1Edohuji, gij mona ongga didif dinsaga keingg iwa jeskaseda dagot rot Allah oga ongga Ofa ocunc gu mimif sismeni fob, beda dinera duga ongga rusnok rusujohu oida dudou bera erek efesis eteb rot guru. Noba didif dinera duga ongga erek ongkoska eteb tein guru. Tina didif dagot mar oisouska duga ongga erek giskini ojgomu.
2Jeska gij mona insa koma bera didif dudou os dimagot rot mar ofoka egens gu iwa ojgomu. Mar ofoka egens koma bera osok gij Yesus Kristus, noba rot teinefa Ofa anggos tumu mega salib nou mimif fob.
3Erek koma noba gij mona insa koma bera didif dunoisum gij disinsa dedin owesa efek jinaga guru. Jeska didif dedin owesa efek enadaij nou guru. Tina didif din skoita iwa rot dudou ongga eriaga ni, dudou ongga emeesa ni, noba dudou ongga osousoyu ojgomu.
4Noba mar ongga didif danggot gu iwa ni, era mar ongga didif dumftuftu gu iwa ni, bera enen jeska dudou ongga efesis eteb jeskaseda duroku idou fogora imororu Yesus guru. Tina Efena Ebsi Allah bera ocunc rot efen owesa efek gu iwa oisouska mar ongga didif danggot fogora iwa ijginaga rot oida oga koma bera en jeska Allah fob.
5Didif dutunggom erek koma jeskaseda mar ongga iwa ingg fogora iroru Yesus rot bera en jeska Allah oga ojgomu. Noba oga koma enen jeska rusnok ongga rudou ebriyi eteb gij mar jinaga guru.
6Erek koma tina, gij mona ongga memef moftuftu rusnok ongga ruroru Yesus rot tenten fob, beda memef moftuftu rot modou ongga ebriyi eteb gij ojgomu. Tina mar ongga modou ebriyi gij kef bera enen jeska rusnok mebif guru. Noba koma bera enen jeska rusnok ongga rufoka aksa ongga rudou ebriyi eteb gij tein jinaga guru. Jeska Allah omohoda rot rua insa koma rerin riteij ah nomnaga gij mona ongga Yesus ongksons en fob, fogora omorowora ojgomuja.
7Noba mar ongga memef moftuftu oisouska modou ongga ebriyi gij bera en jeska Allah efen odou ongga ebriyi gij mar ojgomu. Sis dojunmeni bera mar ongga Allah ensejah nou efen rusnok angh jejema jeska rua ros. Noba Ofa ensejah mar insa koma sis mona ongga Ofa onotunggom mebif jera mebaga tein enesi. Beda Ofa esejah mar insa koma jeskaseda gij mona kahma, beda Ofa emeita ofoka eteb gu mimif nomnaga ongga erek efen rusnok si.
8Noba rusnok ebirfager rinejginaga rot teinefa Allah efen odou ongga ebriyi eteb gij erek koma enesi, jeska rudou onoroun Yesus Kristus guru. Mimif mijginaga rot erek koma jeska rua tein erek runtob mifmin Tuhan, ongga ofoka aksa eteb, tumu mega salib sis fob. Jefeda koma orocunc rot oida rua rinejginaga rot Allah efen odou ongga ebriyi eteb gij mar enesi.
9Noba koma jeni erek mar egens ongga Allah anggot rot gij Mar Efeyi Ebsi erek kef oida, "Rusnok egens ai tein rinejginaga rot guru era rinereneni rot tein guru osok gij mar ongga oufamofa ongga Allah ensejah nou efen rusnok ongga rudou okora rot Ofa."
10Erek koma, tina Allah bera oncunc rot mar insa koma nomnaga gu mimif oisouska Efena Ebsi fob. Jeska Efena Ebsi bera eyajga joug fogora ejginaga rot mar insa koma nomnaga efen ofou ongga okum. Noba rusnok rudou enebriyi gij mar insa koma guru.
11Jeska osnok egens esinsiyai tein bera ejginaga rot meidu ongga ah gij esinsa efen odou efesi ojgomu, noba rusnok enjgineg bera guru. Erek koma tein, Efena Ebsi Allah esinsiyai ojgomu bera ejginaga rot mar ongga angh gij Allah odou efesi ojgomu, noba rusnok enjgineg bera guru.
12Erek koma tein, mimif munororu mar koma ongga rusnok mebif rudou ebriyi gij guru. Tina mimif muroru mar koma ongga Efena Ebsi Allah onocunc gu mimif jeskaseda mudou ebriyi gij mar insa koma ongga Allah eita gu mimif rot odou ongga eskeira fob.
13Erek koma jefeda, mar koma ongga memef manggot rot bera onororu meidu ongga rusnok mebif ruftuftu rot rudou ongga efesis jinaga guru. Tina mar koma ongga manggot rot bera oisouska meidu ongga Efena Ebsi oftuftu gu memef sis fob ojgomu. Jefeda memef mera oga insa koma ongga Efena Ebsi oftuftu gu memef fob, fogora moroftuftu rot mar nomnaga ongga Allah ondou os otunggom nou mimif ojgomu.
14Erek osnok egens onororu Yesus rot tenten guru fogora Efena Ebsi eneker gij odou efesi guru, beda ofa bera ongga okoja mar koma ongga Efena Ebsi Allah omftuftu gu mimif fob. Ofa eita mar erek koma jeska ofa osujohu rot oida mar koma bera erek oska ojgomu. Noba ofa tein onodou ebriyi gij mar koma jinaga guru. Jeska oisouska Efena Ebsi Allah ongga angh gij mudou efesi fob bera rusnok rudou emebriyi gij mar ongga en jeska Allah si.
15Erek koma, tina rua ongga Efena Ebsi engker gij rudou efesi bera rudou ebriyi gij mar insa kef nomnaga fob. Tina rua ongga Efena Ebsi eneker gij rudou efesi guru, rua bera rudou enebriyi gij mar insa koma fogora runoga ojga rot rusnok insa koma guru.
16Erek koma jeska runggu gij Mar Efeyi Ebsi oida, "Osnok egens ai tein enejginaga rot mar ongga Tuhan osujohu rot gij efen odou efesi jinaga guru. Jefeda enadaij nou rusnok risisi joug Ofa rot mar guru." Erek koma tina, mimif ongga muroru Yesus fob bera misma mudou ongga musujohu rot mar morototuma erek Yesus Kristus odou osujohu rot mar ojgomu.
<< 1 Korintus 2 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel