Alkitab Mobile SABDA
[VER] : [MEYAH]     [PL]  [PB] 
 <<  1 Yohanes 1 >> 

1Didif dugu surat egens kef gu iwa osok gij Ofa ongga enofoguma gij mona ongga Allah onotunggom mar egema tein enesi. Ofa koma bera Yesus Kristus. Noba memef bera meg efen oga ni, memef mek Ofa gu mesinsa meiteij ni, memef meyajga joug Ofa ni, memef tein mahtec Ofa efen efaga ni. Ofa bera ongga oncunc gu memef rot teinefa rusnok risma eiteij ah ongga efeinah tein.

2Noba Allah bera oncunc gu memef rot oida Ofa koma bera ongga eita eiteij ah ongga efeinah gu rusnok. Jefeda memef magot rot tenten noba mefesij tein gu iwa oida memef mek Ofa ongga efena ebah rot ah aibin fob. Sis fob bera Ofa eker jera efen meka Allah noba Allah bera ongga oncunc Ofa gu memef tein.

3Memef mefesij rot oga ongga oufamofa insa koma osok gij Ofa ongga memef mek gu meiteij noba meg rot efen oga tein fob. Memef motunggom mar erek koma jeskaseda iwa tein ita idou ongga egens jera memef rot. Noba mimif nomnaga bera mirek egens jera mifmin mika Allah jera Ofa efen efesa Yesus Kristus.

4Memef mogu mar kef jeskaseda mimif nomnaga mita mudou ongga efaga ouka eteb rot ojgomu.

5Memef magot rot tenten osok gij mar ongga memef meg Yesus Kristus anggot rot sis fob. Mar insa koma bera erek kef oida, Allah bera erek eisa egigir ojgomu, noba motkobah egema tein enah gij Ofa efen odou efesi jinaga guru.

6Erek mimif magot rot oida mudou bera egens jera Allah fob, tina mimif mita mar ongga oska erek rusnok ongga ringker gij motkobah ros, beda koma orocunc rot oida mimif mucuwei mar ojgomu, noba munororu mar ongga tenten enesi.

7Tina erek mimif mita mar ongga oufamofa ojgomu, beda koma orocunc rot oida mimif miker gij eisa fob, erek Ofa eker gij eisa. Beda mifmin mudou eja erek egens jera Ofa fob. Noba oisouska efen efesa Yesus ogufu ongga eya tumu mega salib fob bera Ofa onsuna rot mifmin mar ongga oska nomnaga jeska mudou efesi fob.

8Erek mimif magot oida mineita mar ongga oska egema tein jinaga enesi, beda koma erek mimif mucuwei mar gu misinsa ojgomu ros. Noba Allah efen oga ongga tenten bera enah gij mudou efesi enesi.

9Tina erek mimif mimeesa joug rot mifmin mar ongga oska, beda Allah omosuna rot mar ongga oska insa koma jeska mudou efesi si. Beda Ofa emeita odou ongga ebsi komowa gu mimif fogora mifmin mar ongga oska insa koma enah deika guru fob. Jeska Ofa omotunggom mar nomnaga ongga Ofa anggen rot erek insa koma sis fob si.

10Allah anggot rot oida rusnok nomnaga bera rita mar ongga oska fob. Tina erek mimif magot oida mineita mar ongga oska egema tein enesi, beda koma erek mimif magot oida Allah ocuwei mar ojgomu. Noba koma tein erek mimif mungkoja rot Ofa efen oga tein fob.



 <<  1 Yohanes 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel