Alkitab Mobile SABDA
[VER] : [MEYAH]     [PL]  [PB] 
 <<  2 Timotius 3 >> 

1Timotius, budou ah keingg rot mar kef oida: Gij mona ongga enja ejgwaga ensaga doida fob, beda rusnok rimek mar ongga okum ofoukou.

2Gij mona insa koma bera rusnok rudou agei rerin mareibra ojgomuja ni, rudou ekeben keingg mareibra ofoukou ni, rua rimesitit risinsa rufoka ni, ruga omoruh rusnok enjgineg ni, runougif gu riker ruga jinaga guru ni, runois oufamofa gu rusnok enjgineg rot mar ongga rua risma guru ni, runororu Allah oga rot tenten guru ni.

3Rua rimeita mar ongga oska skoita rusnok enjgineg ni, runocunc rudou ongga eriaga skoita rusnok enjgineg guru ni, ruga oska rot rusnok enjgineg ni, rita mar ongga ofogog eteb skoita rusnok enjgineg ni, rudou oska rot mar nomnaga ongga erek ongkoska ni,

4Rua rurokrusa rusnok enjgineg ni, rutunggom mar nomnaga rot rudou ongga oska ni, rufra risinsa rufoka erek aksa ekirsa jeska rusnok enjgineg ni, rua rudou os rita mar ongga eita rudou erirei ojgomu ni, tina rudou onosos Allah guri ni.

5Rua rucunc risinsa erek rusnok ongga rua rugif gu Allah, tina rua rukoja mar nomnaga ongga Allah eita gu efen rusnok ongga rumofij rua ojgomu.

6Rineya jeska rua insa koma ruhca rujager ongga rudou okumkum rot risinsa, jeska rujager koma runtunggom mar ongga oska ofoukou gij mar ongga rudou eftirir keingg ojgomuja. Beda rua ruhurmei mar jeska rujager insa koma jeskaseda rujager koma ruroru mar ongga rua ruftuftu ojgomu.

7Rujager insa koma rudou os jeskaseda rusnok ruftuftu rua rot mar ongga tenten, tina rua rudou enekikif jeska rerin mar ongga oska insa koma guru. Jefeda rua runororu mar ongga tenten guru.

8Rusnok ongga rutunggom mar ongga oska insa koma bera rirek gonerga ongga gofoka Yanes gonu Yambres. Jeska sis fob eteb goga geretei rot mar ongga Musa oftuftu gu efen rusnok Israel ojgomuja. Erek koma tein rusnok insa koma riretei rot mar nomnaga ongga erek tenten ojgomuja. Rua rudou onosujohu rot mar ongga ongkoska jinaga guru. Noba rua ringkikif jeska Allah oga fogora runororu oga insa koma deika jinaga guru.

9Tina rua runotoiru gij rerin mar ongga oska ojgomuja guru, jeska rusnok nomnaga rimek rot teinefa rua rita mar rot rudou ongga osumsumu eteb si. Koma morototuma erek Yanes gonu Yambres insa koma ongga geretei rot Musa sis fob. Gij mona ongga estir deika beda rusnok runororu goga deika guru.

10Tina bua bijginaga rot mar nomnaga ongga didif duntunggom fob jera mar ongga didif dumftuftu gu rusnok fob. Noba bua bijginaga rot oida duh dudou rot ongkas jeskaseda dufij Yesus Kristus ojgomuja. Bua bingk rot teinefa didif duroru Allah oga rot tenten ojgomuja. Noba bua bingk rot teinefa didif duin keingg dudou efesi gij mar ongga ereneni didif ojgomuja tein. Bua bingk rot teinefa didif dudou okora rot rusnok enjgineg noba rot teinefa didif dug dijmeg gij mar okum ongga ah gu didif ojgomuja.

11Bua bijginaga rot teinefa didif dita dudou ahais sis mona ongga rusnok rita efera okora eteb gu didif jah Kota Antiokhia ni, kota Ikonium ni, jera kota Listra tein. Tina Tuhan oskotu didif jeska mar insa koma nomnaga.

12Ongga tenten bera idu ongga odou os ororu Allah oga rot tenten oisouska odou ongga egens jera Yesus Kristus fob, beda ofa emek mar okum jeska rusnok enjgineg ongga rufogog rot ofa si.

13Erek koma noba rusnok ongga rufogog jera rusnok ongga rucuwei mar bera rimeita mar ongga oska ofoukou odudu dokun deika ojgomuja. Rua rumorokrusa rusnok enjgineg noba rusnok enjgineg rumorokrusa rua tein sons.

14Tina Timotius, bua butoiru gij mar ongga tenten ongga rusnok enjgineg rumftuftu gu bua sis fob. Jeska bua budou ororu mar insa koma rot ahais fob. Budou ah keingg rot rusnok insa koma ongga rumftuftu bua rot Allah oga sis fob.

15Noba budou ah keingg rot oida sis mona ongga bua bumforoka bifes ros onjoros deisef tein bera budou ebriyi gij Mar Efeyi Ebsi fob. Jeska oisouska Mar Efeyi Ebsi insa koma bera bua bisma budou ongga ebriyi gij rot teinefa rusnok risma eiteij ah ongga efeinah. Rua risma mar insa koma oisouska rudou ongga ororu Yesus Kristus rot tenten ojgomu.

16Mar nomnaga ongga rusnok runggu gij Mar Efeyi Ebsi fob bera en oisouska Efena Ebsi Allah ongga oncunc rot mar insa koma gu rua gij rudou efesi fob. Noba oisouska Mar Efeyi Ebsi insa koma bera mimif muftuftu rusnok enjgineg rot mar ongga tenten ni, mimif magot joug rua rot rerin mar ongga oska ni, mimif mucunc gu rua rot teinefa rua rita mar ongga oufamofa ojgomu ni, noba mimif muftuftu rua rot teinefa rua rita riteij ah ongga ongkoska ojgomu ni.

17Mimif mita mar erek insa koma jeskaseda rusnok ongga rufij Allah bera rijginaga rot teinefa rua rita mar nomnaga ongga oufamofa eteb ahah Allah eiteij ojgomuja.



 <<  2 Timotius 3 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel