung tédéng patmpulu ntaung oné satar mambak.
43Ngot méu rakang molé ndéi di Molokh, agu ntala de déwas hi Refan, sanggéd patung situt pandé de méu kudut ios. Landing hitu Aku kudut dadé méu oné osang oké nggere-oné Babél.
44Ndéi saka-si manga oné empo dité oné satar mambak, cama ného hitut perénta de Mori Keraéng agu hi Musa kudut pandé liha lut tunti hitut poli itan.
45Ndéi hitu tiba le empo dité agu ali titong di Yosua, ba nggere-oné tana ho’o, du tana ho’o rampas oné mai wa’u banan ali wéling le Mori Keraéng olo mai ranga de empo dité, dengkir cai oné uwa di Daud.
46Hi Daud poli tiba widang oné ranga de Mori Keraéng agu tegi liha, kudut hia sendo koé te dumpu ca osang latang te ka’éng de Mori Keraéng di Yakub.
47Maik hi Salomo ata pandé ca mbaru latang te Mori Keraéng.
48Maik Mori Keraéng Hitut Langkas kéta, toé ka’éng oné mbaru pandé le limé de manusia, cama ného hitut poli taé le nabi:
49Awang éta seriga Daku agu lino palang wedi de wa’iG. Mbaru ného nia te hesé le méu latang te Aku? Nenggitu reweng de Mori Keraéng, osang ného nia kéta te ciri asi Daku?
50Toé weli limé rug Aku taung ata pandéd so’o?
51Oé ata kembe-lu’ak, ata gangga agu nenteng, méu mtaung ata lawang Nai Nggeluk, cama ného empos, nenggitu kolé méu.
52Céing oné mai sanggéd nabi ata toé wahéngs le empo de méu? Ngot isé mbelé sanggéd ata siot ba keréba, main Cengata Ata Molor, ho’ot polig le méu wahéngn agu mbelén.
53Méu poli tiba Wintuk Taurat ata poli caingn le malékat-malékat, maik méu kolé toé lorong.”
Du Mbelén Hi Stéfanus-Manga hi Saulus
54Du sanggéd Adak Agama situ dengé sanggéd tombo situ, ati disé néhot ata jelok. Tiba lisé ali kérek-ngis.
55Maik hi Stéfanus hitut penong le Nai Nggeluk conga nggere-éta awangy, ita angos de Mori Keraéng agu Mori Yésus hesé oné racap wanang de Mori Keraéng.
56Mai taén: “Tu’ung kéta, aku ita léngan awang agu Anak Manusia hesé oné racap wanang de Mori Keraéng.”
57Landing ciék taungs isé agu cang agu tadu tilud, isé umber hia le watu.
58Isé poto hia nggere-pé’ang mai béndar, agu pu’ung pekén hia le watu. Sanggéd taung ata saka-sin na’a jubad olo-mai wa’i de cengata ata reba, ngasangn hi Saulus.
59Du rémé pekén lisé, ngaji kin hi Stéfanus: “Yo Mori Yésus, tiba koé Lité nai daku.”
60Cang agu tikuln, télés kéta reweng, mai taén: “Mori néka koé tanggong oné iséy ndékok ho’o!” Poli kaut curup hitun, itug kali rowan.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel