Alkitab Mobile SABDA
[VER] : [MEYAH]     [PL]  [PB] 
 <<  1 Tesalonika 5 >> 

1Edohuji, iwa isinsa ijginaga rot mar insa koma nomnaga fob. Iwa ijginaga rot oida mona insa koma bera emen si, noba rot mar nomnaga ongga omorogna keingg rusnok gij mona insa koma fob. Jefeda enadaij nou memef moftuftu iwa gij surat egens kef rot mar insa koma deika guru.

2Jeska iwa ijginaga rot oida Yesus omorogna keingg rusnok nomnaga ebeirens erek osnok egens ongga oukoreka mar orogna keingg rusnok ebeirens gij rerin mod.

3Gij mona ongga rusnok ragot oida, "Mimif miker rot ongkoskamoka ojgomu. Mar okum egema tein enecirej mimif guru," beda ainsa koma tein mar okum eteb emesiri keingg rua si. Erek ojaga egens ongga efaga okum noba ainsa koma tein etei ejmeg okora rot efesa, beda erek koma tein, rusnok rimek mar okum esiri keingg rua ebeirens. Noba rua runosuwa jeska mar insa koma jinaga guru.

4Tina iwa inerek rusnok ongga ringker gij motkobah ros guru. Jefeda iwa inofos graga gij mona ongga Yesus emen guru erek rusnok ongga rufos graga gij mona ongga osnok egens oira gij rerin mod jeskaseda rukoreka mar ongga rerin.

5Iwa nomnaga bera irek rusnok ongga ringker gij eisa fob. Iwa ineker gij motkobah deika guru. Iwa yuira gij Yesus efen eisa fob.

6Erek koma jefeda enadaij nou mimif mita mar erek rusnok ongga runot joug risinsa rot iskusk guru. Mimif mineita mar erek rusnok ongga ribirfaga erebibei rot mofut efei tein guru. Tina mimif mut joug mudou efesi rot ahais noba musujohu rot koisoisa jeskaseda minsejah nou mona ongga Yesus Kristus omoksons en ojgomu.

7Nou motu bera rusnok rahca noba rij mofut efei onjoros ribirfaga erebibei rot ojgomu.

8Tina mimif bera muira gij eisa fob. Jefeda mimif musujohu rot koisoisa ojgomu fog. Erek tentara egens orka efen monska ofos ongga ontumba jeskaseda ot joug esinsa, beda mimif tein muroru Allah oga rot tenten noba mudou omokorema ojgomu, jeska koma bera ongga ot joug mimif. Noba erek tentara egens oisum gij efen topi besi ongga ergi joug ebirfaga, beda mimif tein muisum gij Allah ojgomu jeskaseda Ofa emeita eiteij ah ongga efeinah gu mimif.

9Allah onocunc mimif jeskaseda ofra mar okum keingg mimif guru. Tina Ofa oncunc mimif jeskaseda misma eiteij ah ongga efeinah oisouska Yesus Kristus.

10Yesus bera agos nou mimif jeskaseda gij mona ongga Ofa ongksons en fob, beda mimif mimesma eiteij ah ongga efeinah fogora miker morototuma jera Ofa. Koma rot rua ongga ranggos tein noba rot rua ongga rifena ebah ros tein gij mona insa koma.

11Noba Ofa efen rusnok nomnaga ongga rifena ebah era ranggos fob bera rimesma mar insa koma gij mona ongga Ofa ongksons en fob si.

12Edohuji, memef modou os mois gu iwa jeskaseda iwa yugif gu rusnok ongga rimfarur rot ahais gu ifekesa noba ongga ruftuftu iwa jeskaseda iroru Yesus rot tenten.

13Yugif gu rua noba idou okora eteb rot rua jeska rua rimfarur gij mar ongga erek ofoufem nou iwa. Noba iwa iker rot idou ongga eskeiramera morototuma ojgomu.

14Edohuji, memef mois gu iwa jeskaseda iwa yagot joug rusnok ongga rudou eskes rot mar ojgomu. Noba isisi joug rusnok ongga runowesa efek gij mar guru. Noba yuftuftu rua ongga runororu Yesus rot ahais enesi jeskaseda runotunggom mar ongga oska guru. Noba yuin keingg idou efesi rot rusnok nomnaga fogora ita mar rot idou ongga eriagamaga ojgomu.

15Noba iwa inesesa mar okum sons skoita rusnok ongga rita mar okum gu iwa jinaga tein guru. Tina ita mar ongga oufamofa moguma ojgomuja.

16Iwa ita idou ongga erirei gij mar nomnaga ojgomuja. Noba yum iteij gu Allah ojgomuja tein. Beda yuis oufamofa eteb gu Ofa rot mar nomnaga. Allah odou os jeskaseda rusnok nomnaga ongga rudou egens jera Yesus rita mar erek insa koma ojgomuja.

17(5:16)

18(5:16)

19Iwa ineretei rot mar ongga Efena Ebsi Allah otunggom gij rusnok rudou efesi guru.

20Noba ineita idou ongga oska rot mar ongga rusnok enjgineg rimfesij oisouska mar ongga Allah oncunc gu rua gij rudou efesi tein guru.

21Iwa ig rot mar insa koma ojgomu, fogora iwa imek rot oida mar koma bera erek tenten era gurei. Beda iroru mar ongga tenten ojgomu.

22Noba iwa ibes ifaga jeska mar ongga oska ojgomuja.

23Memef mois gu Allah, ongga eita eskeiramera gu rusnok jeskaseda Ofa ofij iwa fogora imeita mar nomnaga rot idou ongga ebsi komowa. Memef mois gu Ofa jeskaseda Ofa omot joug yeyin idou efesi jera ifaga tein fogora Ofa omocunc iwa erek rusnok ongga rerin mar ongga oska oskiyai tein guru gij mona ongga Yesus Kristus ongksons en fob.

24Allah bera ongga enjeka iwa erek efen rusnok fob. Jefeda Ofa tein omofij iwa gij mar insa koma si. Jeska Ofa omotunggom mar nomnaga ongga Ofa anggen gu rusnok fob si.

25Memef mois gu iwa jeskaseda yum iteij nou memef tein.

26Noba yagei yitma morototuma erek irocunc rot oida iwa imokosama oisouska Yesus Kristus fob.

27Didif duis gu iwa oisouska Tuhan ofoka jeskaseda iwa ifesij surat egens kef gu rusnok nomnaga ongga ruroru Yesus jah suma tein.

28Didif duis gu mifmin Tuhan Yesus Kristus jeskaseda Ofa eita oufamofa eteb gu iwa ojgomuja. Ainsoma.



 <<  1 Tesalonika 5 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel