Alkitab Mobile SABDA
[VER] : [MANGGARAI]     [PL]  [PB] 
 <<  Wahyu 2 >> 

Latang Te Weki Serani Oné Éfésus

1“Tulis koé latang te malékat de weki serani oné Éfésus: Ho’oy curup Diha, ata cau pitu ntala situ oné limé wanangN agu lako oné beréha pitu wa’i lampu emas situ.

2Pecing laku sanggéd goris, rébok agu gepeks. Pecing laku, te méu toé manga lembaks latang te sanggén ata da’at. Méu poli damang isét caro weki rud rasul, kalim po toé. Ali hitu, pecing le méu te isé situ ata nggopét.

3Méu kali kong lembaks, agu kong ta’ong susas ali ngasang Daku. Méu metek kis.

4Koném po nenggitu Aku mbéis méu, ai méu toé momang Akum ného du wangkan.

5Landing hitu nuk dé, lengn délem pa’u de méu hitu! Teser ga one-mai ndékoks, agu pu’ung kolé ba wekis ného du wangkan. Émé toé, Aku mai oné méu te emi wa’i lampu oné-mai osangd.

6Maik manga kin ata di’an oné méu: cama ného Aku, méu jogot sanggéd pandé data nungku di Nikolaus.

7Céing ata manga tilun, poro séngét apa ata curup le Nai Nggeluk oné sanggéd weki serani. Céing ata ontong, te sendos Laku hang wua oné-mai pu’u haju ata téing mosé hitut manga oné Uma Firdaus de Mori Keraéng.”

Latang Te Weki Serani Oné Smirna

8“Tulis koé latang te malékat de weki serani oné Smirna: Ho’oy curup oné-mai Hia hitut Du Wangkan agu Turung Cemol, ata poli matan agu poli mosé kolén.

9Pecing laku susa agu lénggé de méu, maik bora kis méu. Pecing kolé laku sanggéd pocu latang te méu oné-mai isét caro weki rud ata Yahudi, kalim po toé. Ai isé situ ro’éng de jing da’ats.

10Néka rantang méu te ta’ong susa! Ata tu’ungn jing da’at te peké pisa tau weki de méu nggere-oné bui. Méu ta’ong susa tédéng cepulu leso. Pandé hitu de jing da’at, kudut damang agu susa méu. Méu kali ga, poro junggu dengkir matas. Ali hitu, Aku widang méu mosé tédéng lén.

11Céing ata manga tilun, poro séngét apa ata curup le Nai Nggeluk oné sanggéd weki serani: Céing ata ontong, hia toé manga susan ali mata te suan, ngong mata tédéng lén.”

Latang Te Weki Serani One Pergamus

12“Tulis koé latang te malékat de weki serani oné Pergamus. Ho’oy curup Diha hitut paké keléwang harat bali:

13Pecing Laku nia méu ka’éngs, ngong oné osang seriga de jing da’at. Méu junggu oné Aku, ngot metek kin imbis oné Aku, agu du uwa di Antipas saka-si Daku ata junggu oné Aku, ata mbelé bolo ranga de méu oné osang de jing da’at.

14Maik manga ata toé henan Laku: Oné-mai méu manga pisa taus ata lorong toing di Biléam. Hi Biléam hitu toing hi Balak kudut pandé wéléng ata Israél, wiga isé hang takung siot latang te io pina naéng agu ngoéng atas.

15Nenggitu kolé, manga oné-mai méu ata cau toing data nungku di Nikolaus.

16Landing hitu, teserm ga! Émé toé teserm, Aku te mai oné méu kudut purak isé le keléwang ho’ot losa oné-mai mu’u Daku.

17Céing ata manga tilun, poro séngét apa ata curup le Nai Nggeluk oné sanggéd weki serani: Céing ata ontong, oné hia hitu téing Laku hang manna ata pété ceha; agu widang Laku watu bakok atat bétan manga tulis weru ngasangn ata toé pecing lata bana, maik hanang lihat tiban kanang.”

Latang Te Weki Serani Oné Tiatira

18“Tulis koé latang te malékat de weki serani oné Tiatira: Ho’oy reweng de Anak de Mori Keraéng, hitut mataN ného dila de api agu wa’iN cama ného tembaga:

19Pecing Laku sanggéd gori de méu: Nenggitu kolé momang agu imbi de méu, nenggitu kolé gori keturus agu gepeks. Pecing Laku te gori de méu hitut turung cemoln, céwé do oné-mai situt laring cain.

20Maik Aku mbéis méu, ai méu ondang kaut hi Izébél, iné-wai hiot caro weki run nabi te pandé wéléng sanggéd mendi Daku, wiga pandé loma agu hang de takung io pina-naéng.

21Aku poli téing hia sokor latang te teser, maik hia toé ngoéngn te teser oné mai pandé loman.

22Lélo dé, Aku te peké hia lobo wongka toko data beti. Isét loma hia te pekes Laku nggere-oné mendo mésé, émé isé toé tara tesers oné-mai sanggéd pandé da’at cama laing agu iné-wai hitu.

23Ata lut iné-wai hitu kolé te mbeles Laku, wiga ali hitu pecing le sanggéd weki serani te Aku dé ata pamotn nuk agu nai data. Aku te léko néténg-néténg méu lorong agu pandés.

24Maik latang te méu, sanggéd ata bana oné Tiatira, ata toé lorong toing da’at hitu agu toé kawé co’oy lok lé-lok laun jing da’at, taé Laku agu méu: Aku toé gorig te tambang mendo bana oné méu.

25Maik apa ata manga oné méu, cau situ dengkir cai Daku.

26Céing ata ontong agu pandé sanggéd gori Daku dengkir agu cemoln, latang te hia widang Laku kuasa te perénta sanggéd wa’u.

27Hia te perénta isé ali dongkar beci kudut pandé biké isé cama ného rewut lewing tana. Kuasa diha hitu, cama ného kuasa ata tiba Daku oné-mai EmaG.

28Latang te hia hitu widang Laku ntala awo mai par.

29Céing ata manga tilun, poro séngét apa ata taé le Nai Nggeluk oné sanggéd weki serani.”



 <<  Wahyu 2 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel