Hi Zakhéus
1Mori Yésus ngo oné béndar Yériko, agu lako ruda lagé béndar hitun.
2Nitu manga cengata, ngasangn hi Zakhéus, tu’a disét tegi béa, agu hia ata boray.
3Hia nanang te lélo ného nia kétay Mori Yésus hitu, maik toé ngain, ai ata do, agu radakn hia.
4Itug kali hia mburuk bolo mai ata don, poli hitu tuké éta lobo haju aray, te lélo Mori Yésus, hitut kudut liba nituy.
5Du cai nitun Mori Yésus, Hia lélo nggere-étay agu mai taén: “Zakhéus, gélang wa’um, ai leso ho’o Aku paka ka’éng oné mbaru de hauk.”
6Itu kali hidi-hadan wa’un hi Zakhéus, tiba Mori Yésus, naka kétay.
7Maik sanggéd ata situt itan apa hitu nggeré-ngga’uts, mai taéd: “Hia ka’éng oné mbaru data ndékoky.”
8Maik hi Zakhéus heséy agu mai taén ngong Mori Yésus: “Mori, oné mai bahi-réhad wéang sewokg te téing isét lénggés, agu émé manga hang kamer datag, te téing kolés laku alép laing pats.”
9Mai taé de Mori Yésus ngong hia: “Leso ho’o, poli cain selamak oné mbaru ho’o, ai ata ho’o kolé anak di Abrahamy.
10Ai main Anak Manusia te kawé agu te selamak ata situt moras.”
Rapang Latang Te Séng Mina (Mat 25:14-30)
11Latang te isét séngét Hia nitu, Mori Yésus ruda olon curupN ba le rapangy, ai Hia ruis gi agu Yérusalém, agu nuk disé te Adak de Mori Keraéng kudut karok itan.
12Maig taé Diha: “Manga cengata keraéng, angkak ngo tana pé’angy, kudut téti ciri raja nituy agu du poli hitu itu po koléy.
13Hia bénta cepulu taus mendin, agu téing néténg isé gici cad séng mina, mai taén: Séng so’o paka pandé bekas le méu haéng mai kolég aku.
14Maik ata cama tanad, kodo hias, itu tara wuat ata lisé, kudut tombo: Ami toé gorigm ata ho’o te ciri raja damiy.
15Og manga du kolén, lété hia poli téti ciri rajan, hia jera bénta taungs mendin, situt poli téing séngd liha, kudut baé capas bekad séng situ néténg isé.
16Maiy ata hitut laring cain, taén: Ité, séng mina dité hitut ca-y poli cir cepulu minay laku.
17Mai taén ngong ata hitu: Di’a tu’ung pandém hitu, olé mendi ata di’a; hau tipek oné taé koé, ali hitu, tiba ga kuasa cau cepulu béndar.
18Mai hiat te suan, nenggo’o taén: Keraéng, séng mina dité poli cir lima minad laku.
19Mai taén ngong ata hitu: Agu hau cau liman béndar.
20Agu mendi situt iwod mai, agu mai taén: Keraéng, ho’oy séng mina dité, aku poli rokot kin le caré-caréy.
21Ai aku rantang iték, ai ité manusia gutek; ité emi apa ata toé dé’it na’a lité, agu ako apa ata toé dé’it weri lité.
22Mai taén ngong ata hitu: Oé mendi acu da’at, aku te beté bicar hauk lorong curup de rum. Kali poli pecingp le hau, aku ata gutek, hitut emi apa ata toé na’a dé’it laku, agu ako apa hitut toé dé’it weri laku.
23Émé nggitu ga, co’o séng daku hitu tara toé téing oné ata situt pecing pandé beka séng? Wiga du kolég aku, aku ngancéng emi agu bekad.
24Mai taén agu ata situt hesé nitu: Emiy séng mina hitut ca-y oné mai hia, agu téing hiat manga cepulu minan.
25Mai taé disé ngong hia: Keraéng, hia poli manga cepulu minan.
26Mai walé diha: Aku taé agu méu: néténg ata situt ngai mangad, te téing oné hia, maik hiat toé mangan, oné mai hia te emis, nenggitu kolé apa situt ngai mangad oné hia.
27Maik sanggéd ata bali daku so’o, so’ot toé ngoéngd te aku ciri rajad, dadé cé’é ho’os isé situ, agu mbelés wa ranga daku.”
Mori Yésus Ramé Kéta Tiban Oné Yérusalém (Mat 21:1-9; Mr 11:1-10; Yoh 12:12-15)
28Agu du poli taung tombod sanggéd situ, Mori Yésus pado oloy oné mai isé, agu ruda lakoN nggere-oné Yérusalém.
29Du Hia ruis Bétfagé agu Bétania hitut oné abar Golo Zaitun, Mori Yésus wuat sua taus ata nungku'N,
30agu mai pedéN: “Ngo oné béo hiot dungka méu: Du cai nitus méu, méu te ita ca kelédai laing uwan, ngai liwingn, ata toéd nggopuy. Cacay kelédai hitu agu aru ba cé’é ho’oy.
31Agu émé manga ata tenga méun: co’o tara cacan le méu? Walé kaut nenggo’o: sékékn le Mori.”
32Itus kali ngod isé situt poli jerad agu ita tu’ung ného baté taé de Mori Yésus.
33Du cacan lisé keledai hitu, mai taé dihat morin: “Co’o tara cacan le méu kelédai hitu?”
34Mai walé disé: “Sékékn le Mori.”
35Isé aru kelédai hitu, ba oné Mori Yésus, poli hitu lapak laing nggebar disé, agu campé Mori Yésus du létin.
36Agu du ngai létin Mori Yésus lobo keledai hitu isé wisi towéd wa salang.
37Du Hia ruis Yérusalémy, oné baté redun Golo Zaitun, pu’ungs sanggéd ata nungku situt lako ndorik agu Hia, jikir kétas naring Mori Keraéng agu ciéks, landing sanggéd tanda lenget situt poli itad lisé.
38Mai taé disé: “Naring kéta Hia hitut mai mana Rajay, le ngasang de Mori Keraéng, hambor libur éta Surga, agu bong éta osang ata langkas kéta.”
39Pisa taus ata Parisi, situt lorong agu ata do situ, tombo oné Mori Yésus: “Tuang Guru, ré’ing koés ata nungku Dité situ.”
40Mai walé Diha: “Aku taé agu méu: Émé hema isé so’o, watu so’o te raos.”
41Agu du Mori Yésus ruis gi, agu itag béndar Yérusalém, Hia rétangY landing béndar hitu,
42mai taé Diha: “Oléh, di’an kéta, émé leso ho’o muing le hau pecingn, apa kéta sékék laingn, te hambor libur de hau! Maik te ho’on, hambor-libur hitu pangguy latang te mata de hau.
43Ai te cai leson, ata balim te wéngké léok hau le bénténg, poli hitu léok hau agu léwo hau oné mai néténg ciko,
44agu isé te pandé mempo hau agu sangged ro’éngm, agu oné mai siding watum, toé ondang lisé can watu hitut tondol lobo watu haén, ai hau toé baé wié leson, du nia Mori Keraéng mai selamak haun.”
Mori Yésus Pandé Nggeluk Mbaru de Mori Keraéng (Mat 21:12-13; Mr 11:15-18; Yoh 2:13-16)
45Itug kali ngon Mori Yésus nggere-oné Mbaru de Mori Keraéng, agu wangka mbérd ata situt dagang nitus,
46mai taé Diha ngong isé: “Manga tulis: Mbaru Daku, mbaru ngaji. Mai méu pandé cewo de empo déhong laingy.”
47Néténg leso Hia toing oné Mbaru de Mori Keraéngy. Imam Kepala agu ata pecing Taurat agu isét tu’ad uku Israél, hili-hoés te pandé calang Hias,
48maik toé pecing lisé co’o molé nawan, ai sanggéd ro’éng pa'u naid agu Hias, agu ngoéng kétas séngét toing Dihas.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel