Lorong Pemerénta
1Néténg-néténg ata paka lorong pemerénta, ai toé manga pemerénta ata toé mai oné mai Mori Keraéng; agu sanggéd pemerénta so’ot mangad poli wérét le Mori Keraéngd.
2Landing hitu, céing ata lawang pemerénta hia lawang wérét de Mori Keraéng, agu céing ata lawang te tiba wahéng latang te weki run.
3Ai émé cengata ata pandé di’a, néka rantang agu pemerénta, landing émé hia pandé da’aty itu po rantangy. Ngoéngm hau toé rantang pemerénta? Pandé ga apa ata di’an, agu hau te tiba naring oné mai pemerénta.
4Ai pemerénta mendi de Mori Keraéng kudut pandé di’a hau. Maik émé hau pandé da’at, patun hau te rantang pemerénta; ai toé oké bon pemerénta cau kuasa te wahéng ata sala. Pemerénta hitu mendi de Mori Keraéng kudut wahéng ata situt pandé da’at.
5Itu tara ité paka lorong pemerénta, toé hanang landing le rantang wahéng de Mori Keraéng, maik ali téti nai de ru.
6Itu kolé tara méu paka bajar taki. Ai isé situt wintukd taki hitu ata keturu de Mori Keraéng.
7Bajar taung apa ata paka bajar le méu: taki latang te isét manga hakd te tiba taki. Béa oné ata siot manga hakd te tiba béa; téing rantang oné ata manga hakd te tiba rantang agu téing hiang oné ata situt manga hakd te tiba hiang.
Momang Kudut Rapak Wintuk Taurat
8Néka manga raungs méu oné céi kaut, bo émé raung momang cama taus. Ai céi kaut ata momang cama manusia, hia hitu poli lorong wintuk Taurat.
9Ai manga perénta oné wintuk Taurat: “Néka loma ata, néka mbelé ata, néka tako, néka belek ceca data.” Agu perénta cebana kolé poli dukut oné curup ho’os: “Momang ga cama manusia cama ného momang weki rum!”
10Ata manga momang, toé manga pandé da’atn latang te cama manusia, ali hitu momang kudut rapak wintuk Taurat.
11Momang ho’o paka pandé le méu, ai baé le méu te ho’on ga, latang te méu paka to’o wa mai tokos. Ai te ho’on selamak hitu céwé ruis agu itéy, oné mai ité pu’ung tiba imbid.
12Seréhang tana tiong te gérak gi. Landing hitu mait ga ité, oké taungs pandé nendep situ agu pakés ceca harat de gérak!
13Raju koé ba weki dité cama ného mosé le leso, néka leng bail héba-hak oné ramé mésé agu langu tuak, néka ngoéng ata agu belek da’at, néka léwang tau agu beti nai.
14Maik nggiling laing Mori Yésus Kristus agu néka lorong belek de weki hitut pandé lo’o todong kaut.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel