Alkitab Mobile SABDA
[VER] : [MEYAH]     [PL]  [PB] 
 <<  Efesus 1 >> 

1Didif Paulus bera dinja erek Yesus Kristus efen rasul egens jeska koma bera ororu Allah efen odou ejginaga rot. Noba didif dunogu surat egens kef skoita iwa ongga irek Allah efen rusnok ongga ruroru Yesus Kristus gij kota Efesus tein. Iwa bera ongga iroru Yesus Kristus efen oga rot tenten ojgomuja fob.

2Didif duis gu mifmin mika Allah jera Tuhan Yesus Kristus tein jeskaseda Ofa eita oufamofa eteb jera eiteij ah ongga eskeiramera gu iwa ojgomuja.

3Mimif nomnaga misitit gu Allah ongga mifmin Tuhan Yesus Kristus efen meka ojgomu. Jeska Ofa eita mar nomnaga ongga oufamofa gij mebaga gu mimif oisouska Efena Ebsi fob. Noba Ofa eita mar erek koma oisouska Yesus Kristus fob.

4Erek koma jeska, gij mona ongga Ofa onotunggom mebif enesi, beda Ofa oga ojga rot oida oisouska Yesus Kristus ongga emen, bera Ofa omocunc mimif erek efen rusnok ongga rudou ebsi komowa. Jefeda enadaij nou rusnok enjgineg rucunc mimif erek oska jinaga guru.

5Noba gij mona insa koma tein Allah ensejah rot oida oisouska mudou ongga egens jera Yesus Kristus bera mimif mimeja erek Ofa efen efeser. Mar koma bera ororu Ofa odou ejginaga rot noba odou ongga eskeiramera rot tein.

6Jefeda mimif muis oufamofa eteb gu Ofa jeska Ofa oncunc mimif erek efen rusnok fob. Ofa otunggom mar insa koma oisouska odou ongga eskeiramera eteb rot mimif noba oisouska efen efesa Yesus Kristus ongga odou okora eteb doska rot mimif.

7Oisouska Yesus Kristus ogufu ongga eya tumu mega salib bera Allah onsuwa mimif jeska mifmin mar ongga oska fob. Ofa onsuna rot mifmin mar ongga oska insa koma jeska mudou efesi fob. Noba koma bera rot teinefa Ofa oncunc efen odou ongga oufamofa eteb skoita mimif.

8Ofa oncunc rot mar ofoukou ongga ongkoska eteb insa koma gu mimif ororu efen odou ongga ejginaga rot mar nomnaga jera odou ongga ebriyi eteb gij mar nomnaga tein.

9Noba oisouska Allah efen odou ongga eskeiramera rot mimif bera Ofa oncunc mar ongga Ofa ensejah nou otunggom gij mona ongga sis dojunmeni fob. Sis fob mar ongga Ofa ensejah rot bera ah jejema jeska rusnok nomnaga. Noba gij mona ongga sis dojunmeni koma bera Ofa osujohu rot oida Ofa omocunc mar insa koma oisouska Yesus Kristus si.

10Beda Ofa ensejah rot oida, gij mona ongga enja ejgwaga beda Ofa omotunggom mar nomnaga ongga angh gu mebaga jera mebif tein fogora emeja erek egens oisouska Yesus Kristus ojgomu. Noba Yesus emeja erek mar insa koma nomnaga efen ebirfaga tein.

11Allah bera ontunggom mar nomnaga jeni Ofa odou ejginaga rot. Noba mar egens ongga Ofa ontunggom gij mona ongga sis dojunmeni insa koma bera erek kef: Ofa oga ojga rot oida gij mona kahma bera Ofa omocunc mimif erek efen rusnok oisouska mudou ongga eja erek egens jera Yesus Kristus fob.

12Ofa ensejah rot mar erek koma gij mona ongga sis dojunmeni jeskaseda gij mona kahma beda memef ongga erek rusnok Yahudi, ongga ruisum gij Yesus Kristus rot sismeni fob, bera memesitit Ofa rot efen ofoka ongga aksa eteb doska ojgomuja.

13Beda Allah ensejah rot mar insa koma nomnaga nou iwa ongga erek Yahudi guru tein. Jeska sis fob bera iwa tein ingg rot Allah oga ongga oufamofa noba ongga tenten ojgomu. Noba oga ongga oufamofa koma bera ongga onskotu iwa jeska yeyin mar ongga oska fob. Jefeda gij mona ongga iwa iroru Ofa rot tenten fob, beda Ofa oncunc iwa tein erek efen rusnok fob. Ofa ontunggom mar koma sis fob oisouska Efena Ebsi ongga Ofa anggen rot oida emen. Noba Efena Ebsi koma ongga angh gij idou efesi fob bera ongga orocunc rot tenten oida iwa bera erek Allah efen rusnok.

14Sis fob Ofa anggen rot oida Ofa emeita mar ofoukou ongga ongkoska eteb gu mimif. Noba mar egens ongga Ofa eita gu mimif rot sismeni bera Efena Ebsi ongga engker gij mudou efesi fob. Noba koma bera orocunc rot oida gij mona kahma beda Ofa emeita efen ofod nomnaga rot omoisa gu iwa si. Noba Efena Ebsi ongga angh gij idou efesi fob bera orocunc rot oida Allah omosuwa iwa fogora oroun iwa gu esinsa tein. Jefeda mimif nomnaga misitit Ofa rot efen ofoka ongga aksa eteb doska ojgomuja.

15Allah ontunggom mar insa koma nomnaga nou iwa fob, jefeda didif duis oufamofa eteb gu Ofa rot iwa ojgomuja. Jeska didif dingg rot oida iwa iroru Tuhan Yesus Kristus ojgomuja, noba idou okora rot Allah efen rusnok nomnaga tein ojgomuja fob. Jefeda didif dum diteij nou iwa gu Allah ojgomuja tein.

16(1:15)

17Ofa bera erek mifmin Tuhan Yesus Kristus efen meka noba ongga mimif tein mifmin mika ongga efen ofoka aksa eteb doska. Noba didif dum diteij gu Ofa jeskaseda oisouska Efena Ebsi bera iwa idou emebriyi eteb ekirsa gij mar ongga Allah ontunggom fob. Noba didif dum diteij jeskaseda iwa tein ita idou ongga ebriyi ekirsa gij rot Allah efen owesa efek eteb tein.

18Noba didif dum diteij gu Ofa jeskaseda idou emebriyi ekirsa gij mar ongga Ofa ontunggom nou iwa fob. Beda iwa imoisum gij Ofa erek eteb ekirsa deika. Jeska Ofa bera oncunc iwa erek efen rusnok fob. Noba didif dum diteij jeskaseda iwa idou ebriyi gij mar ongga oufamofa eteb doska ongga Ofa anggen rot oida emeita gu efen rusnok si. Noba didif dum diteij jeskaseda idou ebriyi gij rot teinefa Ofa ofij mimif, ongga erek efen rusnok, oisouska efen owesa efek eteb.

19(1:18)

20Noba Ofa era efen owesa efek eteb insa koma jeskaseda orofra Yesus Kristus jeska anggos sis fob. Noba Ofa era efen owesa efek insa koma tein jeskaseda eraha Yesus jah ognosk rot ofoka aksa eteb gu mebaga.

21Jah suma bera Yesus Kristus efen ofoka ongga aksa ekirsa jeska rusnok ongga rufoka ereij keingg rusnok rufoukou ni, ekirsa jeska rusnok ongga rerin owesa efek ni, ekirsa jeska mar meidu meidu ongga rusnok rinjeka erek ofoka aksa gij mona deisef jera gij mona efeinah ongga emen tein ni.

22Noba Allah bera oin keingg mar nomnaga degini jeskaseda Yesus Kristus ofoka ereij keingg mar koma nomnaga ojgomuja. Beda Ofa oncunc Yesus Kristus erek ebirfaga nou efen rusnok Mod Ari nomnaga tein.

23Beda mimif bera erek Ofa efen efaga. Noba Ofa bera erek mifmin ebirfaga ongga ocunc gu mimif rot mar ongga mimif mutunggom nou Ofa. Noba mifmin mudou efesi tein bera ebera rot mar nomnaga ongga Ofa eita gu mimif fob. Jeska mar nomnaga ongga Allah ontunggom bera ebera rot Ofa ojgomu.



 <<  Efesus 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel