Alkitab Mobile SABDA
[VER] : [MEYAH]     [PL]  [PB] 
 <<  Efesus 4 >> 

1Erek koma jefeda didif, ongga dingker gij mod oskusk rot Yesus efen ofoka, bera duis gu iwa jeskaseda iwa ita mar nomnaga rot ongkoska ojgomuja. Iwa ita mar jeni erek Allah oncunc gu iwa gij mona ongga iwa inroru Ofa efen oga sis fob.

2Iwa yuin keingg isinsa ifoka beda ita mar moguma rot idou ongga eriaga morototuma. Noba iwa tein yuin keingg idou efesi rot mar ongga iwa itunggom moguma tein. Beda iwa imofijma fogora imorocunc rot oida idou omokorema fob.

3Noba oisouska Efena Ebsi ongga engker gij idou efesi fob, bera iwa ireni rot ahais jeskaseda yeyin idou efesi ongga erek eskeiramera morototuma ojgomuja. Beda idou efesi tein emerek egens moguma ojgomuja.

4Jeska Yesus Kristus efen rusnok bera erek efaga egens ojgomu. Noba Efena Ebsi Allah bera erek egens ojgomu. Noba mimif muisum gij Allah ojgomu ongga enjeka mimif erek efen rusnok.

5Noba mifmin Tuhan ongga egens ojgomu. Noba mimif muroru Allah efen oga ojgomu. Beda mimif mita baptis tein gij Yesus Kristus ofoka ojgomu.

6Noba mifmin Allah bera ongga egens noba ongga erek rusnok nomnaga rerin Rika. Ofa bera ongga ofoka ereij keingg rusnok jera mar ongga enjgineg nomnaga tein. Noba mar nomnaga ongga Ofa ontunggom bera oisouska efen rusnok. Noba Efena Ebsi ongga en jeska Ofa bera engker gij mudou efesi fob.

7Erek koma noba Allah eita owesa efek ongga oufamofa eteb oisouska efen odou ongga eskeira eteb gu mimif. Noba mimif misma mar koma nomnaga erek jeni oisouska Yesus Kristus efen odou ejginaga rot tein ojgomu.

8Jeska mar egens gij Mar Efeyi Ebsi bera agot erek kef oida, "Nou ongga Ofa osok jah monuh aksa, beda Ofa eja okag rot mesa ongga rinsiri gu Ofa. Beda Ofa ekeba mareibra gu efen mohujir jeskaseda rua rifaga ouka morototuma jera Ofa."

9Yesus onsok jah mebaga erek koma fob, beda koma tein orocunc rot oida sismeni fog bera Ofa onjuj gij mebi efesi tein fogora omosok jah mebaga.

10Ofa ongga onjuj gij mebi efesi degini doska bera ongga onsok jah mebaga skidameda ojgomuja tein. Noba Ofa onsok jah mebaga erek koma jeskaseda ofoka ereij keingg mar nomnaga ongga angh gu mebaga jera mebif tein.

11Ofa eita owesa efek gu memef meneya jeskaseda motunggom mar erek efen rasul-rasul. Noba Ofa eita owesa efek gu rusnok rineya jeskaseda rija erek nabi-nabi ongga rifesij rot mar ongga Allah ocunc gu rua gij rudou efesi skoita rusnok Mod Ari. Noba Ofa eita owesa efek gu rusnok rineya jeskaseda ricira rot Allah oga skoita rusnok ongga rineg rot enesi. Noba Ofa eita owesa efek gu rusnok rineya jeskaseda rija erek ebirfaga Mod Ari. Noba Ofa eita owesa efek gu rusnok rineya jeskaseda rija erek Guru-Guru rot efen oga nou rusnok Mod Ari.

12Ofa eita owesa efek insa koma nomnaga gu efen rusnok rineya jeskaseda rua nomnaga rita owesa efek ongga adaij nou rumofijma ojgomuja. Noba Ofa otunggom mar insa koma jeskaseda Yesus Kristus efen rusnok Mod Ari nomnaga rumot rot ahais ojgomuja tein.

13Beda mimif mumot rot ahais erek koma ojgomuja onjoros mimif nomnaga tein mita mudou ongga erek egens morototuma. Beda mimif tein misma mudou ongga egens jera Yesus Kristus ongga Allah efen efesa. Noba erek runa ofos jera rujona ofos ongga rudou ebriyi gij mar fob, beda erek koma tein mimif ongga erek rusnok Mod Ari nomnaga muroru mar insa koma onjoros mudou ebriyi gij rot teinefa mimeita mar koisoisa erek Yesus Kristus eita mar.

14Beda mimif mita mar erek insa koma jeskaseda mudou enerek ruforoker rerin rudou ongga enahais enesi guru. Jeska giskini bera ruforoker ruroru mar ebireira ongga rusnok enjgineg ruftuftu gu rua ojgomuja. Noba rusnok rineya ongga ruftuftu mar ongga oska rot rudou ongga efesis eteb bera runofoguma. Beda rua rinsejah gij rudou efesi jeskaseda rurokrusa rusnok ongga rita mar erek ruforoker insa koma rita mar ojgomu.

15Tina oisouska mudou ongga omokorema moguma noba mudou ongga ororu mar ongga tenten ojgomu, bera mimif mija erek runa ofos jera rujona ofos ongga rudou ebriyi gij mar erek eteb fob ojgomu. Mar koma orocunc rot oida mimif mita mar koisoisa erek Yesus Kristus eita mar fob. Jeska Ofa bera erek ebirfaga nou rusnok Mod Ari nomnaga.

16Mar insa koma bera erek osnok efaga egens. Jeska efaga egens koma efen ofora nomnaga ongga emebiedima erek egens ojgomu. Noba ofora koma nomnaga rumofijma jeskaseda efaga egens koma efen owesa efek nou eita mar fogora eker rot oufamofa. Koma tein orocunc rot rusnok Mod Ari nomnaga. Jeska erek rua rumofijma noba rudou omokorema odudu deika, beda rudou emebriyi gij rot teinefa rua rimeita mar koisoisa erek Yesus Kristus eita mar.

17Erek koma jefeda, didif disisi joug iwa oisouska Tuhan ofoka jeskaseda iwa ineita mar erek rusnok ongga runororu Allah guru, erek koma jinaga guru. Jeska mar ongga rua rusujohu rot bera onofij rua oskiyai tein guru.

18Rua riker gij motkobah ojgomu jeska rua rinejginaga rot eiteij ah ongga oufamofa ongga Allah eita gu rusnok ongga rudou okora rot Ofa guru. Rua rinejginaga rot eiteij ah koma guru, jeska rudou osumsumu osok gij mar ongga tenten ojgomu. Noba ribirfaga erek ombrera rot tein ojgomu.

19Rua ruku rufos rot mar ongga rudou eftirir keingg ojgomu noba mojenen rua rot oskiyai tein jinaga guru. Jefeda rua runoin keingg risinsa rudou efesi rot mar insa koma jinaga guru, tina rua ruroru mar ongga oska ebireira ojgomuja.

20Tina mar ongga iwa imfokor rot osok gij Yesus Kristus bera erek koma guru.

21Jeska iwa ig mar rot Ofa, noba rusnok ruftuftu mar osok gij Ofa gu iwa oisouska Ofa efen oga ongga tenten ojgomu.

22Sis fob rusnok ruftuftu iwa osok gij yeyin iteij ah ongga oska ros. Noba rua ruftuftu iwa jeskaseda ikikif jeska yeyin mar ongga oska insa koma. Jeska iteij ah koma bera ebera rot mar ongga oska jera mar ongga ofogog tein.

23Noba rua ruftuftu mar gu iwa jeskaseda iwa ita idou efesi ongga osujohu rot mar erek efeinah deika.

24Noba rua tein ruftuftu mar gu iwa jeskaseda ija erek rusnok ongga efeinah ojgomu. Beda iwa imeita mar morototuma erek Allah eita mar. Iwa inja erek rusnok ongga rerin mar ongga oska oskiyai tein guru. Jeska idou efesi erek ebsi komowa fob.

25Jefeda iwa tein inocuwei mar gu yeyin ihujir deika guru. Tina iwa yagot rot mar ongga tenten gu rua ojgomu. Jeska mimif nomnaga bera mimebiedima erek egens oisouska Yesus Kristus fob.

26Noba erek iwa yutkonu oska skoita rusnok enjgineg, beda inorons rot mar koma ojgomuja onjoros itunggom mar ongga oska rot guru. Noba iwa inorons rot mar insa koma ah gij idou efesi ojgomuja onjoros motu tein guru. Tina iwa isuna rot mar ongga oska insa koma ebeirens ojgomu.

27Iwa isuna rot ebeirens jeskaseda Bilis eneita efekesa nou ocunc mar ongga oska gij idou efesi rot guru.

28Noba iwa ongga yukoreka mar sis fob, iwa ineita mar erek koma deika guru. Tina iwa ifarur rot iskusk nou mar ongga iwa icosu rot ojgomu. Noba iwa yufij rusnok enjgineg ongga rufojingki tein.

29Noba iwa inagot mar rot yuga ongga erek oska gu rusnok enjgineg guru. Tina iwa yagot mar rot yuga ongga erek eriagamaga ojgomu. Jeska erek rua ruhoda rudou efesi rot mar insa koma beda mar koma bera omofij rua noba omorocunc rot mar ongga oufamofa gu rua tein.

30Noba iwa inotunggom mar ongga ereita Efena Ebsi Allah odou okumkum rot iwa guru. Jeska erek osnok egens oin buk keingg surat rot mar ongga ofa anggen rot, beda erek koma tein Allah ombk Efena Ebsi jah gu idou efesi jeskaseda orocunc rot mar ongga Ofa anggen rot fob. Mar koma bera oida iwa imesma eiteij ah ongga efeinah si. Koma bera gij mona ongga Tuhan ongksons en.

31Jefeda iwa ineita mar rot idou ongga okumkum skoita rusnok enjgineg guru. Noba iwa inotkonu oska ebeirens rot rusnok enjgineg guru. Noba inohurmei mar gu rusnok enjgineg tein guru. Iwa ineita mar ongga oska erek koma nomnaga jinaga guru.

32Tina ongga oufa ekirsa bera, iwa icunc idou efesi ongga ongkoska morototuma ojgomu. Noba iwa isuna rot mar ongga oska ongga rusnok enjgineg rutunggom skoita iwa. Iwa ita erek mar erek koma jeska Allah bera onsuna rot yeyin mar ongga oska tein fob. Ofa onsuna rot yeyin mar ongga oska jeska iwa iroru Yesus Kristus tein fob.



 <<  Efesus 4 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel