Alkitab Mobile SABDA
[VER] : [MEYAH]     [PL]  [PB] 
 <<  2 Petrus 2 >> 

1Sis fob nabi-nabi enjgineg ongga ebireira bera ringker gu rua ongga Israel rifekesa tein. Jefeda Guru-Guru ongga ebireira bera rimeker gu iwa ifekesa tein si. Rua rumoftuftu mar ongga oska gu iwa erek wuswus ongga orotunggom rusnok rudou emekebema. Beda oisouska mar insa koma bera rusnok rineya rimeseiseifa rot. Noba rua rudou omokoja rot Yesus Kristus tein. Ofa bera Tuhan ongga anggos tumu mega salib jeskaseda osuwa rua jeska rerin mar ongga oska fob. Jefeda Allah emaha mar okum eteb keingg rua rot ebeirens si.

2Rusnok rufoukou bera rumororu Guru-Guru ongga oska insa koma rerin mar ongga oska efekeifa tein. Jefeda rusnok enjgineg rimek mar ongga rua runtunggom insa koma fogora rua rimagot rot oida Allah oga ongga oufamofa insa koma bera erek oska ojgomu.

3Noba jeska Guru-Guru insa koma rudou eftirir keingg mar ofoukou, jefeda rua rumocuwei mar gu iwa jeskaseda rurokrusa iwa rot yeyin mareibra. Tina Allah ensejah gij mona dektek fob jeskaseda ofra mar okum eteb keingg rua insa koma ojgomu. Ofa omoga ojga rot rua jeni rerin rita mar ongga oska insa koma si.

4Mimif mijginaga rot oida Allah omofra okum eteb keingg Guru-Guru ongga ebireira insa koma si. Jeska Ofa onorons rot mar ongga oska ongga malaikat-malaikat rineya runtunggom sis fob guru. Tina Ofa eij rua gij monuh ongga motkobah jeskaseda rua riker jah suma ojgomuja onjoros mona ongga Ofa ofra mar okum keingg rusnok nomnaga ongga rerin mar ongga oska.

5Noba Ofa tein onorons rot mar ongga ofogog ongga rusnok runtunggom gij mona ongga sis eteb fob guru. Tina Ofa era mei ofot eteb eredi rua fogora rua nomnaga rageben. Erek koma tina Ofa oskotu Nuh jera efen rusnok rufok cinja erfeka ojgomu. Jeska Nuh bera erek osnok ongga oftuftu rusnok rot mar ongga oufamofa ojgomu.

6Beda sis fob, Allah oga ojga rot rusnok ongga gij kota Sodom jera kota Gomora rot rerin mar ongga oska fogora esa mah keingg rua onjoros rua nomnaga riribseb. Noba mar ongga Ofa ontunggom insa koma bera erek orocunc nou rusnok enjgineg jeskaseda rua tein rineita mar ongga oska erek rua ongga rufogog insa koma guru.

7Tina gij mona insa koma bera Ofa oskotu Lot jeska kota Sodom koma, jeska Lot bera erek osnok egens ongga efen mar ongga oska oskiyai tein guru. Noba Lot tein odou okumkum eteb rot rusnok insa koma rerin rita mar ongga oska. Jeska rua runororu hukum egema tein guru, tina rutunggom mar ongga oska ongga rudou eftirir keingg rot ojgomuja.

8Gij orofosut mona egens egens bera Lot ek noba eg tumu rusnok insa koma ongga runororu hukum egema tein guru. Ofa ek rua rutunggom mar ongga oska ofoukou ojgomuja. Jefeda efen odou efesi ongga ebsi komowa bera okumkum eteb rot rua ojgomu.

9Noba Allah ejginaga rot teinefa oskotu Nuh jera Lot jeska mar ongga ofogog insa koma. Jefeda Ofa tein ejginaga rot teinefa oskotu efen rusnok ongga rudou ebsi komowa jeska mar okum ongga ereneni rua tein gij mona ebeibeyaif ojgomu. Noba Ofa emagei rusnok insa koma nomnaga ongga rutunggom mar ongga oska ojgomuja onjoros mona ongga Ofa ofra mar okum keingg rua jera rusnok enjgineg tein ongga rerin mar ongga oska.

10Ofa emaha mar erek koma keingg rusnok nomnaga ongga risiri gij mar ongga rudou eftirir keingg ojgomuja, jera rusnok ongga rudou oska skoita Ofa efen owesa efek tein si. Erek koma tein, Guru-Guru ongga ebireira insa koma bera ruku rufos ojgomuja, jeska rua rinemeesa guru, tina ruga oruh mar ongga angh gu mebaga rot rufoka ongga aksa tein.

11Erek koma tina, malaikat-malaikat ongga efen owesa efek ekirsa jeska mar ongga angh gu mebaga insa koma bera runoga oruh mar koma jinaga guru. Noba malaikat-malaikat tein runocunc mar koma erek oska skoita Allah jinaga guru.

12Tina Guru-Guru insa koma ruga oruh mar ongga risinsa rudou enebriyi gij guru. Jeska rua bera erek marska ongga ecira ebireira, noba ongga angh gu mebif jeskaseda rusnok ruskotu noba ragob ojgomu. Rua insa koma rutunggom mar ongga oska ebireira ojgomuja, jefeda rua rimesma mar okum eteb jeska Allah rot si.

13Rua rerin rufons bera erek mar okum ongga emah keingg rua si. Jeska rua rita mar ongga okum gu rusnok enjgineg tein. Noba rua rudou eftirir keingg mar ongga oska gij orofosut mona ojgomuja. Noba mar koma bera ongga ereita rudou efesi erirei rot ojgomu. Noba gij mona ongga rua rint maat morototuma jera iwa, beda rua rita mar ongga oska efekeifa gij mona insa koma tein.

14Guru-Guru ongga ebireira insa koma rudou os risiri jera egema efen mohona ebireira ojgomuja. Noba rua rudou osos rot rutunggom mar ongga oska ojgomuja. Rua rik rusnok enjgineg ongga rudou enahais rot mar ongga oufa jera mar ongga oska enesi, fogora rua rurokrusa rusnok insa koma jeskaseda rua tein ruroru rerin mar ongga oska insa koma ojgomuja. Noba rua rijginaga rot teinefa rimeita mar ongga rudou eftirir keingg rot ojgomuja. Jefeda gij mona kahma beda Allah omofra mar okum eteb keingg rusnok erek koma si.

15Erek koma noba rua rikikif jeska rusnok rerin erebent ongga oufamofa, noba rija yes jeska erebent insa koma jeskaseda rita mar ongga oska ojgomu. Rua rita mar erek Bileam ongga Beor efen efesa eita sis fob. Bileam odou osos esma fifi rot mar ongga oska ongga ofa ontunggom gij mona insa koma.

16Tina Allah etaha joug ofa rot mar insa koma ojgomu. Koma bera, Allah eita owesa efek gu keledai egens jeskaseda era oga erek rusnok fogora etaha joug Bileam rot mar insa koma ongga ofa ontunggom. Jefeda keledai egens koma eragou joug Bileam ongga eja rot odou ongga eftirir keingg fifi jeskaseda otunggom mar ongga ofogog.

17Rusnok rik Guru-Guru ebireira insa koma beda rua rusujohu oida rua koma rumoftuftu mar rot tenten ojgomu. Tina rua ruhurmei mar skoita rusnok insa koma ojgomu. Jefeda rua bera erek mei eiteij ongga rusnok runsujohu oida rageya efei jeska si. Tina nou ongga rinsaga gu mei eiteij fob, beda mei koma ofora ojgomu. Noba Guru-Guru insa koma bera erek mocgoj ofog ongga ahtaboku eteb noba ocohun monuh egens tein. Rusnok rik mocgoj koma beda rusujohu oida ai juens mos emes si. Tina mos enes jeska mocgoj ongga ahtaboku insa koma guri. Jefeda Allah ensejah monuh ongga motkobah tuturu ojgomuja nou Guru-Guru ebireira insa koma fob.

18Noba oisouska mar ongga rua ranggot rot ruga efeyei bera rua rusos rusnok rudou efesi jeskaseda rua rita mar ongga oska ongga rusnok mebif rudou eftirir keingg rot ojgomuja. Noba Guru-Guru insa koma rutunggom mar erek koma askesi rusnok insa koma ringkikif jeska rerin mar ongga oska ros. Mar ongga oska koma bera rusnok mebif runtunggom ros.

19Noba rua tein ragen oida rusnok insa koma rimeita owesa efek jeskaseda rut gu risinsa ojgomu. Tina Guru-Guru insa koma rerin owesa efek jeskaseda rusuwa risinsa jeska mar ongga oska ongga angh gij rudou efesi ojgomuja jinaga guru. Jeska rusnok ruroru mar ongga oska ongga angh gij rudou efesi fogora rutunggom mar koma ojgomu.

20Noba erek Guru-Guru insa koma rusuwa risinsa jeska rerin mar ongga oska ongga rusnok mebif rutunggom oisouska mifmin Tuhan Yesus Kristus, beda koma bera oufa. Jeska Yesus bera ongga onskotu rusnok jeska rerin mar ongga oska. Tina rua risiri gij mar ongga oska insa koma deika sons fogora mar koma agei rudou ahais deika. Jefeda rerin riteij ah bera erek oska ekirsa eteb deika.

21Memef ongga rasul moftuftu osok gij mar ongga Allah anggot rot sis fob jefeda Guru-Guru insa koma ruroru mar koma fob. Tina ebeibeyaif rua ringkikif jeska Allah oga insa koma ojgomu fob. Jefeda ongga oufa ekirsa nou rua bera erek sis fob rukoja mar insa koma ojgomu. Jeska erek rusnok ruroru oga ongga oufamofa insa koma, noba gij mona enjgineg bera raha oga koma jah ojgomu, beda koma erek mar ongga oska ekirsa jeska rusnok ongga rungkoja rot efen oga rot sismeni ojgomu.

22Mar ongga rua runtunggom insa koma bera erek mar egens ongga rusnok ragot erek kef oida, "Mes egens ongga aha meisohu jah bera oksons noba enet efen meisohu insa koma sons deika." Noba koma tein erek kef oida, "Mek orins ongga rusnok rut efaga fob bera oksons noba ah gij mohtefa deika fob." Erek koma tein, sis fob rua ongga Guru-Guru ebireira ruroru mar ongga oufamofa. Tina ebeibeyaif rua ruksons gu rerin mar ongga oska efekeifa deika fob.



 <<  2 Petrus 2 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel