Alkitab Mobile SABDA
[VER] : [MEYAH]     [PL]  [PB] 
 <<  Filipi 3 >> 

1Erek koma jefeda Edohuji, iwa idou efaga ouka rot ojgomu jeska iwa bera injerek egens morototuma jera Tuhan fob. Mar ongga didif dunogu gij surat egens kef bera erek mar ongga didif dunggu rot gu iwa sis fob. Noba didif dudou os disisi joug iwa juens deika rot mar insa koma nomnaga, jeska mar insa koma bera erek omofij iwa tein si.

2Jefeda iwa ibes ifaga jeska rusnok ongga rutunggom mar ongga ofogog ojgomuja. Jeska rua riradgodu rusnok enjgineg rot oida riris rufom mareij ofos jeska ojgomu. Noba mar ongga rua rita insa koma bera orotunggom rusnok enjgineg rerin riteij ah fogora riremesesema.

3Rua rusujohu rot oida erek rusnok riris rufom mareij ofos jeska, beda koma bera ongga eita rudou efesi erek ebsi komowa ahah Allah eiteij, tina guru. Jeska mimif ongga muroru Yesus Kristus bera misma mudou efesi ongga ebsi komowa ahah Allah eiteij rot tenten ojgomu. Noba mimif bera ongga mugif gu Ofa oisouska Efena Ebsi ongga engker gij mudou efesi fob. Noba mimif bera ongga mifaga ouka rot mar ongga Ofa ontunggom nou mimif fob. Noba mimif bera munoisum gij mar ongga rusnok risinsa rutunggom jeskaseda rita rudou ongga ebsi komowa ahah Allah eiteij jinaga guru.

4Erek rusnok rusujohu rot oida rua ruisum gij mar ongga risinsa rutunggom ojgomu, beda didif disinsiyai bera dijginaga rot mar insa koma erek ekirsa eteb tein. Rusnok rineya ruisum gij rerin rufoka era ruisum gij mar ongga risinsa rutunggom ojgomu jeskaseda risma rudou efesi ongga ebsi komowa. Koma erek tenten ei, beda didif bera erek osnok egens ongga dimesma dudou efesi ongga erek ebsi komowa ekirsa jeska rua nomnaga.

5Jeska gij mona ongga ameina onojuj rot didif erek mona cinja orfomu fob, beda rusnok riris dufom mareij ofos jeska. Noba didif tein dedin dufou ebiedi rua ongga Israel. Beda didif dujuj jeska indimowa Yahudi ongga ebic Benyamin. Noba didif duroru hukum Musa rot ahais ojgomuja, jeska sis fob bera didif dudou os duira gij ebic Yahudi egens ongga ofoka Farisi.

6Didif duroru hukum Musa rot ahais erek koma, jefeda didif dufra mar okum keingg rusnok ongga ruroru Yesus ojgomuja. Noba didif duroru hukum Musa nomnaga rot ahais fogora enadaij nou rusnok rucunc rot hukum egema tein ongga dunororu jinaga guru.

7Gij mona insa koma bera didif duisum gij mar insa koma nomnaga jeskaseda disma dudou ongga ebsi komowa ahah Allah eiteij. Tina ebeibeyaif didif dusujohu rot oida mar insa koma nomnaga bera enerek ofoufem deika jinaga guru. Jeska mar ongga Yesus Kristus ontunggom nou rusnok fob bera erek ofoufem ojgomu.

8Koma bera, didif dusujohu rot oida mar meidu meidu ongga didif disinsa duntunggom jeskaseda disma dudou ongga ebsi komowa ahah Allah eiteij bera enerek ofoufem jinaga guru. Jeska mar egens ongga ofoufem ojgomu bera oida didif duroru Yesus Kristus ongga erek dedin Tuhan ojgomu. Didif daha mar insa koma nomnaga jah jeskaseda duroru Ofa. Jefeda didif dusujohu rot oida mar ongga enjgineg nomnaga tein bera erek maroforu ejeres ongga mij jeska ojgomu. Erek koma jeska ebeibeyaif bera dudou efesi Kristus oisum gij Yesus ojgomu.

9Jeska ebeibeyaif bera didif dunosujohu rot oida dimesma dudou ongga ebsi komowa oisouska hukum Musa deika guru. Tina oisouska dudou ongga ororu Yesus Kristus fob bera didif dimesma dudou efesi ongga ebsi komowa ahah Allah eiteij ojgomu.

10Didif dudou os duisum gij Yesus Kristus rot mar nomnaga ojgomu jeskaseda dudou ejerek egens jera Ofa ojgomuja. Noba didif dudou os dufij Ofa oisouska owesa efek eteb ongga Ofa esma gij mona ongga Ofa endebecki jeska anggos fob. Noba didif dudou os dita difera okora morototuma erek Ofa eita efera okora gij mar ongga Ofa ontunggom sis fob.

11Ofa bera anggos fogora edebecki sons. Jefeda erek koma tein didif dudou os dagos fogora dimedebecki sons erek Ofa si.

12Erek koma beda didif dinagot rot oida didif bera dita mar erek insa koma nomnaga rot iskusk fob guru. Noba didif dinagot rot oida didif dita mar nomnaga erek ongkoska eteb fob guru. Tina didif duh dudou efesi rot ahais gij mar ongga dimfarur rot jeskaseda dudou eja erek egens jera Yesus Kristus ojgomuja. Jeska mar insa koma bera ongga Yesus Kristus odou os rot gij mona ongga Ofa oncunc didif erek osnok egens ongga ororu Ofa.

13Edohuji, didif dunosujohu rot oida didif bera duntunggom mar nomnaga ongga Yesus ondou os rot erek jeni fob guru. Didif dunosujohu rot mar ongga didif duntunggom ongga erek ongkoska sis fob ojgomuja guru. Tina didif duh dudou efesi rot ahais gij fogora dusujohu rot mar ongga angh gij mona kahma ojgomu.

14Didif duh dudou efesi rot ahais gu Yesus erek koma jeskaseda dutunggom mar nou Ofa ojgomuja onjoros mona ongga omoisa fob. Beda didif dimesma dedin dufons ongga oufamofa eteb jeska Allah gu mebaga si. Didif dimesma dufons insa koma jeska didif duroru Yesus Kristus rot tenten fob. Noba koma bera ongga Allah ondou os rot gij mona ongga Ofa oncunc didif sis fob tein.

15Erek koma jefeda, mimif nomnaga ongga muroru Efena Ebsi Allah rot tenten fob bera musujohu rot mar erek insa koma ojgomu. Noba erek rineya jeska iwa rusujohu rot mar erek ongga toga, beda Allah omocunc mar ongga tenten gu rua gij rudou efesi rot si.

16Erek koma tina ebeibeyaif bera mimif mita mar nomnaga jeni erek mudou ebriyi gij onjoros mona deisef ojgomu.

17Edohuji, iwa ita mar jeni erek iwa ingk didif duntunggom gij mona ongga dingker morototuma jera iwa sis fob. Noba iwa iajga joug rot teinefa rusnok enjgineg rita mar jeni erek didif tein, beda iwa itunggom mar erek rua tein ojgomu.

18Jeska rusnok rufoukou bera rukoja mar ongga memef moftuftu rot osok gij Yesus Kristus ongga anggos tumu mega salib nou mimif. Noba didif danggot rot mar insa koma gu iwa sis fob, tina didif dudou os dagot rot mar insa koma gu iwa erek juens deika ojgomu. Noba didif dinagot rot mar insa kef oisouska dudou efesi ongga ebsi komowa ojgomu.

19Tina Allah omofra okum eteb keingg rua rot mar insa koma ojgomu. Jeska rua rugif gu mar erek meidu meidu ongga rudou efesi eftirir keingg rot ojgomuja. Noba mojenen rua rot mar insa koma jinaga guru, tina rua risitit risinsa rifaga rot ojgomu. Beda rua rusujohu rot mar ongga angh gu mebif ojgomu.

20Erek koma, tina mimif mita mar erek rusnok ongga rerin monuh ongga angh gu mebaga ojgomu. Noba mimif mumom mudou nou mona ongga Tuhan Yesus Kristus ongksons en jeska mebaga tein ojgomu. Ofa bera ongga onskotu mimif jeska mifmin mar ongga oska sis fob.

21Beda oisouska Ofa efen owesa efek eteb ongga oin keingg mar nomnaga tein, bera Ofa emeita efaga ongga efeinah gu mimif ongga morototuma erek Ofa efen efaga ongga ongkoska eteb.



 <<  Filipi 3 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel